ރޯމް، އިޓަލީ (ޑިސެމްބަރު 16) - އިޓަލީގެ ގިނަ ކުލަބުތަކަށް ކުޅެ އޭގެ ފަހުން ކޯޗެއްގެ ގޮތުގައިވެސް ހަރަކާތްތެރިވި ޔޫގޮސްލާވީއާގެ ކުރީގެ ތަރި ސިނީސާ މިހަލޮވިޗް މަރުވެއްޖެ އެވެ.
މިހަލޮވިޗް، 53، މަރުވީ 2019 ވަނަ އަހަރުން ފެށިގެން އޭނާ ފަރުވާ ހޯދަމުން އަންނަ ލޫކީމިއާ ބަލީގަ އެވެ. ލޫކިމިއާ ބަލީގެ ސަބަބުން މީގެ ކުރިން ހާލު ދެރަވެ، އެޑްމިޓްކުރަން ޖެހުނު މިހަލޮވިޗް މަރުވީ މިއަދު އިޓަލީގެ ރޯމްގެ ކްލިނިކެއްގައި އެމަޖެންސީގައި ފަރުވާ ދެމުން ދަނިކޮށެވެ.
މިހަލޮވިޗް އަކީ ޔޫގޮސްލާވިއާގެ ގައުމީ ޓީމަށް 1991 އިން ފެށިގެން 2003 އާއި ހަމައަށް ކުޅުނު ކުޅުންތެރިއެކެވެ. ގައުމީ ޓީމަށް 1998 ވަނަ އަހަރުގެ ވޯލްޑް ކަޕްގަ އާއި 2000ގެ ޔޫރޯގައިވެސް އޭނާ ކުޅުނެވެ.
2004 ވަނަ އަހަރު އިންޓަ މިލާނުގެ މެޗެއްގެ ތެރެއިން މިހަލޮވިޗް: އޭނާ އަކީ އިޓަލީގެ ގިނަ ކްލަބްތަކެއްގައި މޮޅަށް ކުޅެފައިވާ ކުޅުންތެރިއެއް.
މިޑްފިލްޑަރެއްގެ ގޮތުގައި އާންމުކޮށް ކުޅުނު ނަމަވެސް ޑިފެންސަށްވެސް މަދު މަދުން ކުޅޭ މިހަލޮވިޗްގެ ކުޅުމުގެ ކެރިއަރާއި ކޯޗިން ކެރިއަރުގެ ބޮޑުބައި ހޭދަކޮށްފައިވަނީ އިޓަލީގަ އެވެ. މިގޮތުން ކުޅުންތެރިއެއްގެ ގޮތުގައި އިޓަލީގެ އެންމެ ބޮޑެތި ކުލަބުތަކުގެ ތެރޭގައި ހިމެނޭ އޭއެސް ރޯމާ، ލާޒިއޯ، ސަމްޕްދޯރިއާ އަދި އިންޓަ މިލާނަށްވެސް އޭނާ ކުޅުނެވެ.
އިޓަލިއަން ލީގުގައި ހިލޭ ޖެހުންތަކުން އެންމެ ގިނަ ގޯލު ޖެހި ކުޅުންތެރިޔާގެ ރެކޯޑު އޮންނަ މިހަލޮވިޗް ވަނީ 2000 ވަނަ އަހަރުގެ އިޓަލިއަން ލީގު އެކުލަބަށް ހޯދައިދިނުމުގައި މުހިންމު ދައުރެއް އަދާކޮށްފަ އެވެ. އަދި 1999 ވަނަ އަހަރުގެ ޔުއެފާ ކަޕް ވިނާސް ކަޕްވެސް ލާޒިއޯ އިން ހޯދީ އޭނާގެ މޮޅު ކުޅުމާއިއެކުގަ އެވެ. ކުޅުމުގެ ކެރިއަރު 37 އަހަރުގައި އޭނާ ނިންމާލީ އިޓަލީގެ އިންޓަ މިލާންގަ އެވެ.
ކޯޗިން ކެރިއަރަށް ބަލާއިރު، އިޓަލީގެ މަޝްހޫރު ކޯޗު ރޮބާޓޯ މަންޗިނީގެ އެސިސްޓަންޓެއްގެ ގޮތުގައި ދެ އަހަރު މަސައްކަތްކުރުމަށް ފަހު އިޓަލީގެ ކުލަބު ބޮލޮންޔާގެ ހެޑް ކޯޗު ކަމާ 2008 ވަނަ އަހަރު ހަވާލުވި އެވެ. އޭގެ ފަހުން އިޓަލީގެ ފިއޮރެންޓީނާ އަށް އިރުޝާދުދިނެވެ.
މި އަހަރުގު އޮގަސްޓް މަހުގެ ތެރޭގައި މިހަލޮވިޗް ބޮލޯނިއާ މެޗެއްގެ ތެރެއިން.
ޔޫގޮސްލާވިއާ ބައިބައިވެ އުފެދުނު މިނިވަން ދައުލަތްތަކުގެ ތެރޭގައި ހިމެނޭ ސާބިއާގެ ގައުމީ ޓީމަށް 2012 އިން ފެށިގެން އެއް އަހަރު އޭނާ އިރުޝާދު ދިނެވެ. އޭގެ ފަހުން އަނެއްކާ ވެސް އިޓަލީގެ ކުލަބުތައް ކަމަށްވާ ސަމްޕްޑޯރިއާ، އޭސީ މިލާން، އަދި ޓޮރީނޯ އަށް އިރުޝާދުދިނެވެ.
ކޯޗިން ކެރިއަރުގައި ކުޑަ މަޑު ޖެހުމެއް އައީ 2019 ވަނަ އަހަރު މިހަލޮވިޗަށް ލޫކީމިއާ ބަލި ޖެހިފައިވާކަން އެނގުނު ހިސާބުންނެވެ. ނަމަވެސް އެ ބައްޔާ ހަނގުރާމަ ކުރަމުން އޭނަ ވަނީ ބޮލޯނިއާ ކޯޗުގެ ގޮތުގައި ތިން އަހަރު ހޭދަކޮށްފަ އެވެ. މި ސީޒަންގައި ބޮލޯނިއާގެ ނަތީޖާތައް ރަނގަޅު ނުވުމުން އޭނާ ކޯޗުކަމުން ވަކިކުރީ މިދިޔަ ސެޕްޓެމްބަރު މަހުގަ އެވެ.
ހިލޭޖެހުންތަކުން ގޯލު ޖެހުމުގައި ދުނިޔޭގައި އުފެދުނު އެންމެ މޮޅެތި ކުޅުންތެރިންގެ ތެރޭގައި ހިމެނޭ މިހަލޮވިޗް މަރުވުމާ އެކު އޭނާ އާއިއެކު ކުރިން ކުޅުނު ކުޅުންތެރިންނާއި، އިޓަލީގެ ކުލަބުތަކުން އަދި ފުޓްބޯޅައިގެ އެކި ލެޖެންޑުން އަންނަނީ ތައުޒިޔާގެ މެސެޖުތައް ފޮނުވަމުންނެވެ.
