ލަންޑަން (ނޮވެމްބަރު 7) - އިންގްލެންޑުން މި މަހު ކުޅޭ މެޗުތަކަށް އެ ޓީމުގެ ކޯޗު ތޯމަސް ޓުޗެލް ނެގި ސްކޮޑުން ޗެލްސީގެ ތަރި، ކޯލް ޕާމާ އަނެއްކާ ވެސް ބާކީކޮށްފި އެވެ.
އެމެރިކާ، މެކްސިކޯ އަދި ކެނަޑާގައި މި އަހަރުގެ ޖޫން/ޖުލައި މަހު ބޭއްވި ފީފާ ވޯލްްޑް ކަޕަށް ގެންދިޔަ ސްކޮޑުގައި ޕާމާ ނުހިމެނެ އެވެ.
އޭގެ ފަހުން، މި ފަހަރުގެ ސީޒަން ފަށައި، ޗެލްސީން އިނގިރޭސި ޕްރިމިއަ ލީގުގައި ކުޅުނު ފަސް މެޗުގައި ވެސް ޕާމާ ވަނީ ފުރަތަމަ އެގާރައިގައި ހިމެނި މޮޅު ކުޅުމެއް ދައްކައިފަ އެވެ. އެހެންވެ، މި ފަހަރުގެ ނޭޝަންސް ލީގުގެ މެޗުތަކަށް ޓުޗެލް ނެގި ސްކޮޑުގައި ވަނީ ޕާމާ ހިމަނައިފަ އެވެ. އެކަމަކު، ކުއްލި ގޮތަކަށް ފިޓްނަސް މައްސަލައެއްގައި، އުމުރުން 24 އަހަރުގެ ޕާމާ މި ވަނީ އިންގްލެންޑު ސްކޮޑުން ވަކިވެފަ އެވެ.
ޕާމާ އަށް އިންގްލެންޑަށް ނުކުޅެވެނީ ގިނަ ފުރުސަތުތަކެއް ގެއްލޭތީ
ޗެލްސީގެ ކޯލް ޕާމާ އަށް އިންގްލެންޑް ގައުމީ ޓީމުން ގިނަ ފުރުސަތުތަކެއް ގެއްލެނީ ފިޓްނަސް މައްސަލަތަކާ ހުރެ ކަމަށް ކޯޗު ތޯމަސް ޓުޗެލް ބުނެފިއެވެ. މިފަހަރުގެ ނޭޝަންސް ލީގު ސްކޮޑުން ޕާމާ ވަކިވީ އަނިޔާގެ މައްސަލަތަކެއް ހުރުމުން، ކްލަބުގެ އެހީތެރިކަމާއެކު ހާއްސަ ފިޓްނަސް ޕްލޭނެއް ފުރިހަމަކުރުމަށެވެ.
އެ ފަހަރު ޓުޗެލް ބުނެފައިވަނީ، ޕާމާ އަށް އިންގްލެންޑްގެ ޖާގަ ގެއްލެނީ ކުޅެލަން ލިބޭ ގިނަ ފުރުސަތުތަކެއް ގެއްލޭތީ ކަމަށެވެ. އަދި، އޭގެ ފަހުން، މި މަހުގެ މެޗުތަކަށް އިންގްލެންޑުން ނެގި ސްކޮޑުން ޕާމާ ބާކީކުރުމަށް ފަހު، ޓުޗެލް ބުނެފައިވަނީ "ގަޔާވާ ކުޅުން ދައްކަން" ޕާމާ އަށް ލިބުނު ފުރުސަތުތަކުގެ ބޭނުން ނުހިފުނު ކަމަށެވެ.
"ކުރިން އަހަރެމެން ގެންގުޅުނު ކުޅުންތެރިންނާ އެކުގައި ކުރެވުނު މަސައްކަތް ރަނގަޅުވީމަ އެ ކުޅުންތެރިންނާ އެކު ކުރިއަށްދާން މި ވިސްނީ،" ޕާމާ ނުނެގި ސަބަބު އިތުރަށް އޮޅުންފިލުވައިދެމުން ޓުޗެލް ބުންޏެވެ. "ކޮންމެ ކުޅުންތެރިއަކު ވެސް އިންގްލެންޑަށް ކުޅެން ބޭނުންވާނެ، މި ބުނަނީ ކޯލް (ޕާމާ) ވެސް ހިމަަަނައިގެން،"
ޒަބީ އަލޮންސޯގެ ކޯޗުކަމުގައި ޕާމާ އަންނަނީ މި ސީޒަނުގައި ރަނގަޅު ކުޅުމެއް ޗެލްސީގައި ދައްކަމުންނެވެ. އެ ގޮތުން ކުޅުނު 11 މެޗުން ފަސް ލަނޑު ޖަހައި، ތިން ލަނޑު ޖަހަން ފުރުސަތު ތަނަވަސްކޮށްދިނެވެ.
އިންގްލެންޑް ސްކޮޑުން މި ފަހަރު ވަނީ ފުލަމްގެ ޖޯޝް ކިންގް އާއި ބޮރޫޝިއާ ޑޯޓްމަންޑްގެ ޖޯބް ބެލިންހަމް އަށް ފުރުސަތު ދީފަ އެވެ. އުމުރުން 21 އަހަރުގެ ޖޯބް އަކީ އިންގްލެންޑްގެ ތަރި، ޖޫޑް ބެލިންހަމްގެ ކޮއްކޮ އެވެ. އެ ދެ ކުޅުންތެރިން އެކުގައި އިންގްލެންޑަަށް ކުޅެފިނަމަ އެ ވެގެންދާނީ ގެރީ ނެވިލް އާއި ފިލިޕް ނެވިލް އަށް ފަހު، އެކުގައި އިންގްލެންޑަށް ކުޅޭ ފުރަތަަމަ ދެބެންނަށެވެ.
މި ފަހަރުގެ އިންޓަނޭޝަނަލް ބްރޭކުގައި އިންގްލެންޑުން ނޭޝަންސް ލީގުގައި ކުޅޭނީ ކްރޮއޭޝިއާ އާއި ސްޕެއިންއާ އެވެ.
