ޒިއުރިކް (ނޮވެމްބަރު 18) - ފީފާގެ ރައީސްގެ މަގާމަށް ކުރިމަތިލުމަށް ހުޅުވާލި މުއްދަތު ހަމަވިއިރު، ކުރިމަތިލާފައިވާ ހަމައެކަނި ކެންޑިޑޭޓަކީ، މިހާރުގެ ވެސް ރައީސް، ޖިއާނީ އިންފަންޓީނޯ ކަމަށްވާތީ އޭނާ ތިން ވަނަ ދައުރަަކަށް ފީފާގެ ރައީސްގެ މަގާމު ފުރުއްވާނެކަން ޔަގީންވެއްޖެ އެވެ.
ފީފާ އިން އިއްޔެ ބުނެފައިވަނީ މި އަހަރުގެ މާޗް މަހު ފީފާގެ ރައީސްގެ މަގާމަށް ކުރިމަތިލާން ހުޅުވާލި ފުރުސަތުގެ މުއްދަތު ހަމަވިއިރު، އެ މަގާމަށް ކުރިމަތިލާފައިވަނީ މިހާރު ވެސް އެ މަގާމު ފުރުއްވަމުން އަންނަ އިންފަންޓީނޯ އެކަނި ކަމަށެވެ.
އެހެންކަމުން، އަންނަ އަހަރުގެ މާޗް 16 ވަނަ ދުވަހު ރުވާންޑާގެ ކިގާލީގައި އޮންނަ ފީފާގެ 73 ވަނަ ކޮންގްރެސްގައި އެ ފެޑެރޭޝަނުގެ ރައީސަކަށް ތިން ވަނަ ދައުރަަކަށް އިންފަންޓީނޯ އިންތިހާބުވެވަޑައިގަންނަވާނެ ކަމަށް ފީފާ އިން ވަނީ ކަނޑައަޅައިފަ އެވެ.
ފީފާގެ ރައީސްގެ މަގާމަށް ޔުއެފާގެ ކުރީގެ ޖެނެރަލް ސެކްރެޓަރީ އިންފަންޓީނޯ، އެންމެ ފުރަތަމަ އިންތިހާބުވެވަޑައިގަތީ، ކޮރަޕްޝަނުގެ މައްސަލަތައް ބަލަން ފެށުމާ އެކު ފީފާގެ ކުރީގެ ރައީސް ސެޕް ބްލެޓާ 2015 ވަނަ އަހަރު އިސްތިއުފާ ދެއްވުމުން ބޭއްވި އިންތިހާބު ކާމިޔާބު ކުރައްވައިގެންނެވެ. ބްލެޓާ ވަނީ ފީފާގެ ރައީސްގެ މަގާމު 17 އަހަރު ވަންދެން ފުރުއްވައިފަ އެވެ. އިންފަންޓީނޯ ދެ ވަނަ ދައުރަކަށް އިންތިހާބުވެވަޑައިގަތީ 2019 ވަނަ އަހަރު އެވެ. އެ ފަހަރު ވެސް އިންފަންޓީނޯ އިންތިހާބުވެވަޑައިގަތީ، އިތުރު ކެންޑިޑޭޓެއް ވާދަނުކުރައްވާތީ ފަސޭހަކަމާ އެކު އެވެ.
ތިން ވަނަ ދައުރަކަށް އޭނާ އިންތިހާބުކުރަން ހަ ބައްރުގެ މެމްބަރު ގައުމުތަކުން ތާއީދުކޮށްދިނީތީވެ، އިންފަންޓީނޯ ވަނީ ފީފާގެ 200 އަށް ވުރެން ގިނަ މެމްބަރު ގައުުމުތަކަށް ޝުުކުރުއަދާކުރައްވައިފަ އެވެ.
"ކުރިއަށް އޮތް ހަަތަރު އަހަރު ވެސް ތި ހުރިހާ މެމްބަރު އެސޯސިއޭޝަނަކާ ގުޅިގެން ފުޓްބޯޅަ އަށް ބޭނުންވާ ބަދަލުތައް ގެނައުމުގެ މަސައްކަތުގައި ދެމިހުންނާނަން،" އިންފަންޓީނޯ ވިދާޅުވި އެވެ.
ސްވިޒަލެންޑުގެ ޔުނިވާސިޓީއެއްގެ އެޑްމިނިސްޓްރޭޓިވް ރޯލަކުން ފާހަގަވެ، އެ ޔުނިވާސިޓީގެ ސެކްރެޓަރީ ޖެނެރަލްގެ މަގާމުން މަސައްކަތް ފެށި އިންފަންޓީނޯ، ޔޫރަޕްގެ މައި ފުޓްބޯޅަ ޖަމިއްޔާ، ޔުއެފާއާ ގުޅުނީ 2000 ވަނަ އަހަރު އެވެ.
ޔުއެފާގެ ޑިރެކްޓާ އޮފް ލީގަލް އެފެއާޒްގެ މަގާމާއި ކްލަބް ލައިސަންސިން ޑިވިޝަންގައި މަސައްކަތް ކުރެއްވުމަށް ފަހު 2007 ވަނަ އަހަރު ޑެޕިއުޓީ ޖެނެރަލް ސެކްރެޓަރީގެ މަގާމު އިންފަންޓީނޯ އަށް ލިިބިވަޑައިގެންނެވި އެވެ.
އޭގެ ފަހުން، ޔުއެފާގެ ސެކްރެޓަރީ ޖެނެރަލްގެ މަގާމާ ހަވާލުވެވަޑައިގެން ޔުއެފާ ނޭޝަންސް ލީގު ތައާރަފް ކުރެއްވުމުގައި ވެސް އިސް މޭސްތިރިއަކީ ވެސް އިންފަންޓީނޯ އެވެ. އޭގެ އިތުރުން މިދިޔަ އަހަރު ޔޫރަޕްގެ ތަފާތު 12 ސަރަަހައްދެއްގައި ޔޫރޯ ފުޓްބޯޅަ މުބާރާތް ބޭއްވިއިރު، އެ މަސައްކަތް އެންމެ ފުރަތަމަ ޕްލޭން ކުރުމުގައި ވެސް އިންފަންޓީނޯގެ ހިއްސާ ބޮޑެވެ.
ފީފާގައި އިންފަންޓީނޯގެ ލީޑަޝިޕުން މިހާތަނަށް ކުރެއްވި މަސައްކަތުން ގިނަ ކަންތައްތަކެއް ވަނީ ބަދަލަކާ ދިމާލަށް މިސްރާބު ޖަހައިފަ އެވެ. އެ ގޮތުން، 2026 ވަނަ އަހަރުގެ ފީފާ ވޯލްޑް ކަޕްގައި 48 ގައުމު ވާދަކުރާނެ އެވެ. އަދި ފީފާ އިން އަންނަނީ ކްލަބް ވޯލްޑް ކަޕް ވެސް 24 ޓީމު ބައިވެރިވާ ފޯމެޓެއްގައި ފަށަން މަސައްކަތް ކުރަމުންނެވެ.
މީގެ އިތުރުން އަންހެން ފުޓްބޯޅަ ޑިވެލޮޕްކުރަން ގިނަ ޕްލޭންތަކެއް ހަދައި، އެ އަށް ވަނީ މަސައްކަތްތަކެއް ފަށައިފަ އެވެ.
