ރާއްޖޭގެ ބެޑްމިންޓަން ތާރީހުގައި ރޭ އަނެއްކާ ވެސް ފާތިމަތު ނަބާހާ މި ވަނީ ހާއްސަ ސޮފުހާއެއް ލިޔެފަ އެވެ. ނަބާހާ، ޖެހިގެހިގެން ދެ ވަނަ ގައުމީ މުބާރާތް ނިންމާލީ ފައިނަލުގައި ސައްތަ އިން ސައްތަ ރެކޯޑަކާ އެކު، ކުޅުނު ތިން ފައިނަލުގައި ވެސް ތަށި ހޯދައިގެންނެވެ.
ނަބާހާ ވަނީ 2019 ވަނަ އަހަރުގެ ގައުމީ ބެޑްމިންޓަން މުބާރާތުގެ ފުރަތަމަ ޑިވިޝަނުގެ އަންހެން ސިންގަލްސް، އަންހެން ޑަބަލްސް އަދި މިކްސް ޑަބަލްސް ޗެމްޕިއަންކަން ހޯދައިފަ އެވެ. މިިދިޔަ އަހަރު ކޮވިޑް-19ގެ ސަބަބުން ގައުމީ ބެޑްމިންޓަން މުބާރާތް ނުބާއްވަ އެވެ.
މި އަހަރު ބެޑްމިންޓަން މުބާރާތް ބޭއްވިއިރު، ނަބާހާ ހުއްޓުވޭނެ ކުޅުންތެރިއަކު ނުފެނުނެވެ. ކުރިން 2019 ވަނަ އަހަރު ހޯދި ކާމިޔާބީ އޭނާ މި ވަނީ އިތުބާރާ އެކު ނުކުމެ ތަކުރާރުކޮށްފަ އެވެ.
ނަބާހާ "އަދަދު" އަށް ބުނީ ވަރަށް ދުވަސްކޮށްފައި ރާއްޖޭގައި މުބާރާތެއް ކުޅެން ޖެހުމުން ކޮންމެ ވެސް ވަރަކަށް ހާސްވުމުގެ ކަންކަން ކުރިމަތިވި ކަމަށެވެ.
"ހާސްވިޔަސް މިދިޔަ ދެތިން މަސް ތެރޭގައި ކުރެވުނު މަސައްކަތުގެ ސަބަބުން އިތުބާރު އޮތް. އެހެންވެ، ކޮންފިޑެންސް އޮތް މި ފަހަރު ވެސް ތިން ތަށި ނެގޭނެ ކަމުގެ،" ނަބާހާ ބުންޏެވެ.
ފައިނަލަށް ފަހު ނަބާހާ އާއި ނަބީހާ ތަށިތައް ހިފައިގެން.-- ފޮޓޯ: ހުސެއިން ޝަޔާހު/ އަދަދު
އަންހެން ސިންގަލްސްގައި 2019 ވަަނަ އަހަރެކޭ އެއްގޮތަށް ނަބާހާ ވަނީ މި ފަަހަރުގެ ފައިނަލުގައި ވެސް އޭނާގެ އެއްމާބަނޑު ކޮއްކޮ، އައިމިނަތު ނަބީހާ ބަލިކޮށްފަ އެވެ. މިއީ ސިންގަލްސްގައި، ނަބާހާ ގައުމީ ޗެމްޕިއަންކަން ޖެހިޖެހިގެން ހޯދި ތިން ވަނަ ފަހަރެވެ.
އަންހެން ޑަބަލްސް އިން ނަބާހާ އާއި ނަބީހާގެ ޕެއާ އިން ތަށި ދިފާއުކުރީ ފައިނަލުގައި އައިމިނަތު ޝަހުރުނާޒް އާއި މައިސާ ފަތުުހުﷲގެ ޕެއާ ބަލިކުރުމަށް ފަހު އެވެ.
މިކްސް ޑަބަލްސްގައި ވެސް ނަބާހާގެ ޕާޓްނަރަކީ 2019 ވަަނަ އަހަރު އޭނާއާ އެކު ޕެއާކުރި ޒަޔާން ޒަކީ އެވެ. ޒަޔާން އާއި ނަބާހާގެ ޕެއާ އިން މި ފަހަރުގެ ފައިނަލުގައި މޮޅުވީ ހިޝާމް ލަތީފް އާއި މައިސާގެ ޕެއާއާ ވާދަކޮށެވެ.
މި ފަހަރު ޓޯކިޔޯގައި ބޭއްވި އޮލިމްޕިކްސްގައި ރާއްޖޭގެ ދިދަ އުފުލުމުގެ ޝަރަފް ހޯދި ނަބާހާގެ އެންމެ ބޮޑު ކާމިޔާބީ އަކީ 2019 ވަަނަ އަހަރު ޕާކިސްތާނުގައި ބޭއްވި ޔޮނެކްސް ސަންރައިސް ޕާކިސްތާން އިންޓަނޭޝަނަލް ސީރީސްގެ ޑަބަލްސް އިވެންޓުން ހޯދި ދެ ރަން މެޑަލް އެވެ. އެއީ ބެޑްމިންޓަން ދުނިޔޭގެ ފެޑެރޭޝަނުން ގަބޫލުކުރާ މުބާރާތަކުން ރާއްޖެ އަށް ލިބުނު ފުރަތަމަ ދެ ރަން މެޑަލެވެ. މީގެ އިތުރުން ވެސް ނަބާހާ ވަނީ ބައިނަލްއަގުވާމީ މުބާރާތްތަކުގައި މެޑަލްތަކެއް ހާސިލްކޮށްފަ އެވެ
