ސްރީ ލަންކާގައި މާދަމާ ފަށާގޮތަށް ހަމަޖެހިފައިވާ މަހިންދަ ރާޖަޕަކްސަ ޓްރޮފީ ފޯ ނޭޝަންސް ކަޕްގައި ލަންކާއާ ދެކޮޅަށް ރާއްޖެ ކުޅޭ މެޗަށް ދިވެހިންނަށް ޓިކެޓެއް ވިއްކާނީ 5000 ލަންކާ ރުޕީސް (385 ރުފިޔާ) އަށް ކަމަށް ލަންކާގެ ފުޓްބޯޅަ ފެޑެރޭޝަނުން އިއުލާން ކޮށްފި އެވެ.

ފޯ ނޭޝަންސް ކަޕްގައި ރާއްޖޭގެ ގައުމީ ޓީމު ކުޅޭ ފުރަތަމަ މެޗުގައި މާދަމާރޭ ލަންކާއާ ބައްދަލުކުރާނެ އެވެ. ދިވެހި ސަޕޯޓަރުންނަށް ޓިކެޓު ވިއްކަން ހަމަޖެހިފައިވަނީ ދެ ސަރަަހައްދަކުންނެވެ. އެއީ ކޮލަމްބޯގައި ހުންނަ ރާއްޖޭގެ އެމްބަސީންނާއި ދިވެހިންގެ ކޮމިއުނިޓީ ސެންޓަރުންނެވެ.

ޓިކެޓް ވިއްކާނީ ވެކްސިން ދެ ޑޯޒު ޖަހާފައިވާ މިހުންނަށެެވެ. މެޗު ބަލަން ދިވެހިން ތިބެން ޖެހޭނީ ދަނޑުގައި އަވޭ ސަޕޯޓަރުންނަށް ހާއްސަކޮށްފައިވާ ސަރަހައްދުގަ އެވެ.

ކޮވިޑްގެ ހާލަތްތަކުގެ ތެރޭގައި ފޯ ނޭޝަންސް ކަޕް ކުޅެން ޖެހޭއިރު، ލަންކާ ސަރުކާރުން ރާވާފައިވަނީ މެޗުތައް ކުޅޭ ރޭސްކޯސް ސްޓޭޑިއަމްގެ ޖާގައިގެ ދެބައިކުޅަ އެއް ބަޔަށް ސަޕޯޓަރުން ވައްދަން ކަމަށް މީގެ ކުރިން މަޝްވަރާ ކުރެވިފައިިވެ އެވެ.

ލަންކާގެ ފުޓްބޯޅަ ފެޑެރޭޝަނުން އާންމުކޮށްފައިވާ ޕޯސްޓް.

މުބާރާތްތަކުގައި އާންމުކޮށް ހޯމް ޓީމު ކުޅޭއިރު، އަވޭ ޓީމަށް ދޭނީ ކިތައް ޓިކެޓްކަން މުބާރާތުގެ ގަވާއިދުގައި ކަނޑައަޅާފައިވެ އެވެ. އާންމު އުސޫލުންނަމަ އަވޭ ޓީމަށް ލިބެނީ ދަނޑަށް މީހުންނަށް ވަދެވޭ ޖާގައިގެ 5-10 ޕަސެންޓް ޓިކެޓް އެވެ.

ލަންކާ ފެޑެރޭޝަނުން ދިވެހިންނަށް ހާއްސަކޮށް ވިއްކަން ހަމަޖެހިފައިވަނީ ކިތައް ޓިކެޓް ކަމެއް އަދި ރަސްމީކޮށް ހާމަކޮށްފައެއްނުވެ އެވެ. ލަންކާގެ ފެޑެރޭޝަނުގެ އިއުލާނުގައިވަނީ ޓިކެޓް ވިއްކާނީ އެންމެ އަވަހަށް އަންނަ މީހުންނަށް ކަމަށެވެ.

ޓިކެޓް ވިއްކަން ފަށާނީ ލަންކާގެ ގަޑިން މިއަދުގެ މެންދުރު ފަހު 15:00 އިން 18:00 އަށެވެ. އަދި މާދަމާ ޓިކެޓް ވިއްކާނީ ހެނދުނު 11 އިން 14:00 އަށް ކަމަށް އިއުލާނުގައިވެ އެވެ. ރާއްޖެ އާއި ލަންކާ ކުޅޭ މެޗު ޝެޑިއުލްކޮށްފައި އޮތީ މާދަމާރޭ ލަންކާ ގަޑިން 20:00 ޖަހާއިރު ކުޅޭ ގޮތަށެވެ. އެއީ ރާއްޖޭގެ ގަޑިން ރޭގަނޑު 19:30 ގަ އެވެ.

ލަންކާގެ ފުޓްބޯޅަ ފެޑެރޭޝަނުން ހަމަޖައްސާފައިވަނީ އެ ގައުމުގެ ސަޕޯޓަރުންނަށް ހާއްސަ އަގެއްގައި ޓިކެޓް ވިއްކުމަށެެވެ. އެ ގޮތުން ލަންކާގެ ސަޕޯޓަރުންނަށް 200 ރުޕީސް އަށް އެންމެ އަގުހެޔޮކޮށް ޓިކެޓް ލިބޭނެ އެވެ.