ނޭޕްލްސް (މާޗް 4) - އިޓާލިއަން ލީގުގެ އެއް ވަނައިގައި ބޮޑު ލީޑަކާ އެކު އޮތް ނަޕޯލީން 1-0 އިން ލާޒިއޯ އަތުން ބަލިވެ، ލީގު ސީޒަނުގައި ދެ ވަަނަ ފަހަރަށް ނާކާމިޔާބީއާ ކުރިމަތިލާން ޖެހިއްޖެ އެވެ.

މި ނަތީޖާއާ އެކު ލާޒިއޯ ވަނީ ދެ ވަނަ އަށް ޖެހިލައިފަ އެވެ. އެ ގޮތުން، ލާޒިއޯ މި ވަގުތު ދެ ވަނައިގައި އޮތީ އެެއް ވަނައިގައި އޮތް ނަޕޯލީ އަށް ވުރެ 17 ޕޮއިންޓް ފަހަތުގަ އެވެ. ނަޕޯލީ އަށް 25 މެޗުން 65 ޕޮއިންޓް ލިބިފައިވާއިރު، ލާޒިއޯ އަށް 25 މެޗުން ހަމަކުރެވުނީ 48 ޕޮއިންޓެވެ.

ނޭޕްލްސްގެ ޑިއޭގޯ މަރަޑޯނާ ސްޓޭޑިއަމްގައި ރޭ ކުޅުނު މެޗުގައި ލާޒިއޯ އިން ލީޑުނަގަން ލުއިޒް އަލްބާޓޯ ނެގި ހިލޭ ޖެހުމަކުން މަޓިއަސް ވެސީނޯ ބޮލުން ޖެހި ބޯޅަ ގޯލު ރޮނގުމަތިން ސަލާމަތްކުރީ ނަޕޯލީގެ ކެޕްޓަން، ޑީ ލޮރެންޒޯ އެވެ. މެޗުގެ 15 ވަނަ މިނިޓްގައި ނަޕޯލީގެ ޕިއޮޓްރޭ ޒިއެލިންސްކީ ޖެހި ބޯޅަައިގައި މާ ބޮޑު ބާރެއް ނެތްއިރު، ލާޒިއޯ ކީޕަރު އިވާން ޕްރޮވެޑެލް ވަނީ ފަސޭހައިން އަތަށް ނަގައިފަ އެވެ.

މެޗުގައި ލާޒިއޯ އިން ޖެހި ހަމައެކަނި ލަނޑު މެޗުގެ 66 ވަނަ މިނިޓްގައި ޖެހީ ވެސީނޯ އެވެ. އޭރިއާބޭރުން ވެސީނޯ ފޮނުވާލި ބާރު ބޯޅަ ނަޕޯލީ ކީޕަރު އަލެކްސް މެރެޓް އަށް ހުއްޓުވޭނެ ގޮތެއް ނެތެވެ. ނަތީޖާ ހަމަހަމަ ކުރަން ނަޕޯލީން ކުރި ގިނަ މަސައްކަތްތަކެއް ކާމިޔާބުނުވެ ދިޔައިރު، އިތުރު ވަގުތުގައި ލާޒިއޯ އަށް ދެ ވަނަ ލަނޑެއް ޖަހައިދޭން ސާގޭ މިލިންކޮވިޗް ސަވިޗް ޖެހި ބޯޅަ ބޭރުވީ ހުރަސްދަނޑީގައި ޖެހިފަ އެވެ.

މިއީ ނަޕޯލީ މި ސީޒަނުގައި ލީގުގައި ބަލިވި ދެ ވަނަ މެޗެވެ. އަދި މިދިޔަ އަހަރުގެ އޭޕްރިލް މަހުގެ ފަހުން އަމިއްލަ ދަނޑުގަައި ލީގުގެ މެޗެއްގައި ބަލިވި ފުރަތަމަ ފަހަރެވެ. ނަޕޯލީން މި ފަހަރު މަސައްކަތް މި ކުރަނީ 1990 ވަނަ އަހަރަށް ފަހު ފުރަތަމަ ފަހަރަށް ލީގު ޗެމްޕިއަންކަން ހޯދުމަށެވެ.