ކުރީގެ ރައީސް އަބްދުﷲ ޔާމީން އިސްވެ ހުންނަވައި ހިންގަވާ "އިންޑިއާ އައުޓް" ހަރަކާތް އެ ގޮތުގައި ހިންގިގެން ނުވާނެ ކަމަށާއި އެކަން ފުލުހުން ނުކުމެ ހުއްޓުވުމަށް ކުރީގެ ރައީސް މުހައްމަދު ނަޝީދު މިއަދު ގޮވާލައްވައިފި އެވެ.
އެމްޑީޕީގެ މާލޭ ދާއިރާތަކުގެ ރައީސުންނާ ބައްލުކުރަން ސަލްޓަން ޕާކުގައި ބޭއްވި ބައްދަލުވުމުގައި، އެ ޕާޓީގެ ރައީސްގެ ގޮތުގައި ވެސް ހުންނެވި ރައްޔިތުންގެ މަޖިލީހުގެ ރައީސް ނަޝީދު ވިދާޅުވީ "އިންޑިއާ އައުޓް ނުގޮވޭނެ" ކަމަށާއި އެއީ ރާއްޖެއަށް މަސްލަހަތު އޮތް ގޮތެއް ވެސް ނޫން ކަމަށެވެ.
އިންޑިއާ އައުޓް ނުގޮވޭނެ، ނުގޮވޭނެ. އެއީ ކަނޑައެޅިގެން ދިވެހިރާއްޖޭގެ މަސްލަހަތާ ހިލާފު ކަމެއް. ކަނޑައެޅިގެން މި ރާއްޖޭގެ އެކިއެކި ތަންތަނުގައި ގޮވުމަކުން ނުހިނގޭނެ،" ނަޝީދު ވިދާޅުވި އެވެ.
އެފަދަ ހަރަކާތްތަކަކީ ތަހުޒީބު އެއްވެސް ޑިމޮކްރަސީއެއްގައި ހިންގޭނެ ފަދަ ހަރަކާތެއް ނޫން ކަން ފާހަގަ ކުރައްވައި ނަޝީދު ވިދާޅުވީ ޔާމީންގެ ޓީޝާޓުގައި އިންޑިއާ އައުޓް ޖައްސަވައިގެން އެގޮތަށް ގޮވަން ނުކުމެވަޑައިގެނެވިގެން ނުވާނެ ކަމަށެވެ.
ރައީސް ޔާމީނަކަށް އިންޑިއާ އައުޓް ޖައްސަވައިގެނެއް ބޭރަށް ނުކުމެ ގޮވުމަކުންނެއް ނުހިންގެވޭނެ. އެއީ ދިވެހިރާއްޖޭގެ ފުލުހުން ނުކުމެ ހުއްޓަންޖެހޭނެ ކަމެއް،" ނަޝީދު ވިދާޅުވި އެވެ.
ރައީސް ޔާމީން މިނިވަން ވުމާ ގުޅިގެން ޑިސެމްބަރު 3 ވަނަ ދުވަހުގެ ރޭ ޕީޕީއެމް އިން ބޭއްވި ޖަލްސާގައި އެ މަނިކުފާނު ވިދާޅުވީ، ދިވެހިރާއްޖެއަކީ އިންޑިއާގެ ޓައުނެއް ނޫން ކަމަށާއި ރާއްޖޭގައި ތިބި އިންޑިއާ ސިފައިން ފައިބާން ޖެހޭނެ ކަމަށެވެ.
ޔާމީންގެ އެ ކެމްޕޭނަށް ނަޝީދު ފާޑު ވިދާޅުވެފައިވާއިރު، އެމްއެންޕީން އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ރައީސް ދަނގެތީ ދާއިރާގެ މެމްބަރު މުހައްމަދު ނާޒިމް ވިދާޅުވީ ގައުމީ ހަރަކާތެއްގެ ގޮތުގައި ކަމަށް ބުނެ އިދިކޮޅުން ކުރިއަށް ގެންދާ "އިންޑިއާ އައުޓް" ކެމްޕޭނަކީ ބޮޑު ޖަރީމާއެއް ކަމަށެވެ.
"މިއީ ވަކި ބޭފުޅަކު އެ ބޭފުޅަކު އެ ބޭފުޅެއްގެ ސަރުކާރުގަ ހިނގާފަ ހުރި އެކި ކަންކަން ފޮރުވައި މަތި އަޅަން ހިންގާ ކެމްޕޭނެއް،" ކުރީގެ ޑިފެންސް މިނިސްޓަރު ނާޒިމް ވިދާޅުވި އެވެ.
އިންޑިއާ އާއި ރާއްޖެއާ ދެމެދު އޮންނަ ގާތް ގުޅުމާމެދު ސުވާލު އުފައްދައި އެ ގުޅުމުގެ ސަބަބުން ރާއްޖޭގެ މިނިވަންކަމާއި އިސްތިގުލާލަށް ނުރައްކާވާކަމަށް ބުނެ ދޮގު މައުލޫމާތު ފަތުރާތީ ދިވެހި ސަރުކާރުން ވެސް ވަނީ ކަންބޮޑުވުން ފާޅުކޮށްފަ އެވެ.
އިންޑިއާއާއެކު މިހާރު ހަދާފައިވާ އެއްބަސްވުންތަކަށް ވާސިލުވުމުގެ އަސްލަކީ، ކުރީގެ ރައީސް އަބްދުﷲ ޔާމީންގެ ވެރިކަމުގައި 2016 ގައި އެކުލަވާލާފައިވާ އެކްޝަން ޕްލޭން ކަމާއި، އެ އެކްޝަން ޕްލޭންގައި ހިމެނޭ ކަންކަން ރާއްޖެއަށް މުހިންމު ކަމާއި ތަންފީޒުކުރުން ކުރިއަށް ގެންދިއުމަށް، ދެ ގައުމުގެ ބައްދުވުންތަކުގައި ކުރިން ފެށިގެން ވެސް އެދިފައިވާ ރައްޔިތުންގެ މަޖިލީހުގެ 241 ކޮމިޓީގައި ސިފައިން ވެސް އަދި އެ ކޮމިޓީގައި ތިއްބެވި އެމްޑީޕީގެ މެމްބަރުން ވިދާޅުވެފައިވެ އެވެ.
އެ އެއްބަސްވުންތަކުގެ ސަބަބުން ރާއްޖޭގެ ގައުމީ ސަލާމަތާއި މިނިވަން ކަމަށް އެއްވެސް ގެއްލުމެއް ނެތް ކަމަށް، އެމްޑީޕީގެ މެޖޯރިޓީ އޮތް ރައްޔިތުންގެ މަޖިލީހުން ވަނީ ފާސްކޮށްފަ އެވެ.
ރައީސް ޔާމީންގެ ވެރިކަމުގައި އިންޑިއާއާއެކު އޮތް ގުޅުން ހީނަރުވެ، ޗައިނާއާ ގުޅުން ބަދަހިކުރި އެވެ. މިހާރު ރައީސް އިބްރާހިމް މުހައްމަދު ސޯލިހުގެ ވެރިކަމުގައި ފެނިގެންދަނީ، ޗައިނާއާ ދުރުވެ، އިންޑިއާގެ ގުޅުން ވަރުގަދަކޮށްފައިވާ މަންޒަރެވެ.
