ބީނޯސް އޭރީސް (މެއި 21) – ކޮވިޑް-19 ގެ ނުރައްކާ ބޮޑުވެ އާޖެންޓީނާ ސަރުކާރުން އިއްޔެ މި މަހުގެ ނިޔަަލަށް އެ ގައުމު ލޮކްޑައުނަކަށް ދާން ނިންމުމާ އެކު އެ އަށް ބޯލެނބުމުގެ ގޮތުން އާޖެންޓީނާގެ ފުޓްބޯޅައިގެ ރަސްމީ ހުރިހާ ހަރަކާތްތައް ސަސްޕެންޑްކުރަން އާޖެންޓީނާ ފުޓްބޯލް އެސޯސިއޭޝަން (އޭއެފްއޭ) އިން ނިންމައިފި އެވެ.

އޭއެފްއޭ އިން މި މި ގޮތަށް ނިންމިއިރު، އާޖެންޓީނާގައި އަންނަ މަހު ފަށާ ދެކުނު އެމެރިކާގެ ފުޓްބޯޅަ މުބާރާތް ކޮޕަ އެމެރިކާ ފަށަން އޮތީ ތިން ހަފްތާ އަށް ވެފަ އެވެ. އާޖެންޓީނާއާ އެކު އަންނަ މަހުގެ 13 ވަނަ ދުވަހު ކޮޕަ އެމެރިކާ ހޯސްޓްކުރަން ހަމަޖެހިފައި އޮތް ކޮލަމްބިއާގައި މިހާރު އެ މުބާރާތް ނޯންނާނެ އެވެ. އެއީ ކޮވިޑްގެ ނުރައްކާ އެ ގައުމުގައިބ ވެސް ބޮޑުވެފައިވާއިރު، އެ ގައުމުގައި ކުރިއަށްދާ ހަޅުތާލުގެ ސަބަބުންނެވެ.

ކޮލަމްބިއާ އިން މި އަހަރު ފަހު ކޮޅަށް ކޮޕަ އެމެރިކާ ފަސްކުރަން ހުށަހެޅި އެވެ. އެެހެން ނަމަވެސް ދެކުނު އެމެރިކާގެ މައި ފުޓްބޯޅަ އިރާދާ ކޮންމެބޯލް އިން ނިންމީ އާޖެންޓީނާގައި އެކަނި ހޯސްޓްކުރަން ޖެހުނަސް މިހާރު އޮތް ޝެޑިއުލާ އެއްގޮތަށް ކުރިއަށްދާށެވެ.

މި މުބާރާތަކީ ހަގީގަތުގައި މިދިޔަ އަހަރަށް ތާވަލުކުރި މުބާރާތެއް ނަމަވެސް ކޮވިޑްގެ ހާލަތު އޮތްގޮތުން އޭރު ބޭއްވޭނެ އެއްގޮތެއް ވެސް ނުވި އެވެ. އަނެއްކާ މި އަހަރު ވެސް މުބާރާތް ބޭއްވިދާނެެތޯ މިހާރު ވަނީ ސުވާލު އުފެދިފަ އެވެ.

އޭއެފްއޭ އިން މިއަދު ނެރުނު ބަޔާނެއްގައި ބުނެފައިވަނީ ފުޓްބޯޅަ ހަރަކާތްތައް ސަސްޕެންޑް ކުރަން ނިންމީ މި މަހުގެ 30 ވަނަ ދުވަހުގެ ނިޔަލަށް ކަމަށެވެ. އާޖެންޓީނާ ސަރުކާރުން ނުވަ ދުވަހުގެ ލޮކްޑައުނެއް އިއުލާނުކުރީ އެ ގައުމުގައި ކޮވިޑްގެ ހާލަތު ވަރަށް ބޮޑަށް ގޯސްވުމުންނެވެ. އެ ގޮތުން މިދިޔަ ހަފްތާގައި ކޮންމެ ދުވަހަކު ކަހަލަ ގޮތަކަށް 20،000 އަށް ވުރެ ޕޮޒިޓިވް ކޭސް ފެނުނުއިރު، މުޅި ހަފްތާގައި ޖުމްލަ އެއްކޮށް މަރުވި މީހުންގެ އަދަދު 500 އަށް އަރަ އެވެ.

"ރައީސް އަލްބާޓޯ ފެނާންޑޭސްގެ އެންގުމާ އެއްގޮތަށް އަމަލުކުރުމުގެ ގޮތުން މިއަދުން ފެށިގެން މި މަހުގެ 30 އާ ހަމައަށް ރަސްމީ ހުރިހާ މުބާރާތެއްގެ މެޗުތައް ސަސްޕެންޑްކުރަން ނިންމައިފިން،" އޭއެފްއޭގެ ބަޔާނުގައިވެ އެވެ.

އާޖެންޓީނާ ސަރުކާރުން މިދިިޔަ ހަފްތާގައި ވަނީ ކޮޕަ އެމެރިކާ ޝެޑިއުލާ އެއްގޮތަށް ކުރިއަށް ގެންދަން ކުރެވެން ހުރި ހުރިހާ މަސައްކަތެއް ކުރާނެ ކަމަށް ބުނެފަ އެވެ.

މި މަހުގެ 30 ގެ ނިޔަލަށް އާޖެންޓީނާ ލޮކްޑައުނެއްގައި އޮތްއިރު، އަންނަ މަހު ތިން ވަނަ ދުވަހު ވޯލްޑް ކަޕް ކޮލިފައިންގައި ޗިލީއާ ދެކޮޅަށް އާޖެންޓީނާ ކުޅޭނެ އެވެ. އަދި ފަސް ދުވަސް ފަހުން ކޮލަމްބިއާއާ ބައްދަލުކުރަން އެ ގައުމަށް ދާން ޖެހޭ ގޮތަށް އޮތީ ޝެޑިއުލްކުރެވިފަ އެވެ.

ލޮކްޑައުނާ އެކު އާޖެންޓީނާ ފުޓްބޯޅައިގެ އިތުރުން އެ ގައުމުގައި މި މަސް ނިމުމުގެ ކުރިން ކުޅެން ރޭވިފައި އޮތް ދެކުނު އެމެރިކާގެ އެންމެ މަޝްހޫރު ކްލަބް ފުޓްބޯޅަ މުބާރާތް ކޮޕާ ލިބެޓެޑޯރެސް މެޗުތައް ވެސް ޖެހޭނީ ފަސްކުރާށެވެ. ފުޓްބޯޅަ މެޗުތައް ކުޅުމުގެ ހުއްދަ ނެތަސް ހަރުކަށި ޕްރޮޓޮކޯލެއްގެ ތެރެއިން ޓީމުތަކަށް ޓްރެއިނިން ކުރިއަށްގެންދެވޭނެ އެވެ.