ޓެކްނޯ ސާފް ޗެމްޕިއަންޝިޕް 2026 ގެ ފައިނަލުގައި އިންޑިއާއާ ދެކޮޅަށް ނުކުންނައިރު، އެ ޓީމު ބަލިކުރަން ޕާކިސްތާނަށް އެނގޭނެ ކަމަށް އެ ޓީމުގެ ކޯޗު ޕެރޫގެ ނޮލްބާޓޯ ސޮލާނޯ ބުނެފި އެވެ.
މި ފަހަރުގެ ސާފް ޗެމްޕިއަންޝިޕްގައި ޕާކިސްތާނާއި އިންޑިއާ ވާދަކުރީ އެއް ގްރޫޕެއްގަ އެވެ. އެ ގޮތުން، ގްރޫޕް ސްޓޭޖުގެ ފުރަތަމަ މެޗުގައި އިންޑިއާ އިން ފުރަތަމަ ހާފުގައި ތިން ގޯލުގެ ލީޑެއް ނެގިއިރު، މެޗުގެ ދެ ވަނަ ހާފުގެ އިތުރު ވަގުތުގައި ޕާކިސްތާނުން ޖެހި ގޯލުތަކާ އެކު، އެ މެޗުން އިންޑިއާ މޮޅުވީ 3-2 އިންނެވެ.
ފައިނަލް މެޗަށް ނުކުންނައިރު، ޕާކިސްތާނަށް އޮތް އެންމެ ބޮޑު ހިތްހަަމަޖެހުމަކީ ގްރޫޕްް ސްޓޭޖުގެ މެޗުތައް ގެއްލުނު ޕާކިސްތާންގެ ފަސް ކުޅުންތެރިއަކު ސެމީން ފެށިގެން ޓީމާ ގުޅުމެވެ. އެއީ، ޔޫރަޕްގެ ކްލަބްތަކަށް ކުޅެމުން އަންނަ ކުޅުންތެރިންނެވެ. އެ ކުޅުންތެރިންގެ އެހީއާ އެކު، ޕާކިސްތާނުން ވަނީ ސެމީ ފައިނަލުގައި 1-0 އިން ބަންގްލަދޭޝް ބަލިކޮށްފަ އެވެ.
މިދިޔަ އަަހަރު ޕާކިސްތާންގެ ކޯޗުކަމާ ހަވާލުވެ، ރަނގަޅު މަސައްކަތްތަކެއް ކުރަމުން އަންނަ ސޮލާނޯ ބުނީ، އިންޑިއާ އަށް އިހުތިރާމް ކުރި ނަމަވެސް ފައިނަލް މެޗަކަށް ތައްޔާރުވާން ޖެހޭ ހުރިހާ ކަމަކަށް ވިސްނައިގެން މެޗަށް ކުރިމަތިލާނެ ކަމަށެވެ.
"އަހަރެމެން އަބަދުވެސް މި ދަނީ ބަލަމުން. މިއީ، ފުޓްބޯޅަ މީގެ ސިއްރަކުން މާ ގިނަ ކަމެއް ނުކުރެވޭނެ. އެ މީހުން ކުޅޭނެ ގޮތް އެނގޭ. އެކަމަކު، އެންމެ މުހިންމު ކަމަކީ އަަހަރެމެން އަމިއްލަ ކަންކަމާ މެދު ވިސްނައި އެ ރަނގަޅުކުރަން އިސްކަންދިނުން. އަހަރެމެންނަށް އެނގޭ އަހަރެމެންގެ ރަނގަޅު ކަންކަން، އަދި އޭގެއިން އިންޑިއާ އަށް ގެއްލުން ދެވޭނެ ގޮތް،" ސޮލާނޯ ބުންޏެވެ.
މިއީ، ޕާކިސްތާނުން ސާފް ޗެމްޕިއަންޝިޕެއްގެ ފައިނަލުގައި ކުޅޭ ފުރަތަމަ ފަހަރެވެ. އަނެއްކޮޅުން، އިންޑިއާ އިން މި ނުކުންނަނީ، 14 ވަނަ ސާފް ޗެމްޕިއަންޝިޕް ފައިނަލަށެވެ. އިންޑިއާ އިން ނުވަ ފަހަރަށް މި މުބާރާތުގެ ތަށި ވަނީ ހޯދައިފަ އެވެ.
ޕާކިސްތާނުން ވަނީ މި އަހަރު ބައިނަލްއަގުވާމީ މުބާރާތެއްގެ ތަށި ހޯދައިފަ އެވެ. އެއީ، މިދިޔަ ޖޫން މަހު، މާލޭގައި ބޭއްވި ރާއްޖޭގެ ފުޓްބޯޅަ އަށް 75 އަހަރު ފުރުމުގެ މުނާސަބަތުގައި ކުރިއަށްދިޔަ ޑައިމަންޑް ޖުބިލީ އިންޓަނޭޝަނަލް މުބާރާތެވެ.
ސޮލާނޯ ބުނީ، މި އަހަރު މިހާތަނަށް ޕާކިސްތާނުން ގިނަ އިންޓަނޭޝަނަލް މެޗުތަކެއް ކުޅެފައިވާއިރު، އޭގެ ތެރޭގައި ގިނައިން ހިމެނީ މުބާރާތުގެ މެޗުތައް ކަމަށެވެ. އަދި، ޑައިމަންޑް ޖުބިލީ މުބާރާތުގެ ކާމިޔާބީ އާއި އާސިއާން ކަޕްގައި ލިބުުނު ތަޖުރިބާ އިން ޓީމުގެ ހާލަތު ވަރަށް ރަނގަޅަށް ބަދަލުކުރެވިފައިވާ ކަމަށް ސޮލާނޯ ވަނީ ބުނެފަ އެވެ.
ބައިނަލްއަގުވާމީ ފުޓްބޯޅައިގައި އިންޑިއާ އާއި ޕާކިސްތާން 30 މެޗު ކުޅެފައިވެ އެެވެ. އިންޑިއާ އިން 17 މެޗުން މޮޅުވިއިރު، ޕާކިސްތާނަށް މޮޅުވެވުނީ ހަތަރު މެޗުންނެވެ. އަދި، ނުވަ މެޗެއް ނިމުނީ ދެ ޓީމު އެއްވަރުވެގެންނެވެ.
މި ފަހަރުގެ ސާފް ޗެމްޕިއަންޝިޕްގައި އިންޑިއާ އާއި ޕާކިސްތާން ބައްދަލުކުރާ މެޗު އޮތީ މިރޭ، 7 ޖަހާއިރު އެވެ.







