ރަސްމާލޭގެ 500 ހެކްޓަރުގެ ބިން އިޒްރޭލާ ގުޅުން އޮންނަ ޔޫއޭއީގެ މަހުޖަނު މުހައްމަދު އަލައްބާރުގެ އީގަލް ހިލްސް ކުންފުންޏަށް ދޫކޮށްލުމަށް ރައީސް މުހައްމަދު މުއިއްޒު ނިންމަވާފައިވާ ނިންމެވުމާ، އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ފެށުނީއްސުރެ ދެކޮޅު ކަމަށާއި، އަދާލަތު ޕާޓީ (އޭޕީ) އާއެކު ކޯލިޝަން ހަދަން މުއިއްޒު ނިންމި މައިގަނޑު އެއް ސަބަބަކީ ޝަހީމް ސަރުކާރުން ވަކިވެދާނެކަމުގެ ބިރު އޮތުން ކަމަށް މަސްދަރުތަކުން ބުނެފި އެވެ.
އަދަދު ނޫހާ ވާހަކަ ދެއްކި އިތުބާރު ކުރެވޭ މަސްދަރުތަކުން ބުނި ގޮތުގައި، ރާއްޖޭން ބައެއް ބޭރު ބަޔަކަށް މިލްކުކޮށް ދިނުމާއި މިހާރު ރާވާފައިވާ ގޮތަށް ބިންތައް ދޫކުރުމަށް ޝަހީމް ވަނީ ކެބިނެޓުގައި ވެސް އަދި ސީދާ މުއިއްޒަށް ވެސް އޭނާގެ ސްޓޭންޑް ހާމަކުރައްވާފަ އެވެ.
"ޝަހީމް އެ ވާހަކަ ކެބިނެޓުގައި ދެއްކެވި. ރަސްމާލެ ވިއްކާލުމަށް ސޮއިކޮށްފި ނަމަ ޝަހީމު [ސަރުކާރުގައި] ނުހުންނާނެ، ޔަގީން ކުރައްވާ،" މައުލޫމާތު ދިން އެކަކު ބުންޏެވެ.
މަސްދަރުތަކުން އިތުރަށް ފާހަގަކުރި ގޮތުގައި، މިވަގުތު ޝަހީމް ސަރުކާރުގައި ހުންނެވި ނަމަވެސް، މި ދައުރު ނިމެންދެން އޭނާ ސަރުކާރުގައި ބަހައްޓަވާނެ ކަމަކަށް ނުބެލެވެ އެވެ. މިކަމާ ގުޅޭ ގޮތުން ޝަހީމްގެ ބަހެއް ހޯދުމަށް ރޭ ގުޅުމުން ފޯނަށް ޖަވާބެއް ނުދެއްވަ އެވެ. ނަމަވެސް މިކަމާ ގުޅޭ ގޮތުން ކުރި މަސެޖު ދޮގެއް ވެސް ނުކުރައްވަ އެވެ.
އަދާލަތު ޕާޓީގެ ބައެއް މަސްދަރުތަކުން ބުނި ގޮތުގައި، މި ދައުރުގެ ބާކީ އޮތް މުއްދަތުގައި އަދާލަތު ޕާޓީ ސަރުކާރުގައި ބައިވެރިކުރުމަށާއި 2028 ވަނަ އަހަރުގެ ރިޔާސީ އިންތިހާބުގައި ކޯލިޝަން ހެދުމަށް މުއިއްޒު ހުށަހެޅުއްވި މައިގަނޑު އެއް ސަބަބަކީ ޝަހީމް ސަރުކާރު ދޫކުރައްވައި ނުކުމެވަޑައިގެންފާނެ ކަމުގެ ބިރު އޮތުމެވެ.
"އެހެންވެ ސަރުކާރުން ވަކިވެ އަދާލަތު ޕާޓީގެ ކޮންޓްރޯލް ޝަހީމް ނަގައިފާނެ ކަމުގެ ބިރު އޮތުމުން، އަދި ދީނީ އިލްމުވެރިންގެ އަޑު އިތުރަށް ގަދަވެ މުއިއްޒުއާ ދެކޮޅަށް މަސައްކަތްކޮށްފާނެ ކަމުގެ ބިރު އޮތުމުން އަދާލަތާއެކު ކޯލިޝަން އެ ހަދަނީ،" އަދާލަތު ޕާޓީގެ މަސްދަރަކުން ބުންޏެވެ.
މި ދައުރުގެ ބާކީ އޮތް މުއްދަތުގައި ސަރުކާރުގައި ބައިވެރިވުމަށާއި، 2028 ވަނަ އަހަރުގެ ރިޔާސީ އިންތިހާބުގައި ޕީޕަލްސް ނޭޝަނަލް ކޮންގްރެސް (ޕީއެންސީ) އާއެކު އިއްތިހާދުވެ، މުއިއްޒަށް ތާއީދުކުރުމަށް އަދާލަތު ޕާޓީގެ މަޝްވަރާ މަޖިލީހުން ފާސްކޮށްފައިވަނީ ރޭ ބޭއްވި ބައްދަލުވުމުގަ އެވެ.
އަދާލަތު ޕާޓީން ބުނި ގޮތުގައި، ޖުމުލަ 63 މެންބަރުން ހިމެނޭ މަޝްވަރާ މަޖިލީހުގެ ރޭގެ ބައްދަލުވުމުގައި ވޯޓު ދެވޭ 47 މެންބަރުން ބައިވެރިވިއިރު، އެ ގަރާރު ފާސްވީ 41 މެންބަރުންގެ އަޣުލަބިއްޔަތުންނެވެ.
އަދާލަތު ޕާޓީގެ ދުސްތޫރުގެ 46.1 ވަނަ މާއްދާއިން މަޝްވަރާ މަޖިލީހަށް ލިބިދޭ ބާރުގެ ދަށުން ފާސްކުރި އެ ގަރާރުގައި މައިގަނޑު ތިން ކަމެއް ވަނީ ކަނޑައަޅާފަ އެވެ. އެއީ ރައީސް މުއިއްޒު ދެއްވި ރަސްމީ ދައުވަތު ގަބޫލުކޮށް މި ދައުރުގެ ބާކީ އޮތް މުއްދަތުގައި ސަރުކާރުގެ ބައިވެރިއެއްގެ ގޮތުގައި މަސައްކަތްކުރުމާއި، ކުރިއަށް އޮތް 2028 ވަނަ އަހަރުގެ ރިޔާސީ އިންތިހާބުގައި ޕީއެންސީއާއެކު ކޯލިޝަނެއްގެ ގޮތުގައި ބައިވެރިވެ އެ ޕާޓީގެ ރިޔާސީ ކެންޑިޑޭޓު މުއިއްޒަށް ތާއީދުކޮށް މަސައްކަތްކުރުމުގެ އިތުރުން، ޕާޓީގެ މަގުސަދުތަކާއި މެންބަރުންގެ ހައްގުތަކާއި ދުރު މުސްތަގުބަލުގެ މަސްލަހަތުތަކަށް ރިއާޔަތްކޮށް ކޯލިޝަންގައި ބައިވެރިވުމުގެ ޝަރުތުތަކާއި އިންތިޒާމުތައް ކަނޑައަޅައި، ދުސްތޫރުގެ 46.3 ވަނަ މާއްދާގައި ބަޔާންކުރާ އެއްބަސްވުން އެކުލަވާލުމަށްފަހު ޕީއެންސީއާއެކު ކޯލިޝަން އެއްބަސްވުމެއްގައި ސޮއިކުރުމުގެ ބާރު ޕާޓީގެ ރައީސަށް ހަވާލުކުރުމެވެ.
ސަރުކާރާއި އަދާލަތު ޕާޓީގެ އިތުބާރު ކުރެވޭ މަސްދަރުތަކުން ބުނި ގޮތުގައި، މި ނިންމުމާއެކު ސަރުކާރުގެ އިސް މަގާމުތައް އެ ޕާޓީގެ ބައެއް މެންބަރުންނަށް ދޭނެ އެވެ.
އެހެން ދީންތަކުގެ މީހުން ވަޒަންވެރިކުރަން މަސައްކަތް ކުރަމުން ދަނިކޮށް ސަރުކާރުގައި ބައިވެރިވެ، 2028 ގައި ވެސް މުއިއްޒަށް ތާއިދުކުރަން އަދާލަތު ޕާޓީން ފާސްކޮށްފި
މި ދައުރުގެ ބާކީ އޮތް މުއްދަތުގައި ސަރުކާރުގައި ބައިވެރިވުމަށާއި، 2028 ވަނަ އަހަރުގެ ރިޔާސީ އިންތިޚާބުގައި ރައީސް މުއިއްޒަށް ތާއީދުކޮށް ޕީއެންސީއާއެކު ކޯލިޝަން ހެދުމަށް އަދާލަތު ޕާޓީގެ މަޝްވަރާ މަޖިލީހުން ފާސްކޮށްފިއެވެ. މި ނިންމުމާއެކު ސަރުކާރުގެ އިސް މަގާމުތައް އެ ޕާޓީއަށް ދިނުމަށް ހަމަޖެހިފައިވާއިރު، ކޯލިޝަން އެއްބަސްވުމުގައި ސޮއިކުރުމުގެ ބާރު މިހާރު ވަނީ ޕާޓީގެ ރައީސަށް އަރުވާފައެވެ.
އަދާލަތު ޕާޓީން ސަރުކާރާއެކު ކޯލިޝަން ހަދަން މި ނިންމީ، ޔަހޫދީންނާ އާދަޔާ ހިލާފު ގާތް ގުޅުމެއް އޮންނަ ޔޫއޭއީގެ މުހައްމަދު އަލައްބާރަށް ރަސްމާލެއިން 500 ހެކްޓަރު ދޫކޮށްލުމަށް ސަރުކާރުން ތައްޔާރުވަމުން އަންނަ ދަނޑިވަޅެއްގަ އެވެ. ރަސްމާލެ މަޝްރޫއުގެ ދަށުން ބިދޭސީންނާއި އެހެން ދީންތަކުގެ މީހުންނަށް ރާއްޖޭގައި ވަޒަންވެރިވެގެން އުޅެވޭނެތީ އޭގެ ސަބަބުން ރާއްޖޭގެ ދީނީ އެއްބައިވަންތަކަމާއި ގައުމީ ސަލާމަތަށް ނުރައްކާވެދާނެ ކަމަށް ބުނެ އަދާލަތު ޕާޓީން މީގެ ކުރިން ވަނީ ކަންބޮޑުވުން ފާޅުކޮށްފަ އެވެ. އެގޮތުން ބޭރު މީހުން ވަޒަންވެރިވާ ގޮތަށް އެ މަޝްރޫއު ކުރިއަށް ނުގެންދިއުމަށާއި، އޭގެ ބަދަލުގައި ހޮލިޑޭ ހޯމްސް ފަދަ ވަސީލަތްތައް ތަރައްގީކުރުމަށް ސަރުކާރަށް އިލްތިމާސްކޮށް އެ ޕާޓީން ކުރިން އޮތީ ގަރާރެއް ވެސް ފާސްކޮށްފަ އެވެ.
