ސްރީ ލަންކާގައި މިއަދު ފަށާ މަހިންދަ ރާޖަޕަކްސަ ފޯ ނޭޝަންސް ފުޓްބޯޅަ މުބާރާތުގައި ރާއްޖޭގެ ގައުމީ ފުޓްބޯޅަ ޓީމުން މިރޭ ލަންކާއާ ދެކޮޅަށް ކުޅޭ މެޗުގެ ފަހު ޕްރެކްޓިސް (މެޗު ވޯމްއަޕް) ގިނަ އުނދަގޫތަކަކާ އެކު ކުރިއަށް ގެންގޮސްފި އެވެ.

ފޯ ނޭޝަންސް ކަޕްގައި ރާއްޖެ އާއި ލަންކާގެ އިތުރުން މި މުބާރާތުގައި ވާދަކުރަނީ ސީޝެލްސް އާއި ބަންގްލަދޭޝް އެވެ.

މިރޭ ލަންކާއާ ދެކޮޅަށް ކުޅޭ މެޗުގެ ކުރިން ގައުމީ ޓީމުގެ ފަހު ޕްރެކްޓިސްތައް ކުރިއަށްގެންދަން ހަމަޖައްސާފައި އޮތީ ލަންކާ ގަނޑިން ރޭ 8 އިން 9 އަށް ބެދަގާނާ ސަރަހައްދުގައި ހުންނަ އާޓިފިޝަލް ދަނޑުގަ އެވެ. އެކަމަކު، ދަނޑުގެ އެންމެ ލައިޓެއް މަސައްކަތްކުރާ މި ދަނޑުގައި ގައުމީ ޓީމަށް ޕްރެކްޓިސް ކުރެވުނީ ވިއްސަކަށް މިނިޓް ކަމަށް "އަދަދު" އަށް ވަނީ އެނގިފަ އެވެ.

ޓީމުގެ އޮފިޝަލަކު ރޭ "އަދަދު" އަށް ބުނީ ދަނޑު 8-9 އަށް ހަމަޖެހިފައިވީ ނަމަވެސް ދަނޑު ލިބުނުއިރު، 8:20 ވެއްޖެ ކަމަށެވެ. އަދި އެންމެ ލައިޓެއްގެ އަލީގައި ވެސް ޓްރެއިނިން ކުރިއަށް ގެންދިއުމުގެ ގަސްދުގައި ޓްރެއިނިން ފެށިއިރު، އޭގެ ފަނަރަ ވަރަކަށް މިނިޓް ފަހުން ދަނޑުގެ ލައިޓްތައް އެއްކޮށް ކަހަލަ ގޮތަކަށް ނިވުނު ކަމަށެެވެ. އަދި އަލުން ކުރިން ހުރި ވަރަށް ކަރަންޓް ލިބުނީ ވެސް އިރުކޮޅެއް ފަހުންނެވެ.

"ލަންކާ ފެޑެރޭޝަނުން ބުނީ ލައިޓްގެ މައްސަލަތަކެއް ހުރީ ކަމަށް. ގާތްގަނޑަކަށް 20 ވަރަކަށް މިނިޓް ޕްރެކްޓިސް ކޮށްލާފައި މާދަމާރޭ (މިރޭ)ގެ މެޗަށް މި ނުކުންނަން ޖެހެނީ." އޮފިޝަލް ބުންޏެވެ.

ގައުމީ ޓީމުން ރޭ ބޭއްވި ޕްރެކްޓިސް ސެޝަންގެ ތެރެއިން.--

މީގެ ކުރިން ވެސް ރާއްޖޭގެ ގައުމީ ފުޓްބޯޅަ ޓީމު ބޭރުގެ ބައެއް މުބާރާތްތައް ކުޅެން ގޮސް ތިބިއިރު ވެސް މި ކަހަލަ އެކި މައްސަލަތަކާ ވަނީ ކުރިމަތިލާން ޖެހިފަ އެވެ. އެ ގޮތުން ޓްރެއިނިން ދަނޑު ވަގުތަށް ނުލިބުމާއި ޓްރާންސްޕޯޓް މައްސަލަތައް ދިމާވުން ފަދަ އެކި ކަންކަން ކުރިމަތިވެ އެވެ.

ލަންކާ އާއި ރާއްޖެ ކުޅޭ މެޗު އޮންނާނީ މިރޭ ރާއްޖެ ގަޑިން 20:30 ގަ އެވެ. މި މެޗު ޝަރަފްވެރި ކޮށްދެއްވުމަށް ރާއްޖޭގެ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ލަންކާ އަށް ވަޑައިގަންނަވާނެ އެވެ.

ލަންކާގެ ފުޓްބޯޅަ ފެޑެރޭޝަނުން އެންމެ ފުރަތަމަ އިއުލާންކުރީ މިރޭ ލަންކާއާ ދެކޮޅަށް ކުޅޭ މެޗަށް ވަންނަ ދިވެހި ސަޕޯޓަރުންނަށް ޓިކެޓް ވިއްކުމަށް ހަމަޖެހިފައިވަނީ 5000 ލަންކާ ރުޕީސް (385 ރުފިޔާ) އަށް ކަމަށެވެ.

އެ މައްސަލައިގައި ގިނަ ދިވެހިންތަކެއް ނުރުހުން ފާޅުކޮށްފައިވަނިކޮށް، ޔޫތު މިނިސްޓަރު އަހުމަދު މަހުލޫފް ކުރެއްވި ޓްވީޓެއްގައި ވިދާޅުވީ ރައީސް އިބްރާހިމް މުހައްމަދު ސޯލިހުގެ އެދިވަޑައިގެންނެވުމުގެ މަތިން ލަންކާގެ ފުޓްބޯޅަ ފެޑެރޭޝަންގެ ރައީސް ޖޭސްވަރު އުމަރުއާ މަޝްވަރާ ކުރައްވާ ދިވެހިންނަށް އަގުހެޔޮކޮށް ޓިކެޓް ލިބޭނެ އިންތިޒާމް ހަމަޖައްސާފައިވާ ކަމަށެވެ.

މިނިސްޓަރު ވިދާޅުވީ ދިވެހިންނަށް 3000 ލަންކާ ރުޕީސް (231 ރުފިޔާ) އަށް ލަންކާ މެޗުގެ ޓިކެޓް ލިބޭނެ ކަމަށެވެ. ޓިކެޓް ވިއްކާނީ ވެކްސިން ދެ ޑޯޒު ޖަހާފައިވާ މިހުންނަށެެވެ. މެޗު ބަލަން ދިވެހިން ތިބެން ޖެހޭނީ ދަނޑުގައި އަވޭ ސަޕޯޓަރުންނަށް ހާއްސަކޮށްފައިވާ ސަރަހައްދުގަ އެވެ.

މިދިޔަ މަހު މާލޭގައި ބޭއްވި ސާފް ޗެމްޕިއަންޝިޕްގައި ރާއްޖޭން ވަނީ 1-0 އިން ލަންކާ ބަލިކޮށްފަ އެވެ.

ފީފާ ކަލަންޑަރަށް ފައްތައިގެން ކުޅޭ ފޯ ނޭޝަންސް ކަޕްގައި މިއަދު ހަވީރު ކުޅެން ނިންމާފައި އޮތް ބަންގްލަދޭޝާއި ސީޝެލްސް މެޗު ވަނީ ލަންކާގެ މޫސުން ގޯސްވުމުގެ ސަބަބުން މާދަމާ ހަވީރަށް ފަސްކޮށްފަ އެވެ.

ލަންކާ ފެޑެރޭޝަނުން ބުނީ ރާއްޖެ އާއި ލަންކާގެ މެޗު ޝެޑިއުލާ އެއްގޮތަށް ކުރިއަށްދާނެ ކަމަށެވެ.

ރާއްޖެ ކުޅޭ ދެ ވަނަ މެޗުގައި ބުރާސްފަތި ދުވަހު ހަވީރު ބައްދަލުކުރާނީ ބަންގްލަދޭޝްއާ އެވެ. އަދި ލީގު ބުރުގެ ފަހު މެޗުގައި ސީޝެލްސްއާ ދެކޮޅަށް ކުޅޭނީ 14 ވަނަ ދުވަހުގެރޭގަ އެވެ.