ރަސްމާލެ ވިއްކާލާ ބިލު މަޖިލީހުގެ މާދަމާގެ ޖަލްސާއަށް އެޖެންޑާ ކޮށްފައި ވަނިކޮށް، ހައުސިން މިނިސްޓަރު އަބްދުﷲ މުއްތަލިބު ބޮޑު ކަޅު ދަބަހެއް ހިފައިގެން ގޮސް ޕީއެންސީގެ މެންބަރުންނާ ބައްދަލުކުރައްވައިފި އެވެ.
ބޮޑު ކަޅު ދަބަހެއް ކޮނޑުގައި އަޅުއްވައިގެން މުއްތަލިބު މަޖިލީހުން ނުކުމެވަޑައިގެންނެވީ އަދަދު ނޫހުގެ ނޫސްވެރިންގެ ކުރިމައްޗަށެވެ. ނަމަވެސް، ދަބަހުގައި ހުރި އެއްޗަކާ ގުޅޭގޮތުން ތަކުރާރުކޮށް ސުވާލުކުރުމުން ވެސް އެއްވެސް ސުވާލަކަށް މުއްތަލިބު ޖަވާބެއް ދެއްވައިފައެއް ނުވެ އެވެ.
އަދަދު ގެ ނޫސްވެރިންގެ ސުވާލުތަކަށް މުއްތަލިބު ފިއްލެވީ ފޯނު ކަންފަތުގައި ޖައްސަވައިގެން ހުންނަވަ އެވެ. އެކަމަކު އޭނާ ހުންނެވީ ފޯނެއްގައި ނޫންކަން މި ނޫހުގެ ނޫސްވެރިންނަށް ވަނީ ކަށަވަރު ކުރެވިފަ އެވެ.
މީގެ ކުރިން ރައީސް މުހައްމަދު މުއިއްޒުގެ ގެކޮޅު މ. ދިމްޔާތުން ޕީއެންސީގެ އޮފީހަކަށް ގެންދިޔަ ކަޅު ދަބަހެއްގައި އެ ޕާޓީގެ މަޖިލިސް މެންބަރުންނަށް ފައިސާ ބަހާފައިވެ އެވެ. އެކަމާ ގުޅޭގޮތުން އަދަދު ނޫހުން މީގެ ކުރިން ވާނީ "ބައިލައްކަ" ނަމުގައި ޑޮކިއުމަންޓްރީއެއްވެސް ގެނެސްދީފަ އެވެ.
މި ނޫހަށް އެނގިފައިވާ ގޮތުގައި މުއިއްޒު ދަނީ ކޮންމެ މަހެއްގައި ޕީއެންސީގެ މަޖިލިސް މެންބަރުންނަށް 50،000ރ. ދެއްވަމުންނެވެ. ބައެއް މަސްމަހުގައި އެއަށްވުރެ ގިނައިންވެސް ފައިސާ ދެއްވާފައިވާކަން މި ނޫހަށް ވަނީ އެނގިފަ އެވެ.
ކަޅު ދަބަހެއް ހިފައިގެން މުއްތަލިބު މަޖިލީހަށް ވަޑައިގެންނެވީ އެޓާނީ ޖެނެރަލް އަހްމަދު އުޝާމްއާއެކުގަ އެވެ. މަޖިލިސް މެންބަރުންނާއެކު ސިއްރުން މިރޭ ބެއްވި އެ ބައްދަލުވުމުގައި ނައިބުރައީސް ހުސައިން މުހައްމަދު ލަތީފާއި މަޖިލީހުގެ ރައީސް އަބްދުއްރަހީމް އަބްދުﷲ އާއި އިކޮނޮމިކް މިނިސްޓަރު މުހައްމަދު ސައީދު ވެސް ބައިވެރިވެވަޑައިގެންނެވި އެވެ.
މި ބައްދަލުވުމާ ގުޅޭގޮތުން ނައިބުރައީސާއި އަބްދުއްރަހީމާއި ސައީދުއާ އަދަދު އިން ސުވާލުކުރުމުން އެއްވެސް ޖަވާބެއް ނުދެއްވަ އެވެ. ނަމަވެސް އޭޖީ އުޝާމް ވިދާޅުވީ އެ ބައްދަލުވުމަކީ މަޖިލީހަށް ސަރުކާރުން ހުށަހެޅި ހަތަރު ބިލާ ގުޅޭގޮތުން ޕީއެންސީގެ މަޖިލިސް މެންބަރުން އުފެދިފައިވާ ސުވާލުތަކަށް ޖަވާބު ދިނުމަށް ބޭއްވި ބައްދަލުވުމެއް ކަމަށެވެ.
އުޝާމް އެހެން ވިދާޅުވި ނަމަވެސް، ރަސްމާލެ ވިއްކާލުމުގެ ބިލުގެ އިތުރުން މަޖިލީހަށް ސަރުކާރުން ހުށަހަޅައިފައިވާ އަބުރުގެ ބިލާއި އިމިގްރޭޝަން ބިލް އަދި، މަރުގެ އަދަބު ތަންފީޒު ކުރުމުގެ ބިލު އަދި މަޖިލީހަށް ބަލައެއް ނުގަނެ އެވެ. މަޖިލީހަށް ފޮނުވާ ބިލަކާ ގުޅޭގޮތުން ކަމާ ގުޅުންހުރި ފަރާތްތަކުން ހިޔާލާއި މަޝްވަރާ މަޖިލީހުން ހޯދަނީ ބިލު ދިރާސާ ކުރުމުގެ މަރުހަލާގައި މަޖިލީހުގެ ކޮމިޓީތަކުންނެވެ.
ރަސްމާލެ މަޝްރޫއު ކުރިއަށް ގެންދިޔުމަށްޓަކައި، ތާއަބަދަށް ކުލީގެ އެއްބަސްވުން އާކުރެވޭ ގޮތަށް ހިމަނައި ރައްޔިތުންގެ މަޖިލީހަށް ހުށަހަޅައިފައިވާ ރިއަލް އެސްޓޭޓް ބިލު ހިމެނޭހެން ހަތަރު ބިލުގެ އިބްތިދާއީ ބަހުސް މާދަމާގެ ޖަލްސާއަށް ވަނީ ތާވަލުކޮށްފަ އެވެ. ބިލު ކޮމިޓީއަށް ފޮނުވާނީ އިބްތިދާއީ ބަހުސްގެ މަރުހަލާ ނިންމުމަށްފަހު، އެ ބިލުތައް ބަލައިގަތުމަށް މަޖިލީހުގެ ތަޅުމުން ފާސްކުރުމަށްފަހު އެވެ.
ރަސްމާލެ ވިއްކާލުމަށްޓަކައި ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު، އަހުމަދު އައިފާން ހުށަހަޅުއްވާފައިވާ ރިއަލް އެސްޓޭޓް ބިލުގެ އިތުރުން، މާދަމާގެ އެޖެންޑާގައި ހިމަނައިފައި ވަނީ މަރުގެ އަދަބު ކަނޑައެޅުމާއި ތަންފީޒުކުރުމާ ބެހޭ ބިލާއި އަބުރު ރައްކާތެރިކުރުމުގެ ހައްގުގެ ބިލުގެ އިތުރުން ދިވެހިރާއްޖޭގެ އިމިގްރޭޝަނުގެ ބިލުގެ ބަހުސް އެވެ.
އޭގެ އިތުރުން، މާދަމާގެ ޖަލްސާގެ އެޖެންޑާގައި އޮތީ އަންނަ އަހަރަށް ލަފާކުރާ ބަޖެޓުގެ ބަހުސް އެވެ.
