ގައުމީ ފުޓްބޯޅަ ޓީމުގެ ކޯޗުކަމާ އިޓަލީ ގައުމީ ޓީމާއި އިންޓަ މިލާނަށް ކުރިން ކުޅުނު ފްރެންޗެސްކޯ މޮރިއޭރޯ ހަވާލުވާން އެއްބަސްވެފައިވާ ކަމަށް އިޓަލީގެ މީޑިއާ ތަކުން ރިޕޯޓްކޮށްފި އެވެ.
އެފްއޭއެމުން ބުނީ މޮރިއޭރޯއާ އެކު މަޝްވަރާ ކުރެވޭ ކަމަށާއި ރަސްމީކޮށް އަދި އެއްބަސްވުމެއް ވެވިފައި ނުވާ ކަމަށެވެ.
އިޓަލީގެ މީޑިއާ ރިޕޯޓްތައް ބުނާގޮތުން މޮރިއޭރޯ ރާއްޖޭގެ ޓީމާ ހަވާލުވާނީ އެއް އަހަރުގެ ކޮންޓްރެކްޓެއްގަ އެވެ. ރާއްޖޭގެ ގައުމީ ޓީމާ ހަވާލުވެއްޖެނަމަ އެ ވެގެންދާނީ މޮރިއޭރޯ ގައުމީ ޓީމެއްގެ ބެންޗުން ފެންނާނެ ފުރަތަމަ ފަހަރަށެވެ.
އުމުރުން 52 އަހަރުގެ މޮރިއޭރޯ ކޯޗިން ކެރިއަރު ރަސްމީކޮށް ފެށީ 2006 ވަނަ އަހަރު އައިވަރީ ކޯސްޓްގެ ކްލަބް އެފްރިކާ ސްޕޯޓްސް އިންނެވެ. އިޓަލީގެ ދެ ވަނަ އަދި ތިން ވަނަ ޑިވިޝަނުގެ ގިނަ ކްލަބްތަކެއްގައި މަސައްކަތްކުރި މޮރިއޭރޯ ވަނީ އެ ޑިވިޝަންތަކުގެ މަޝްހޫރު ޓީމުތައް ކަމަށްވާ ފްރޮސިނޯނޭ އާއި ކްރޮޓޯނޭ އަށް ކޯޗުކޮށްދީފަ އެވެ. އޭނާ އެންމެ ފަހުން ހުރީ އަލްބޭނިއާގެ ކްލަބް ޑިނަމޯ ޓިރާނާގެ ކޯޗަކަށެެވެ.
މޮރިއޭރޯ އިންޓަ މިލާނަށް ކުޅުނުއިރު ބްރެޒިލްގެ ލެޖެންޑަރީ ފޯވާޑް ރޮނާލްޑޯއާ އެކު.
ކުޅުމުގެ ކެރިއަރަށް ބަލާނަމަ 1986 އިން 1992 އަށް މޮރިއޭރޯ ކުޅުނީ ލެޗޭ އަށެވެ. އޭގެ ފަހުން ދެ ސީޒަނުގައި ކަލިއަރީ އަށް ކުޅުމަށް ފަހު ދެން 1994 އިން 1997 އަށް މޮރިއޭރޯ ފެނުނީ ރޯމާ އިންނެވެ. މޮރިއޭރޯ، އިޓަލީގެ އޭރުގެ ގަދަބާރު އިންޓަ އަށް ބަދަލުވީ 1997 ވަނަ އަހަރު އެވެ. ބްރެޒިލްގެ ރޮނާލްޑޯ ނަޒާރިއޯއާ އެކު އިންޓަ އަށް ކުޅުނު މޮރިއޭރޯ އެ ޓީމުގައި ތިން އަހަރު ހުރުމަށް ފަހު ކެރިއަރު ނިންމާލުމުގެ ކުރިން ދެ ސީޒަނުގައި ނަޕޯލީ އަށް ވެސް ކުޅުނެވެ.
ސެޒާ މަލްޑިނީގެ ކޯޗުކަމުގައި އިޓަލީ ގައުމީ ޓީމުން ފުރުސަތު ހޯދި މޮރިއޭރޯ އަށް ގައުމީ ޓީމުން ކުޅުމުގެ ފުރުސަތު ލިބުނީ އަށް މެޗުގަ އެެވެ. އޭނާ ވަނީ ދެ ގޯލު ޖަހައިފަ އެވެ. އަނިޔާގެ ސަބަބުން މޮރިއޭރޯ އަށް އިޓަލީގެ ގިނަ މެޗުތަކުން ފުރުސަތު ނުލިބެ އެވެ.
މޮރިއޭރޯ ގައުމީ ޓީމާ ހަވާލުވެއްޖެނަމަ އޭނާ ވެގެންދާނީ މި އަހަރު ތެރޭގައި ގައުމީ ޓީމުގެ ހެޑް ކޯޗެއްގެ ގޮތުަގއި ފެންނާނެ ތިން ވަނަ ކޯޗަަށެވެ. އަދި މިދިޔަ ފަސް އަހަރަށް ބަލާނަމަ ގައުމީ ޓީމުން ފެންނާނެ ފަސް ހަ ވަނަ ކޯޗަށެވެ.
މިދިޔަ ޖޫން މަހު ވޯލްޑް ކަޕް ކޮލިފައިންގައި ގައުމީ ޓީމަށް ކޯޗުކޮށްދިނީ ނެދަލެންޑްސްގެ މާޓިން ކޫޕްމަން އެވެ. މި މަހު ރާއްޖޭގައި ނިމުނު ސާފް ޗެމްޕިއަންޝިޕްގައި ރާއްޖޭގެ ޓީމަށް އިރުޝާދުދިނީ ތަޖުރިބާކާރު ދިވެހި ކޯޗު އަލީ ސުޒޭން އެވެ.
ގައުމީ ޓީމާ ދެން ހަވާލުވާ ކޯޗެއްގެ ފުރަތަމަ މަަސައްކަތަށް ވާނީ އަންނަ މަހު 8-17 އަށް ލަންކާގައި ކުރިއަށްދާ މަހިންދުރަ ރާޖަޕަކްސަ ފޯ ނޭޝަންސް ކަޕް އެވެ. އެ އަށް ފަހު 2023 ވަނަ އަހަރުގެ އޭޝިއަން ކަޕަށް ރާއްޖެ ކޮލިފައި ކޮށްދިނުމުގެ ޓާގެޓްގައި ކޮލިފައިން މެޗުތަކަށް ނުކުންނަން ޖެހޭނީ އަންނަ އަހަރު ޖޫން މަހު އެވެ. އެ މެޗުތައް ކުޅޭނީ ސެންޓްރަލައިޒްކޮށް ކަމަށް ވަނީ ނިންމައިފަ އެވެ.
