ލަންޑަން (ޑިސެމްބަރު 29) - އާސެނަލުން ހޯދަން މަސައްކަތް ކުރަމުން އަންނަ ޔޫކްރެއިންގެ ޝަކްޓާ ޑޮނެސްކަށް މިޑްފިލްޑަރު މިކައިލޯ މުޑްރިކް ވިއްކާލާނީ 100 މިލިއަން ޑޮލަރުގެ ބިޑެއް ލިބިގެން ކަމަށް ޝަކްޓާ އިން ބުނެފި އެވެ.
މުޑްރިކަކީ ޖެނުއަރީ ޓްރާންސްފާގައި އާސެނަލުން ހޯދަން އެންމެ ބޮޑަށް މަސައްކަތް ކުރަމުން އަންނަ ކުޅުންތެރިޔާ އެވެ. ފީފާ ވޯލްޑް ކަޕަށް ޕްރިމިއާ ލީގުގެ ކުޅުން މެދުކަނޑާލުމުގެ ކުރިން ވެސް އާސެނަލުން އައީ މުޑްރިކާ ގުޅޭ މަޝްވަރާތަށް ކުރަމުންނެވެ.
މުޑްރިކް ހޯދުމަށް އާސެނަލުން މި ހަފްތާގައި ވަނީ 60 މިލިއަން ޔޫރޯ (60 މިލިއަން ޑޮލަރު)ގެ ބިޑެއް ކޮށްފަ އެވެ. ނަމަވެސް ޝަކްޓާ އިން ވަނީ އެ ބިޑަށް ނޫނެކޭ ބުނެފަ އެވެ.
އެކުލަބުގެ އެސިސްޓަންޓް ސްޕޯޓިން ޑިރެކްޓަރު ކާލޯ ނިކޮލީނީ ވަނީ މުޑްރިކް ގަތުމަށް މަދުވެގެން 100 މިލިއަން ޑޮލަރު ހޭދަކުރަން ޖެހޭނެ ކަމަށް ބުނެފަ އެވެ. ނިކޮލީނީ ބުނީ މުޑްރިކަކީ ޖެކް ގްރީލިޝް އާއި އެންޓޮނީ ކަހަލަ މޮޅު ކުޅުންތެރިއެއް ކަމަށާއި މުޑްރިކް ވިއްކާލެވޭނީ އެ ވަރުގެ ބިޑެއް ލިބިގެން ކަމަށެވެ.
"60 މިލިއަން ޔޫރޯ އަކީ އެއްވެސް އެއްޗެއް ނޫން. މަދުވެގެން 100 މިލިއަން ޔޫރޯ ލިބެންޖެހޭ. އަހަރެން ގަބޫލުކުރާ ގޮތުގައި މުޑްރިކަކީ ގްރީލިޝް އާއި އޮންޓޮނީ ފެންވަރުގެ ކުޅުންތެރިއެއް. 100 މިލިއަނާ ގާތް އަގެއް ނުލިބެނީސް އަހަރުމެން އެއްވެސް ވަރަކަށް ކުޅުންތެރިޔާ ވިސްނުމާ ގުޅޭ މަޝްވަރާ ވެސް ނުކުރާނަން." ޔޫކްރެއިންގެ ޗެމްޕިއަން، ޝަކްޓާގެ އޮފިޝަލް ބުންޏެވެ.
ބެލެވޭ ގޮތުގައި މި ހަފްތާ ބަންދުގެ ކުރިން އާސެނަލުން އާ ބިޑެއް މުޑްރިކް ހޯދުމަށް ހުށަހަޅާނެ އެވެ. ނަމަވެސް އެ ބިޑަކީ ވެސް 100 މިލިއަން ޑޮލަރާ ގާތްކުރާ ވަރުގެ ބިޑަކަށް ވާނެކަމަށް ނުބެލެވެ އެވެ.
އާސެނަލްގެ ކޯޗު މިކޭލް އާޓެޓާ ބޭނުންވަނީ އެ ކުލަބުން ބޭނުންވާ ކުޅުންތެރިން ވީހާ ވެސް އަވަހަށް ޓީމާ ގުޅުމަށެވެ. ޓްރާންސްފާގެ ފަހު ދުވަސްތަކުގައި ކުޅުންތެރިން ގަތުމާ ގުޅޭގޮތުން މަޝްވަރާކުރަން އާޓެޓާ ބޭނުން ނުވެ އެވެ.
މުޑްރިކް، 21، އަމިއްލަ އަށް ހުރީ އާސެނަލް އަށް ބަދަލުވާން ބޭނުންވެފަ އެވެ. އޭނާގެ ސޯޝަލް މީޑީއާގައި އާސެނަލްގެ ޕޯސްޓުތައް ޝެއާ ކުރަމުން އަންނައިރު، އާސެނަލުން އެންމެ ފަހުން ލީގުގައި ވެސްޓް ހޭމް ޔުނައިޓެޑު އަތުން މޮޅުވި މެޗުގެ ބައެއް ވީޑިއޯތައް ވެސް އޭނާ ވަނީ އިންސްޓަގްރާމް ސްޓޯރީ އަށް ލައިފަ އެވެ.
މުޑްރިކްގެ އިތުރުން އާސެނަލުން ޓްރާންސްފާގައި އާ ފޯވާޑެއް ގަތުން ގާތެވެ. ސަބަބަކީ ވޯލްޑް ކަޕްގައި ކުޅެނިކޮށް އާސެނަލްގެ ބްރެޒިލް ފޯވާޑް ގެބްރިއެލް ޖީސޫސް އަށް އަނިޔާވުމެވެ. ޖީސޫސް އަށް ލިބުނު އަނިޔާގެ ސަބަބުން އޭނާގެ ކަކުލުގެ ސާޖަރީއެއް ހަދަން ޖެހުނުއިރު ފޯވާޑަށް އެނބުރި ކުޅުމުގެ ތެރެއަށް އާދެވެނޭކަމަށް ބެލެވެނީ ފެބްރުއަރީ ފަހުކޮޅުގަ އެވެ.
އާސެނަލް މި ވަގުތު އޮތީ އިނގިރޭސި ލީގު ތާވަލްގެ އެއް ވަނައިގަ އެވެ. ހަތަރު ޕޮއިންޓް ފަހަތުން ދެ ވަނައިގައި އޮތީ އެންމެ ފަހުގެ ޗެމްޕިއަން މެންޗެސްޓާ ސިޓީ އެވެ.
