އުޑިން، އިޓަލީ (ސެޕްޓެމްބަރު 24) - ސައުދީ އަރަބިއްޔާގެ ޕްރޮފެޝަނަލް ފުޓްބޯލް ލީގު (ޕްރޯ ލީގު) އާއި އެމެރިކާގެ ލީގު، މޭޖަ ލީގު ސޮކާ (އެމްއެލްއެސް)ގެ ކްލަބްތަކުން ލިބިފައިވާ އޮފާތައް ދޫކޮށް، އޮސްޓްރިއާގެ ކެޕްޓަން، ޑޭވިޑް އަލަބާ އިޓާލިއަން ލީގުގެ އުދިނޭޒީ އަށް ބަދަލުވާން އެއްބަސްވެއްޖެ އެވެ.
ބަޔާން މިއުނިކަށް ކުރިން ކުޅުނު އުމުރުން 34 އަހަރުގެ އަލަބާ އެންމެ ފަހުން ހުރީ ރެއާލް މެޑްރިޑްގަ އެވެ. އެކަމަކު، ޖޫން 30 ވަނަ ދުވަހު ރެއާލާ އެކު އަލަބާ ހަދާފައި އޮތް އެންމެ ފަހުގެ އެއްބަސްވުމުގެ މުއްދަތު ވަނީ ހަމަވެފަ އެވެ. އާ ކޮންޓްރެކްޓެއް ނުދީ ރެއާލުން އަލަބާ ދޫކޮށްލަން ނިންމީ، އަނިޔާގެ ސަބަބުން މިދިޔަ ސީޒަންތަކުގައި އޭނާ އަށް ގިނަ މެޗުތަކެއް ގެއްލިފައިވާތީ އެވެ. އޭގެ ތެރޭގައި، 2023 ވަނަ އަހަރު ކަކުލަށް ލިބުނު އަނިޔާއަކާ ހެދި، 399 ދުވަސް ވަންދެން އަލަބާ ކުޅުމާ ދުރަށް ދާން ޖެހުނެވެ.
ރެއާލަށް ފަސް އަހަރު ކުޅެދިން އަލަބާ، އެ ކްލަބާ އެކު ހަދާފައި އޮތް އެއްބަސްވުން ހަމަވުމާ އެކު، އިތުރު އެއްބަސްވުމެއް ނުލިބޭތީވެ، އެހެން ޓީމުތަކާ މަޝްވަރާ ކުރި އެވެ. އޭގެ ތެރޭގައި، ސައުދީ ޕްރޯ ލީގުގެ އަލް ހިލާލް އާއި އަލް ގަދްސިއާ އަދި އަލް ނަސްރު ވެސް ހިމެނެ އެވެ. އަދި، އޭނާގެ ސޮއި ހޯދަން އެމްއެލްއެސްގެ އެލްއޭ ގެލެކްސީ އާއި މޮންޓްރެއާލް އަދި އިންޓަ މިއާމީން ވެސް މަސައްކަތް ކުރި އެވެ.
އެކަމަކު، ހުރިހާ އޮފާއެއް ދޫކޮށް އަލަބާ ނިންމީ، މި ވަގުތު އިޓާލިއަން ލީގުގެ 13 ވަނައިގައި އޮތް އުދިނޭޒީއާ ގުޅުމަށެވެ. ރިޕޯޓްތައް ބުނާގޮތުން، އަލަބާ ވަނީ އެ ޓީމުގެ މެޑިކަލް ޓެސްޓްތަކުގައި ވެސް ބައިވެރިވެފަ އެވެ.
އުދިނޭޒީއާ އެކު، އަލަބާ ސޮއިކުރަނީ އެއް ސީޒަނުގެ ކޮންޓްރެކްޓެއްގައި ކަމަށް ރިޕޯޓްތައް ބުނެ އެވެ. އަދި، މި ސީޒަނުގައި ވަކި ކަންތައްތަކެއް ހާސިލްކޮށްފިނަމަ، އަލަބާ އަށް އިތުރު އެއް އަހަރުގެ އެއްބަސްވުމެއް ދިނުމުގެ ވިސްނުން، އުދިނޭޒީން ގެންގުޅެ އެވެ.
ސީނިއާ ކެރިއަރު އޮސްޓްރިއާ ވިއެން އިން ފެށި އަލަބާ ވަނީ 2009 ވަނަ އަހަރު ބަޔާންގެ ދެ ވަނަ ޓީމާ ގުޅިފަ އެވެ. ބަޔާންގެ ސީނިއާ ޓީމަށް 2010 ވަނަ އަހަރު ކުޅެން ފެށި އަލަބާ ވަނީ 2021 ވަނަ އަހަރާ ހަމައަށް އެ ޓީމަށް ކުޅެފަ އެވެ. އަދި، މިދިޔަ ފަސް އަަހަރު ރެއާލްގައި ހޭދަކުރި އަލަބާ ވަނީ މި ފަހަރު، އެމެރިކާ، މެކްސިކޯ އަދި ކެނަޑާގައި ބޭއްވި ވޯލްޑް ކަޕްގައި ކުޅުނު އޮސްޓްރިއާ ސްކޮޑުގައި ހިމެނިފަ އެވެ.
