ރައީސް މުހައްމަދު މުއިއްޒުގެ ވެރިކަމަށް ތިން އަހަރު ފުރުން ފާހަގަކުރުމަށް މާދަމާރޭ ހުޅުމާލޭގައި ބޮޑު ޖަލްސާއެއް ބާއްވަން ތައްޔާރުވެއްޖެ އެވެ.
ސަރުކާރަށް ތިން އަހަރުފުރުން ފާހަގަކުރުމަށް މާދަމަރޭ 8:00 ގައި ހުޅުމާލޭ ސެންޓްރަލް ޕާކުގައި ޖަލްސާއެއް ބާއްވަން ނިންމާފައިވާކަން ސަރުކާރަށް ތާއީދުކުރާ ފަރާތްތަކުން ސޯޝަލްމީޑިއާގައި ދަނީ ޕޯސްޓުކުރަމުންނެވެ.
ނަމަވެސް، އެ ޖަލްސާ ބާއްވަނީ ވެރިކަންކުރާ ޕީއެންސީން ކަމެއް ނުވަތަ ސަރުކާރުން ކަމެއް ނޭނގެ އެވެ. އެ ޖަލްސާއާ ބެހޭ އެއްވެސް މައުލޫމާތެއް ރަސްމީ އެއްވެސް އިދާރާއަކުން އަދި ހާމައެއް ނުކުރެ އެވެ.
މި ސަރުކާރު އައިފަހުން، ވެރިކަމަށް އަހަރު ފުރުމުގެ ޖަލްސާތައް ކޮންމެ އަހަރަކު ވެސް ވަރަށް ކުލަ ގަދަކޮށް ފާހަގަކުރެ އެވެ. ވެރިކަމަށް އަހަރުފުރުން ފާހަގަކުރަން ބާއްވާ ޖަލްސާތަކަށް ސަރުކާރުގެ މުވައްޒަފުންނަށް މަޖުބޫރުކޮށްގެން ގެންދާ މައްސަލަ ވެސް ފެންމަތިވެ އެވެ.
ރާއްޖޭގެ ވެރިކަމަށް އިންތިހާބުވާ ބޭފުޅުން ހުވާކުރައްވާ ދުވަހަކީ ޒަމާނުއްސުރެ ނޮވެމްބަރު 11، ގަ އެވެ. ނަމަވެސް، 2013 ގެ ރިޔާސީ އިންތިހާބުގެ ނަތީޖާ އޭރުގެ ސުޕްރީމް ކޯޓުން ބާތިލު ކުރުމާއެކު އެ ދުވަސް ވަނީ ނޮވެމްބަރު 17، އަށް ފަސްވެފަ އެވެ.
ވެރިކަމުގެ ހުވާކުރައްވާ ތާރީހު އަލުން ނޮވެމްބަރު 11، އަށް ބަދަލުކުރެއްވުމަކީ ރައީސް މުއިއްޒުގެ ވައުދެކެވެ. އެކަން ކުރެވޭނީ ރައްޔިތުންގެ ފެންނަ ނުފެންނަ ވޯޓަކަށްފަހު، ރައްޔިތުން އެކަން ބޭނުންވާ ނަމަ، ކަމަށް މުއިއްޒު ވަނީ ވިދާޅުވެފަ އެވެ.








