ޓިއުރިން، އިޓަލީ (ސެޕްޓެމްބަރު 15) - އިޓާލިއަން ލީގުގައި ރޭ ރޯމާ އިން ޓޮރިނޯ އަތުން 2-0 އިން މޮޅުވެ، އެއް ވަނަ މަގާމު ދިފާއުކުރިއިރު، އިންޓަ މިލާނާއި ކޯމޯ އިން ކުޅުނު މެޗުތަކުން ވެސް މޮޅުވެއްޖެ އެވެ.
އެ ގޮތުން، އިންޓަ އިން ވަނީ ފޯރިގަދަ މެޗަކަށް ފަހު 5-3 އިން އުދިނޭޒީ ބަލިކޮށްފަ އެވެ. އަދި، ކޯމޯ އިން ވަނީ އަމިއްލަ ދަނޑުގައި ކުޅުނު މެޗުން 2-1 އިން ޕާމާގެ މައްޗަށް ކުރިހޯދައިފަ އެވެ.
ރޭގެ ނަތީޖާތަކަށް ފަހު އިޓާލިއަން ލީގުގެ އެއް ވަނައިގައި އޮތް ރޯމާ އާއި ދެ ވަނައިގައި އޮތް އެންމެ ފަހުގެ ޗެމްޕިއަން، އިންޓަ މިލާނަށް ވަނީ ހަަތަރު މެޗުން 12 ޕޮއިންޓް ލިބިފަ އެވެ. ތިން ވަނަައިގައި އޮތް ކޯމޯ އާއި ހަތަރެއްގައި އޮތް ލާޒިއޯ އަށް ވަނީ ހަތަރު މެޗުން 10 ޕޮއިންޓް ލިބިފަ އެވެ.
ޓޮރިނޯ ދަނޑުގައި ރޭ ކުޅުނު މެޗުގައި ރޯމާ އިން ލީޑުނަގަން ބުރަކޮށް މަަސައްކަތްކުރަން ޖެހުނެވެ. އެ ގޮތުން، ލަނޑެއް ޖެހޭތޯ ރޯމާ އިން ކުރަމުން އައި މަސައްކަތް ކާމިޔާބުވީ ފުރަތަމަ ހާފު ނިމެން ފަސް މިނިޓެއް ވެފައި ވަނިކޮށް ޑޮންޔެލް މާލެން އެވެ. ދެ ވަނަ ހާފުގެ ބޮޑުބައިގައި އެއް ގޯލުގެ ލީޑެއްގައި އޮތް ރޯމާ އިން ތިން ޕޮއިންޓް ކަށަވަރުކުރި ލަނޑު ޖެހީ އިތުރު ވަގުތުގެ ތިން ވަނަ މިނިޓްގަ އެވެ. މި ލަނޑު ޖެހީ ނިކޯލޯ ޕިސީލީ އެެވެ.
ސެސްކް ފަބްރެގަސްގެ ކޯޗުކަމުގައި ކުޅެމުން އަންނަ ކޯމޯ އިން މި ސީޒަން ފަށައިގެން ދައްކަމުން އަންނަ މޮޅު ކުޅުން ރޭގެ މެޗުގައި ޕާމާ ކައިރީގައި ވެސް ވަނީ ތަކުރާރުކޮށްފަ އެވެ. އެ ގޮތުން، މެޗުގެ 23 ވަނަ މިނިޓްގައި ނިކޯ ޕާޒް ދިން ބޯޅައަކުން ޖަކޯބޯ ރަމޯން ވަނީ ލަނޑެއް ޖަހައި ކޯމޯ އަށް ލީޑުނަގައިދީފަ އެވެ.
އެއް ލަނޑުގެ ލީޑަކާ އެކު، މެޗުގެ ކޮންޓްރޯލް ގެއްލުނަނުދީ ރަނގަޅު ކުޅުމެއް ދެއްކި ކޯމޯ އިން ދެ ވަނަ ލަނޑު ޖެހީ މެޗުގެ ފުރިހަަމަ ވަގުތު ހަމަވާން ހަތް މިނިޓަށް ވެފައި ވަނިކޮށެވެ. މިއީ، 83 ވަނަ މިނިޓްގައި މެކްސިމޯ ޕެރޯން ދިން ބޯޅައަކުން ބްރޫނޯ ކައިކީ ޖެހި ލަނޑެކެވެ. މެޗުގެ އިތުރު ވަގުތުގެ ތެރޭގައި ޕާމާގެ ޑޭވިޑް ރޮމޭރޯ ވަނީ އެ ޓީމަށް ލަނޑެއް ޖަހައިދީފަ އެވެ.
އިންޓަ ދަނޑުގައި ރޭ އުދިނޭޒީން 16 މިނިޓް ތެރޭ ދެ ލަނޑުގެ ލީޑެއް ނެގި އެވެ. އެ ގޮތުން، ނުވަ ވަނަ މިނިޓްގައި އުދިނޭޒީގެ ފުރަތަމަ ލަނޑު ޖޭމްސް އަބަންކްވާ ޖެހިއިރު، އޭގެ ހަތް މިނިޓް ފަހުން، ޔާގެން އެކެލެންކަމްޕް ވަނީ އެ ޓީމުގެ ލީޑުފުޅާކޮށްދީފަ އެވެ.
މެޗުގެ ފުރަތަމަ ހާފު ނިމުމުގެ ކުރިން އިންޓަ އިން އެއްވަރުކުރި އެވެ. އެ ގޮތުން، އެ ޓީމުގެ ލަނޑުތައް ޖެހީ 26 ވަނަ މިނިޓްގައި ކާލޯސް އަގުސްޓޯ އާއި 35 ވަނަ މިނިޓްގައި ނިކޯލޯ ބަރޭލާ އެެވެ. އަދި، ދެ ވަނަ ހާފު ފެށިގެން 12 މިނިޓް ތެރޭ މާކަސް ތުރާމް ވަނީ އިންޓަ ކޮޅަށް ނަތީޖާ އަނބުރާލައިދީފަ އެވެ.
މެޗުގެ 67 ވަނަ މިނިޓްގައި ޕިއޯ އެސްޕޮސީޓޯ ވަނީ ލަނޑު ޖަހައި އިންޓަ އަށް ލީޑުފުޅާކޮށްދީފަ އެވެ. އަދި، އޭގެ 11 މިނިޓް ފަހުން، އަންގެ ބޮނީ ވަނީ އިންޓަގެ ފަސް ވަނަ ލަނޑު ޖަހައިފަ އެވެ. މެޗުގެ އިތުރު ވަގުތުގެ ތެރޭގައި އުދިނޭޒީ އަށް މެޗުގެ ތިން ވަނަ ލަނޑު ޖަހައިދިނީ، އިދްރީސާ ގޭއި އެވެ.
