ކޮވިޑުން ރައްކާތެރިވާން މާލެ ސަރަހައްދުގައި މިހާރު އަޅާފައިވާ ފިޔަވަޅުތަކަށް ހަފުތާއެއް ފަހުން ލުއިދޭން ވިސްނާނެ ކަމަށް ސަރުކާރުން މިއަދު ބުނެފި އެވެ.
މިދިޔަ މަހުގެ ތެރޭގައި ޕޮޒިޓިވްވާ އަދަދު އިންތިހާއަށް މަތިވުމުން ހަރުކަށި ފިޔަވަޅުތައް މެއި 26 އިން ދެ ހަފުތާއަށް ވަނީ އަޅައިފަ އެވެ. މި ފިޔަވަޅުތަކަށް ރައްޔިތުން އަމަލުކުރަމުން އަންނާތީ ބަލި ފެތުރުން ވަނީ ދަށްވާން ފަށައިފަ އެވެ.
ރައީސް އޮފީހުގައި ކުރިއަށްދާ ޕްރެސް ކޮންފަރެންސްގައި ރައީސް ވިދާޅުވީ ފިޔަވަޅުތަކުގެ ސަބަބުން ދަތިތައް ކުރިމަތިވި ނަމަވެސް ރައްޔިތުން އެއްބާރުލުން ދިން ކަމަށެވެ. އެކަމަކު ނިއު ނޯމަލްއަކަށް ދާން ޕޮޒިޓިވް އަދަދުތައް އަދިވެސް ދަށްކުރަން ޖެހޭ ކަމަށް ވިދާޅުވި އެވެ.
ރައީސް ވިދާޅުވި ގޮތުގައި ނިއު ނޯމަލްއަކަށް ދާން އިތުރު ހަފުތާއަކަށް ބަލާނެ އެވެ. އޭގެފަހުން ލުޔެއް ދެވެން އޮތް ނަމަ އެކަން ކުރާނެ ކަމަށް ވިދާޅުވި އެވެ.
މިފަހަރު ލުއިތައް ދޭނީ އެއްފަހަރަކާ ނޫން ކަމަށާއި ހާލަތު ރަނގަޅަވަމުންދާ ވަރެއްގެ މައްޗަށް ކަމަށް ރައީސް ވިދާޅުވި އެވެ.
މިދިޔަ މަހުގެ 26 އިން ފެށިގެން ހަރުކަށި ކޮށްފައިވާ ފިޔަވަޅުތައް
ހަވީރު 4:00 އިން ހެނދުނު 8:00 އަށް ކާފިއު.
ކާފިއު ނޫން ގަޑިތަކުގައި ވެސް ބޭރަށް ނުކުމެވޭނީ ފާސް އޮންނަ މީހުން.
ކޮންމެ ގޭބީސީއަކަށް ދޫކުރެވޭނީ ދެ ދަންފަޅިއަކަށް ބަހާލައިގެން ދެ ފާސް.
ކާފިއު ގަޑިތަކުގައި ޑެލިވަރީ ފިޔަވައި އެހެން ހިދުމަތެއް ދިނުން މަނާ.
ޑެލިވަރީ ހިދުމަތް ދެވޭނީ ހެނދުނު 6:00 އިން ދަންވަރު 12:00 އަށް
ކޮންސްޓްރަކްޝަން ސައިޓުތަކުގައި މަސައްކަތް ކުރުން ދެ ހަފްތާއަށް ހުއްޓާލުން.
ފާސް ނެތް މީހަކަށް ކަސްރަތު ކުރަން ބޭރަށް ނުކުތުން މަނާ.
ހުއްދަ ދޭ އަމިއްލަ އޮފީސްތައް ފިޔަވައި އެހެން ތަންތަން ބަންދުކުރުން.
އެ ބައްދަލުވުމުގައި ޑރ. ނަޒްލާ މުސްތަފާ ވިދާޅުވީ ލޮކްޑައުންގައި އަބަދު އޮތުމަކީ އުނދަގޫ ކަމެއް ކަމަށާއި އެހެން ވިޔަސް ލުއިތައް ދޭނީ ބެލެންސްކޮށް ކަމަށް ވިދާޅުވި އެވެ.
ކޮވިޑުގެ ހަތަރު ވަނަ ރާޅަކާ އެކު ރާއްޖޭގައި މި ބަލި ކޮންޓްރޯލުން ނެއްޓުނީ އެޕްރީލް މަހުގެ ތެރޭގައި ދިން ލުއިތަކުގެ ސަބަބުން ކަމަށް ރައީސް ސޯލިހް ވަނީ ވިދާޅުވެފަ އެވެ. މިއާ އެކު ބަލީގެ ހާލަތު ގޯސްވެ މިދިޔަ މަަސްވީ ރާއްޖޭގައި މިހާތަނަށް އެންމެ ގިނަ ބަޔަކު މި ބަލީގައި މަރުވި މަހަށެވެ.
