އިންޑިއާ ސަރުކާރުން ރާއްޖެއަށް ދޭން ނިންމާފައިވާ 500 މިލިއަން ޑޮލަރު ނުވަތަ 48.50 ބިލިއަން އިންޑިއަން ރޫޕީޒްގެ ކްރެޑިޓް ލައިން މިދިޔަ މަހުގެ 27 އިން ފެށިގެން އެކްޓިވްވެފައިވާ ކަމަށް ރިޒާވް ބޭންކް އޮފް އިންޑިއާ (އާރުބީއައި) އިން ބުދަ ދުވަހު ހާމަކޮށްފި އެވެ.
އާރުބީއައިއާ ހަވާލާދީ ރޮއިޓާސްގައި ވަނީ މި ކްރެޑިޓް ލައިން ބޭނުން ކުރަން ފެށުމާއެކީ، މި ފެސިލިޓީގެ ދަށުން ހިންގުމަށް ހަމަޖެހިފައިވާ ވަކިވަކި މަޝްރޫއުތަކަށް ބޭނުންވާ ފައިސާ ދޫކުރުމުގެ އެއްބަސްވުންތަކުގައި ސޮއިކުރުމުގެ މަގު ހުޅުވިފައިވާ ކަމަށެވެ.
އާރުބީއައިއިން ބުނީ މި ކްރެޑިޓް ލައިންގެ ދަށުން ހިންގާ ކޮންމެ މަޝްރޫއަކަށް މަދުވެގެން ފަސް ބިލިއަން އިންޑިއަން ރު ޕީޒްގެ އަގުހުރި ވަކިވަކި އެއްބަސްވުންތަކެއް ގާއިމުކުރަން ޖެހޭނެ ކަމަށެވެ. މިއީ ރާއްޖޭގެ ތަރައްގީގެ އެކި ދާއިރާތަކަށް އަމާޒުކޮށްގެން ދޫކުރާ ފައިސާކަން އެ ބޭންކުން ފާހަގަކުރެއެވެ.
ކްރެޑިޓް ލައިން އެއްބަސްވުމުގެ ދަށުން ފައިނޭންސް ކުރާ މަޝްރޫއުތަކަށް ބޭނުންވާ މުދަލާއި، މަސައްކަތްތެރިން އަދި ހިދުމަތްތަކުގެ މަދުވެގެން 75 އިންސައްތަ ހޯދަންވާނީ އިންޑިއާގެ ކުންފުނިތަކުން ނުވަތަ އެ ގައުމުގެ ސަޕްލަޔަރުންގެ އަތުންނެވެ. ބާކީ އޮތް 25 އިންސައްތަ މުދަލާއި ޚިދުމަތް އިންޑިއާއިން ބޭރުގެ އެހެން ގައުމުތަކުން ހޯދުމުގެ ފުރުސަތު މި އެއްބަސްވުމުގެ ދަށުން ލިބިގެންދާނެ އެވެ.
އާރުބީއައިން ވަނީ މި ކްރެޑިޓް ލައިންގެ ފައިސާ އެކްސްޕޯޓް ކުރުމުގެ މުއާމަލާތްތަކުގައި ދޭންޖެހޭ އެޖެންސީ ކޮމިޝަންތައް ދެއްކުމަށް ބޭނުން ނުކުރެވޭނެ ކަމަށް ބުނެފަ އެވެ. އެފަދަ ކޮމިޝަންތައް ދައްކަން ޖެހޭނީ އެކްސްޕޯޓް ކުރާ ފަރާތްތަކުގެ އަމިއްލަ ފައިސާއިންނެވެ.
މިއީ ތަރައްގީގެ އެކި މަޝްރޫއުތަކަށް އެހީތެރިވުމުގެ ގޮތުން އިންޑިއާގެ އެކްސްޕޯޓް އިމްޕޯޓް ބޭންކް މެދުވެރިކޮށް ދިނުމަށް މިދިޔަ އަހަރުގެ ޖުލައިގައި އިންޑިއާ ސަރުކާރުން އެއްބަސްވެފައިވާ މަޝްރޫއެކެވެ. މި ކަމަށް އެއްބަސްވީ ރައީސް މުހައްމަދު މުއިއްޒު އިންޑިއާއަށް ކުރައްވާ ދަތުރުގެ ތެރެއިންނެވެ.
ކުރީ ސަރުކާރުގައި ވެސް އިންޑިއާއިން ވަނީ ރާއްޖެއަށް 800 މިލިއަން ޑޮލަރުގެ ކްރެޑިޓު ފެސިލިޓީއެއް ދޫކޮށްފަ އެވެ. މިހެން ނަމަވެސް މި ޕްރޮޖެކްޓުގެ ތެރޭގައި ހިމެނޭ ގުޅީފަޅު ޕޯޓު އޭގެ ތެރެއިން އުނިކުރުމުން، މުޅި ފެސިލިޓީ އޮތީ އެއްކޮށް ބޭނުންނުކުރެވި އެެވެ.
