ލިޒްބަން (ޖެނުއަރީ 9) - މި ފަހަރުގެ ފީފާ ވޯލްޑް ކަޕް ފުޓްބޯޅަ މުބާރާތުގައި ބެލްޖިއަމްގެ ދަށް ނަތީޖާތަކުގެ ސަބަބުން އެ ޓީމުގެ ކޯޗުކަމުން އިސްތިއުފާ ދިން، ސްޕެއިނުގެ ރޮބާޓޯ މާޓީނޭޒް، މިއަދު، ޕޯޗުުގަލްގެ ކޯޗުކަމާ ހަވާލުވެއްޖެ އެވެ.

މާޓީނޭޒް، 49، ބެލްޖިއަމްގެ ކޯޗުކަމުން މި ފަހަރު ވަކިވީ އެ ޓީމު ވޯލްޑް ކަޕްގެ ގްރޫޕް ސްޓޭޖުން ކެޓުމުންނެވެ.

ވޯލްޑް ކަޕްގެ ގްރޫޕް އެފްގައި ބެލްޖިއަމް ހިމެނުނުއިރު، އެ ގްރޫޕްގެ އެއް ވަނަ މޮރޮކޯ އަށް ލިބުނީ ހަތް ޕޮއިންޓާ އެކު އެވެ. އެންމެ ފަހުން ބޭއްވި ވޯލްޑް ކަޕްގެ ރަނަރަޕް ކްރޮއޭޝިއާ މި ގްރޫޕްގެ ދެ ވަނަ ހޯދީ ފަސް ޕޮއިންޓާ އެކު އެވެ. މި ގްރޫޕްގެ ތިން ވަނައިގައި ނިންމި، ބެލްޖިއަމް އަށް ލިބުނީ ހަތަރު ޕޮއިންޓެވެ. މި ގްރޫޕްގެ ފުލުގައި ނިންމި ކެނަޑާ އަށް ޕޮއިންޓެއް ވެސް ނުލިބި އެވެ.

ބެލްޖިއަމްގެ ކޯޗުކަމުން ހަ އަހަރު ފަހުން ވަކިވި މާޓީނޭޒް، ޕޯޗުގަލްގެ ކޯޗުކަމުގެ ޒިންމާއާ ހަވާލުވީ ހަތަރު އަހަރުގެ ކޮންޓްރެކްޓެއްގަ އެވެ. އެންމެ ފަހުން ޕޯޗުގަލްގެ ކޯޗަކަށް ހުރި ފެނާންޑޯ ސަންޓޯސް، މަގާމުން ވަކިވީ އަށް އަހަރު ފަހުންނެވެ.

ޕޯޗުގަލްގެ ކޯޗުކަމާ ހަވާލުވެ، މާޓީނޭޒް، މީޑިއާއާ ކުރިމަތިލިއިރު، އެންމެ ގިނަ ސުވާލު އަމާޒުވީ ދާދި ފަހުން، ސައުދީ އަރަބިއްޔާގެ އަލް ނަސްރަށް ސޮއިކުރި ކްރިސްޓިއާނޯ ރޮނާލްޑޯ، 37، އާ ބެހޭގޮތުންނެވެ. ވޯލްޑް ކަޕްގައި ޕޯޗުގަލް ކުޅުނު ފަހު ދެ މެޗުގައި ރޮނާލްޑޯ ބެންޗުގައި އިންއިރު، މިއީ އެ ޓީމުގެ ކޯޗަކަށް ހުރި ސަންޓޯސް މަގާމުން ވަކިވުމުގައި ޕްރެޝަރު ބޮޑުވި ސަބަބެކެވެ.

މާޓީނޭޒް ބުނީ އޭނާ ޕޯޗުގަލްގައި މަސައްކަތްކުރާއިރު، ނިންމުންތައް ނިންމާނީ ދަނޑުމަތީގައި ކުޅުންތެރިން ކުރާ މަސައްކަތަށް ބެލުމަށް ފަހު ކަމަށާއި، "އޮފީސް ތެރޭގައި އިނދެގެން ގޮތް ނިންމާ މީހަކަށް" ނުވާނެ ކަމަށެވެ.

ކުރިން ވިގަން އެތުލެޓިކް، ސްވަންސީ ސިޓީ އަދި އެވަޓަން އަށް ޕްރިމިއާ ލީގުގައި ކޯޗުކޮށްދިން މާޓީނޭޒް، ބެލްޖިއަމްގެ ޓީމާ ހަވާލުވީ 2016 ވަނަ އަހަރު އެވެ. އޭނާ ބެލްޖިއަމްގެ ކޮންޓްރެކްޓްގައި ހުރީ މި ފަހަރުގެ ވޯލްޑް ކަޕްގެ ނިޔަަލަށް ނަމަވެސް އޭނާގެ އެއްބަސްވުން އާ ކުރަން ދިޔައީ މަޝްވަރާ ކުރަމުންނެވެ. އެކަމަކު، ވޯލްޑް ކަޕްގެ މެޗުތަކުގައި ނަތީޖާ ނުކުތް ގޮތުންނާއި ޓީމު ތެރޭގެ މައްސަލަތައް ބޮންސުންލައި، ބެލްޖިއަމް މުބާރާތުން ކެޓުމާ އެކު މާޓީނޭޒްގެ ވަޒީފާ ގެއްލުނީ އެވެ.

ފީފާ ރޭންކިންގެ ގަދަ ފަސް ޓީމުގެ ތެރޭގައި މިދިޔަ އަށް ވަރަކަށް އަހަރު މަގާމު ދެމެހެއްޓި، ބެލްޖިއަމްއާ މާޓީނޭޒް ހަވާލުވެ، 2016 ވަނަ އަހަރުގެ ޔޫރޯގެ ސެމީ ފައިނަލާއި 2018 ވަނަ އަހަރުގެ ވޯލްޑް ކަޕްގެ އިތުރުން މިދިޔަ އަހަރުގެ ޔޫރޯގެ ކުއާޓާ ފައިނަލުގައި ވާދަކުރި އެވެ. ބެލްޖިއަމްގައި މާޓީނޭޒް ހުއްޓައި، އެ ޓީމު ވަނީ ތިން އަހަރެއްހާ ދުވަހު ފީފާ ރޭންކިންގެ އެއް ވަނަ މަގާމު ދަމަހައްޓައިފަ އެެވެ.