މި ވަގުތު އަދާލަތު ޕާޓީގެ މެންބަރެއްގެ ގޮތުގައި އިތުރަށް ދެމިހުރުމަކީ ހިޔާނާތެއް ކަމަށް ދެކެވަޑައިގަންނަވާ ކަމަށް ވިދާޅުވެ، އެ ޕާޓީގެ ކުރީގެ އިސް ތަރުޖަމާނު އަދި ކުރީގެ ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރު އަދާލަތު ޕާޓީން ވަކިވެވަޑައިގެންފި އެވެ.
'އެކްސް' ގައި މިއަދު ކުރެއްވި ޕޯސްޓެއްގައި ނަޒީރު ވިދާޅުވީ، އަދާލަތު ޕާޓީގެ މެންބަރެއްގެ ގޮތުގައި އިތުރަށް ހުރުމަކީ ހިޔާނާތެއް ކަމަށް ފެނިވަޑައިގަންނަވާތީ ޕާޓީން ވަކިވެވަޑައިގެންފައިވާ ކަމަށެވެ.
ނަޒީރު ޕާޓީން ވަކިވެވަޑައިގެންނެވީ، އިޒްރޭލާ ގުޅުން އޮންނަ ޔޫއޭއީގެ މަހުޖަނު މުހައްމަދު އަލައްބާރަށް ވިއްކާލުމާ ދެކޮޅަށް ރައްޔިތުން ކަންބޮޑުވުން ފާޅުކުރަމުން ދަނިކޮށް، މި ސަރުކާރާ ވަގުތުން ގުޅުމަށާއި، 2028 ވަނަ އަހަރުގެ ރިޔާސީ އިންތިހާބުގައި މުއިއްޒުއަށް ތާއީދުކުރުމަށް ނިންމައި ކޯލިޝަން އެއްބަސްވުމެއްގައި ސޮއިކުރުމާ ގުޅިގެންނެވެ.
އަދާލަތު ޕާޓީން ސަރުކާރާއެކު އެ އެއްބަސްވުމުގައި ސޮއިކުރީ މި މަހުގެ 16 ވަނަ ދުވަހުއެވެ. ރައީސް މުޢިއްޒުގެ ސަރުކާރާއެކު ކޯލިޝަން ހެދުމަށް އަދާލަތު ޕާޓީގެ މަޝްވަރާ މަޖިލީހުން ފާސްކުރީ މި މަހުގެ 14 ވަނަ ދުވަހު ބޭއްވި ބައްދަލުވުމެއްގައެވެ.
އެ ނިންމުމަށްފަހު، އެ ޕާޓީގެ އެއް މުއައްސިސް ކަމަށްވާ ޝައިޚް ހުސައިން ރަޝީދު އަހުމަދުވެސް ވަނީ ޕާޓީގެ ލީޑަރުޝިޕަށް ފާޑުވިދާޅުވެ، އާންމު މެންބަރުން ޕާޓީން ވަކިވުމަށް ގޮވާލައްވާފަ އެވެ.







