އެމްޑަބްލިއުއެސްސީ ދިވެހި ޕްރިމިއާ ލީގުގައި މިއަދު ހަވީރު ފަހު ވަގުތު މުހައްމަދު ނާއިމް ޖެހި ގޯލުން ޓީސީ ސްޕޯޓްސް ކްލަބް 1-0 އިން ބަލިކޮށް، ބުރު ސްޕޯޓްސް ކްލަބުން ޕްރިމިއާ ލީގުގައި ފުރަތަމަ މޮޅު ހޯދައިފި އެވެ.
މިދިޔަ އަހަރު ދެ ވަނަ ޑިވިޝަން ފުޓްބޯޅަ މުބާރާތުގެ ޗެމްޕިއަންކަން ހޯދައި، ކޮލިފިކޭޝަން ބުުރުގެ ގަދަ ދެ ޓީމުގެ ތެރޭގައި ހިމެނިގެން ފުރަތަމަ ޑިވިޝަނަށް ޕްރޮމޯޓްވި ބުރުން ރާއްޖޭގެ އެއް ވަނަ ޑިވިޝަނުގައި ކުޅުނު ފުރަތަމަ މުބާރާތަކީ ޕްރެޒިޑެންޓްސް ކަޕް އެވެ.
ޕްރެޒިޑެންޓްސް ކަޕްގައި ބުރުން ކުޅުނު ތިން މެޗުގެ ތެރެއިން ފުރަތަމަ މެޗުގައި ޓީސީ އަތުން ބަލިވި ނަމަވެސް ދެ ވަނަ މެޗުގައި އެންމެން ސިއްސުވާލުމަށް ފަހު، ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ބަލިކުރި އެވެ. އެކަމަކު، ޕްރެޒިޑެންޓްސް ކަޕް ސެމީ ފައިނަލުގައި 120 މިނިޓް ކުޅެގެން ކްލަބް އީގަލްސް އަތުން ބަލިވީ އެވެ.
ބުރުން ޕްރިމިއާ ލީގުގައި ކުޅުނު ފުރަތަމަ މެޗުން ވެސް ވަނީ އީގަލްސް އަތުން ބަލިވެފަ އެވެ. އެކަމަކު، މުހައްމަދު ނިޒާމް (ނިޒާމްބެ)ގެ ކޯޗުކަމުގައި ކުޅޭ ބުރުން ލީގުގައި ހޯދި ފުރަތަމަ މޮޅު މި ހާސިލްކުރީ ނިޒާމްބެ 2014 ވަނަ އަހަރު ފުރަތަމަ ޑިވިޝަަނަށް ޕްރޮމޯޓްކޮށްދިން ޓީސީ އަތުންނެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި ފެނިގެންދިޔަ ހަމައެކަނި ގޯލު މެޗުގެ 90 މިނިޓް ހަމަވެގެން ކުޅުނު އިތުރު ވަގުތުގެ ދެ ވަނަ މިނިޓްގައި ކާމިޔާބުކުރީ ނާއިމް އެވެ. ކުރިން އީގަލްސް އަށް ކުޅުނު ނާއިމް އަށް އޭރިއާބޭރުން ލިބުނު ބޯޅައިން އޭނާ ފޮނުވާލި ޝޮޓް ހުއްޓުވަން ޓީސީގެ ސްރީ ލަންކާ ގޯލްކީޕަރު ސުޖަން ޕެރޭރާ މަސައްކަތް ކުރި ނަމަވެސް އަތްކައިރިން ގޮސް ބޯޅަ އަމާޒުވީ ގޯލުގެ ދުރު ކަނަށެެވެ.
މި މެޗު 90 މިނިޓް ތެރޭގައި ދެ ޓީމަށް ވެސް ގޯލު ޖަހާނެ ފުރުސަތުތަަކެއް ލިބިގެންދިޔަ ނަމަވެސް ބޭނުމެއް ނުކުރެވުނެވެ.
ލީގުގައި މިރޭ ކުޅޭ މެޗުގައި ކްލަބް ވެލެންސިއާ ބައްދަލުކުރާނީ އީގަލްސްއާ އެވެ. މެޗު ފަށާނީ 9 ޖަހާއިރު އެވެ.
