އަންނަ އަހަރަށް ލަފާކޮށް ހުށަހަޅާފައިވާ ދައުލަތުގެ ބަޖެޓަށް ވޯޓު ދެވޭނީ ރައްޔިތުންގެ ޖީބަށް ލުއި ވެ، ގައުމުގެ އިގްތިސާދު ކުރިއަރައިގެންދާ ގޮތަކަށް ބަލާފައި ކަމަށާއި، ގައުމު ދަރަނިވެރި ކުރުވާ ބަޖެޓަކަށް ވޯޓު ދީގެން ނުވާނެ ކަމަށް ހިތަދޫ އުތުރު ދާއިރާގެ މެންބަރު އަބްދުﷲ ސޯދިގު (ސޯބެ) ވިދާޅުވެއްޖެ އެވެ.
މިއަދު މަޖިލީހުަގައި ކުރިއަށްގެންދިޔަ ބަޖެޓު ބަހުސްގައި ވާހަކަ ދައްކަވަމުން ސޯބެ ވިދާޅުވީ، ސިއްހީ ދާއިރާއަށް 10.5 ބިލިއަން ރުފިޔާ ކަނޑައެޅިފައި އޮތް ނަމަވެސް، އާންމު ރައްޔިތުންނަށް ބޭނުންވާ އަސާސީ ބޭހާއި އިންޖެކްޝަންތައް ރާއްޖެއިން ލިބެން ނެތް ކަމަށެވެ. އަދި އައިނު ހައްދަން އިންޑިއާއިން ބޭފުޅުން ގެނައި ނަމަވެސް، އާސަންދައިގެ ދަށުންނާއި އަމިއްލައަށް ގަންނަންވެސް ރާއްޖެއިން ބޭނުންވާ ސާމާނު ނުލިބޭ ކަމަށް އޭނާ ވިދާޅުވި އެވެ.
"އަޅުގަނޑުގެ ދާއިރާގެ ހުސެންބެބެ އިހަށް ރޭ ވެސް ގުޅާފަ ބުނީ އަންހެނުން ދެ ދުވަހުން އެއް ދުވަހު ޑަޔަލިސިސް ހައްދަވާ އިރު އިންޖެކްޝަނާ ބޭސް ނުލިބޭ ވާހަކަ. އިންޑިޔާއިން އައިނު ގެނައީމަ އާސަންދަ އިން ގަންނާކަށް ވެސް ނުލިބޭ ރާއްޖެއަކުން،" ސޯބެ ވިދާޅުވި އެވެ.
ސޯބެ ވިދާޅުވީ, ބޮޑުތިލަދުންމަތީގެ ހޮސްޕިޓަލާއި އައްޑޫ ސިޓީގެ ޓާޝަރީ ހޮސްޕިޓަލުގެ ކެޕިޓަލް ހަރަދު 2.8 ބިލިއަން ރުފިޔާއިން 1.6 ބިލިއަނަށް ކުޑަކޮށްފައިވާކަމަ ށެވެ. އެގޮތުން 8.2 ބިލިއަން ރުފިޔާގެ ޕީއެސްއައިޕީ މަޝްރޫއުގައި ރަށްރަށުގެ ވަކިވަކި ޕްރޮޖެކްޓުތައް ހުރި މިންވަރާއި އެ މަޝްރޫއުތައް އުނިކުރި މަގުސަދަކީ ކޮބައިތޯއާއި، އައްޑޫ ލިންކު ރޯޑު ފުޅާކުރުމާއި މަގު ހެދުމުގެ ޒޯނަށް ކަނޑައެޅި ބަޖެޓުގެ އިތުރުން ގަން އިންޓަނޭޝަނަލް އެއާޕޯޓު ނިންމަން ބޭނުންވާ އަދަދު ބަޖެޓުގައި ހިމެނިފައި އެބައޮތްތޯ އޭނާ ސުވާލުކުރެއްވި އެވެ.
އޭގެ އިތުރުން ބަޖެޓުގެ 18.9 ބިލިއަން ރުފިޔާގެ ފައިނޭންސް ހޯދާނީ ކޮން އިދާރާތަކަކުންތޯއާއި، ކައުންސިލްތަކުގެ މުސާރައާއި އެލަވަންސް ބޮޑުވެފައިވާއިރު ކޮންޓިންޖެންސީ ބަޖެޓުން 10 ޕަސެންޓު ކައުންސިލްތަކަށް ކަނޑައަޅުއްވަން ކެރިވަޑައިނުގަންނަވާނީތޯ ވިދާޅުވެ ލިޔުމުން ޖަވާބު ހޯއްދެވުމަށް ސޯބެ ހުށަހެޅުއްވި އެވެ.
"މި ސުވާލުތަކަށް ލިޔުމުން ޖަވާބު ލިބިއްޖެއާމު އަޅުގަނޑު ދެވަނަ ވިސްނުމަކަށް ގޮސް ބަޖެޓަށް ތާއީދުކޮށް ވޯޓު ދޭން ވިސްނަފާނަން. އިއްޒަތްތެރި ރައީސް, އަޅުގަނޑުމެން މިތިބަ ރައްޔިތުންގެ މަންދޫބުން މި ބަޖެޓަށް ވޯޓު ދޭން ޖެހޭނީ ރައްޔިތުންނަށް ވާ ކަމަކަށް ބަލާފަ. ރާއްޖެ ދަރަނިވެރި ކުރުވާކަށެއް ނޫން،"
ސޯބެ އިތުރަށް ވިދާޅުވީ, ރައްޔިތުންގެ ޖީބަށް ލުއިވެ، އިގްތިސާދު ކުރިއަރައިގެންދާނެ ގޮތެއް މި ބަޖެޓުން ފެންނަން ނެތުމުން، މިހާރު އޮތް ގޮތަށް މި ބަޖެޓަކަށް ތާއީދު ނުކުރެއްވޭނެ ކަމަ ށެވެ. އަދި ރައްޔިތުންނަށް ފައިދާއެއް ނެތް މި ބަޖެޓަށް ވޯޓު ނުދިނުމަށް މަޖިލީހުގެ އެހެން މެންބަރުންނަށްވެސް އޭނާ ގޮވާލެއްވި އެވެ.








