ޖުޑީޝަލް ސާވިސަސް ކޮމިޝަން (ޖޭއެސްސީ) ގައި ސިޔާސީ މަގާމެއް ފުރުއްވާ އެއްވެސް މީހަކު ނުހިމެނޭ ގޮތަށް އެ ކޮމިޝަނުގެ އެކުލެވުން ބަދަލު ކުރަން ޖެހޭ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ފަނޑިޔާރުންގެ މައްސަލަތައް ބެލުމާއި ފިޔަވަޅު އެޅުމުގެ މެންޑޭޓު އޮންނަ ޖޭއެސްސީގައި ސިޔާސީ މަގާމުތަކުގެ ބައެއް ބޭފުޅުން ތިއްބަވާތީ އެ ކޮމިޝަން މެދުވެރިކޮށް ޝަރުއީ ދާއިރާއަށް ސިޔާސީ ނުފޫޒު ވަންނަ ކަމުގެ ޝަކުވާ އަބަދުވެސް އޮވެ އެވެ.
އެ ކޮމިޝަނުގައި ސިޔާސީ ނުފޫޒު ނޯންނަ ގޮތަށް އަދި ފަނޑިޔާރުންގެ މަސްލަހަތު ކުޑަވާނެ ގޮތަށް އެކުލެވުން ބަދަލު ކުރުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ.
ނަމަވެސް އެކުލެވުމަށް މާ ބޮޑު ބަދަލުތަކެއް ނާންނަ ގޮތަށް އިސްލާހެއް ގެނައުމަށް ސަރުކާރުން ރައްޔިތުންގެ މަޖިލީހަށް ހުށަހެޅީ މިދިޔަ ޖޫންގަ އެވެ. އެ ބިލުގައި ވެސް ޖޭއެސްސީން އުނިކުރަނީ ރައްޔިތުންގެ މަޖިލީހުގެ ރައީސާއި، ރައީސުލްޖުމްހޫރިއްޔާ އައްޔަންކުރައްވާ މެންބަރާއި، ސިވިލް ސާވިސް ކޮމިޝަންގެ ރައީސެވެ. ބަންޑާރަ ނައިބާއި މަޖިލީހުގެ މެންބަރު އުނި ނުކުރާތީ ބިލަށް އިދިކޮޅު މެންބަރުން ފާޑުވިދާޅުވެފައިވެ އެވެ.
އިންތިހާބީ ރައީސް މުއިއްޒު ރޭ "ސަންގު ޓީވީ" ޕްރޮގްރާމެއްގައި ވާހަކަ ދައްކަވަމުން ވިދާޅުވީ ޖޭއެސްސީގައި ސިޔާސީ އެއްވެސް ބޭފުޅަކު ހުރެގެން ނުވާނެ ކަމަށެވެ. އަދި ދައުލަތުގެ އެހެން މަގާމެއްގައި ހުންނެވި ބޭފުޅަކަށް ވެސް ޖޭއެސްސީން ޖާގަ ދެވިގެން ނުވާނެ ކަމަށް އެމަނިކުފާނު ވިދާޅުވި އެވެ.
"(ޖޭއެސްސީ) ގައި ތިއްބަވަން ޖެހޭނީ ޖުޑީޝަލް ދާއިރާގެ ބޭފުޅުން. ރިޓަޔަޑް ޖަޖުން މިސާލަކަށް. އެހެންވީމާ އެ ކަހަލަ ވިސްނުމެއްގައި އަޅުގަނޑު ގަސްދު ކުރަނީ ޖޭއެސްސީގެ ކޮމްޕޮޒިޝަން އެކުލަވާލެވޭނެ ގޮތެއް ވާން،" މުއިއްޒު ވިދާޅުވި އެވެ.
ޕީއެންސީގެ ރައީސްގެ މަގާމު ވެސް ފުރުއްވާ މުއިއްޒު ވިދާޅުވީ، ކޮމިޝަނުގެ އެކުލެވުމާ ގުޅޭ ގޮތުން އެ ޕާޓީ ހިމެނޭ ޕީޕީއެމް/ޕީއެންސީ ކޯލިޝަންގެ ޕާލިމެންޓްރީ ގްރޫޕްގެ މެންބަރުންނާ މަޝްވަރާ ކުރައްވާނެ ކަމަށެވެ.
"އަޅުގަނޑު ގަބޫލުކުރާ ގޮތުގައި ޖޭއެސްސީ އަށް ހަގީގީ މިނިވަން ކަން އަންނަން ޖެހޭނެ. ސިޔާސީ ނުފޫޒުން އެއްކޮށް އެއްކިބާ ކުރަން ޖެހޭނެ. އަޅުގަނޑުމެންގެ މެންބަރުންނާ ތިކަމާ މަޝްވަރާ ކުރާނަން," މުއިއްޒު ވިދާޅުވި އެވެ.
އެމަނިކުފާނު ވިދާޅުވީ މިހާރު ސަރުކާރުން ހުށަހަޅާފައިވާ ބިލަށް ބަދަލުތަކެއް ގެނެސްގެން އެ ކަން ކުރެވެން އޮތް ނަމަ ކުރިއަށް ގެންދަވަން ބޭނުންވާ ކަމަށެވެ.
"އުއްމީދު ކުރަން އަޅުގަނޑުމެންގެ މެޖޯރިޓީ ނެތަސް ސަރުކާރުންނާއި ދެން ހުރި ޕާޓީތަކުން އެއްބާރުލުން ދެއްވާނެ ކަމަށް މިކަން ކުރުމުގައި،" އެމަނިކުފާނުގެ ޕާޓީއާ ވާދަވެރި އެެމްޑީޕީގެ މެޖޯރިޓީ އޮތް ރައްޔިތުންގެ މަޖިލީހަށް އިޝާރާތް ކުރައްވައި މުއިއްޒު ވިދާޅުވި އެވެ.
ފެހި ގާނޫނުއަސާސީގެ ދަށުން ސެޕްޓެމްބަރު 4، 2008 ގައި އެކުލަވާލި ޖޭއެސްސީގައި 10 މެމްބަރުން ތިއްބަވަ އެވެ. އެއީ ރައްޔިތުންގެ މަޖިލީހުގެ ރައީސާއި އެ މަޖިލީހުންގެ ކަނޑައަޅާ މެމްބަރަކާއި ރައީސުލްޖުމްހޫރިއްޔާ ކަނޑަައަޅުއްވާ މެމްބަރަކާއި ބަންޑާރަ ނައިބާއި ސުޕްރީމް ކޯޓުގެ ފަނޑިޔާރަކާއި ހައި ކޯޓުގެ ފަނޑިޔާރަކާއި ދަށު ކޯޓުތަކުން ކަނޑައަޅާ ފަނޑިޔާރަކާއި ސިވިލް ސާވިސް ކޮމިޝަނުގެ ރައީސާއި ވަކީލުންގެ ތެރެއިން މީހަކާއި އާންމުންގެ ތެރެއިން ނަގާ މީހެކެވެ.
މިހާރު އެ ކޮމިޝަންގައި ގިނައީ އެމްޑީޕީގެ ބޭފުޅުންނެވެ. ކޮމިޝަންގެ ރައީސަކީ ތުޅާދޫ ދާއިރާގެ މެންބަރު ހިސާން ހުސައިނެވެ. ނައިބު ރައީސަކީ ރައީސް ސޯލިހުގެ މެންބަރަކަށް ކޮމިޝަންގައި އިންނަވާ މަސްތޫރު ހުސްނީ އެވެ. ބަންޑާރަ ނައިބު އިބްރާހީމް ރިފްއަތުގެ އިތުރަށް މަޖިލީހުގެ ރައީސްގެ ހައިސިއްޔަތުން މުހައްމަދު ނަޝީދު ވެސް އެ ކޮމިޝަންގައި އިންނަވަ އެވެ.
މީގެ ކުރިން، ކުރީގެ ރައީސް އަބްދުﷲ ޔާމީނުގެ ވެރިކަމުގައި އެއިރުގެ އިދިކޮޅު ލީޑަރުން ޖަލަށް ލުމުން، ކޮމިޝަނުގެ އެކުލެވުން ބަދަލުކޮށް ޖުޑިޝަރީ ރިފޯމުގެ އަޑުގަދަ ވެގެން ދިޔަ އެވެ. ނަމަވެސް މި ސަރުކާރު އައި ފަހުން ކޮމިޝަނުގެ އެކުލެވުން އެ ގޮތުގައި ބާއްވައި، ޔާމީނަށް ޖަލު އިއްވުމުން އެ ޝަރީއަތަށް އެ ނުފޫޒު ފޯރުވި ކަމަށް ޕީޕީއެމް/ޕީއެންސީން ބުނެ އެވެ.
