ރަސްމާލެ ވިއްކާލުމުގެ ބިލު މާދަމަގެ މަޖިލިސް ޖަލްސާއަށް އެޖެންޑާކޮށްފައި ވަނިކޮށް، ނައިބުރައީސް ހުސައިން މުހައްމަދު ލަތީފާއި އެޓާނީ ޖެނެރަލް އަހްމަދު އުޝާމްގެ އިތުރުން ބައެއް މިނިސްޓަރުން ޕީއެންސީ މަޖިލިސް މެންބަރުންނާއެކު ރައްޔިތުންގެ މަޖިލީހުގައި މިރޭ ސިއްރު ބައްދަލުވުމެއް ކުރިއަށް ގެންގޮސްފި އެވެ.
މި ބައްދަލުވުމުގައި ނައިބުރައީސާއެކު ބައިވެރިވެވަޑައިގެންނެވީ މަޖިލީހުގެ ރައީސް އަބްދުއްރަހީމް އަބްދުﷲ އާއި އެޓާނީ ޖެނެރަލް އަހްމަދު އުޝާމް އާއި ހައުސިން މިނިސްޓަރު އަބްދުﷲ މުއްތަލިބު އަދި އިކޮނޮމިކް މިނިސްޓަރު މުހައްމަދު ސައީދު އެވެ.
އެ ބައްދަލުވުމަށްފަހު، މުއްތަލިބު ނުކުންނެވިއިރު، އަތުގައި ކަޅު ބޮޑު ދަބަހެއް ވެސް އޮތެވެ. އެ ދަބަހުގައި ހުރީ ކޮން އެއްޗެއްތޯ ތަކުރާރުކޮށް ސުވާލު ކުރުމުން ވެސް އޭނާ ޖަވާބެއް ނުދެއްވި އެވެ.
ބައްދަލުވުމާ ގުޅޭގޮތުން ނައިބުރައީސް އާއި އަބްދުއްރަހީމްގެ އިތުރުން ސައީދުއާ ތަކުރާރުކޮށް ސުވާލުކުރުމުން ވެސް އެއްވެސް އެއްޗެއް ވިދާޅުވެފައެއް ނުވެ އެވެ.
ނަމަވެސް އޭޖީ އުޝާމްއާ އަދަދު އިން ސުވާލުކުރުމުން ވިދާޅުވީ އެ ބައްދަލުވުމަކީ މަޖިލީހަށް ހުށަހެޅި ހަތަރު ބިލާ ގުޅޭގޮތުން ޕީއެންސީގެ މެންބަރުން މެދުގައި އުފެދިފައިވާ ސުވާލުތަކަށް ޖަވާބު ދެއްވުމަށް ބޭއްވި ބައްދަލުވުމެއް ކަމަށެވެ. މެންބަރުންނަށް އުފެދިފައި ވަނީ ކޮން ސުވާލެއްތޯ މި ނޫހުން އެހުމުން އެކަމަށް އުޝާމް ޖަވާބެއް ނުދެއްވަަ އެވެ.
"ދެން އަޅުގަނޑަށް އޭގެ ތަފްސީލު މި ގަޑީގައި ދެވޭކަށް ނެތް. އެކަމަކު މިދެންނެވީ ހަތަރު ބިލާ ގުޅޭގޮތުންވެސް ހަމަ އެބޭފުޅުންނަށް ސާފުކުރަން ބެނުންވާ ކަންތައްތަކެއް ހުރީމަ އެ ހުރިހާ ކަމެއް ސާފުކޮށްދިން،" އޭނާ ވިދާޅުވި އެވެ.
އުޝާމް އެހެން ވިދާޅުވި ނަމަވެސް، ރަސްމާލެ ވިއްކާލުމުގެ ބިލުގެ އިތުރުން މަޖިލީހަށް ސަރުކާރުން ހުށަހަޅައިފައިވާ އަބުރުގެ ބިލާއި އިމިގްރޭޝަން ބިލް އަދި، މަރުގެ އަދަބު ތަންފީޒު ކުރުމުގެ ބިލު އަދި މަޖިލީހަށް ބަލައެއް ނުގަނެ އެވެ. މަޖިލީހަށް ފޮނުވާ ބިލަކާ ގުޅޭގޮތުން ކަމާ ގުޅުންހުރި ފަރާތްތަކުން ހިޔާލާއި މަޝްވަރާ މަޖިލީހުން ހޯދަނީ ބިލު ދިރާސާ ކުރުމުގެ މަރުހަލާގައި މަޖިލީހުގެ ކޮމިޓީތަކުންނެވެ.
އެހެންނަމަވެސް، އުޝާމް އާއި މުއްތަލިބު އަދި ސަރުކާރުގެ އިސްވެރިން މަޖިލީހަށް މިރޭ ހާޒިރުވިއިރު މަޖިލީހުގެ އެއްވެސް ކޮމިޓީއެއްގެ މަސައްކަތެއް ނުހިނގަ އެވެ. އަދި، މަޖިލީހުގެ ޖަލްސާއެއް ވެސް މިރޭ ނުހިނގަ އެވެ.
ރަސްމާލެ މަޝްރޫއު ކުރިއަށް ގެންދިޔުމަށްޓަކައި، ތާއަބަދަށް ކުލީގެ އެއްބަސްވުން އާކުރެވޭ ގޮތަށް ހިމަނައި ރައްޔިތުންގެ މަޖިލީހަށް ހުށަހަޅައިފައިވާ ރިއަލް އެސްޓޭޓް ބިލު ހިމެނޭހެން ހަތަރު ބިލުގެ އިބްތިދާއީ ބަހުސް މާދަމާގެ ޖަލްސާއަށް ވަނީ ތާވަލުކޮށްފަ އެވެ. ބިލު ކޮމިޓީއަށް ފޮނުވާނީ އިބްތިދާއީ ބަހުސްގެ މަރުހަލާ ނިންމުމަށްފަހު، އެ ބިލުތައް ބަލައިގަތުމަށް މަޖިލީހުގެ ތަޅުމުން ފާސްކުރުމަށްފަހު އެވެ.
ރަސްމާލެ ވިއްކާލުމަށްޓަކައި ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު، އަހުމަދު އައިފާން ހުށަހަޅުއްވާފައިވާ ރިއަލް އެސްޓޭޓް ބިލުގެ އިތުރުން، މާދަމާގެ އެޖެންޑާގައި ހިމަނައިފައި ވަނީ މަރުގެ އަދަބު ކަނޑައެޅުމާއި ތަންފީޒުކުރުމާ ބެހޭ ބިލާއި އަބުރު ރައްކާތެރިކުރުމުގެ ހައްގުގެ ބިލުގެ އިތުރުން ދިވެހިރާއްޖޭގެ އިމިގްރޭޝަނުގެ ބިލުގެ ބަހުސް އެވެ.
އޭގެ އިތުރުން، މާދަމާގެ ޖަލްސާގެ އެޖެންޑާގައި އޮތީ އަންނަ އަހަރަށް ލަފާކުރާ ބަޖެޓުގެ ބަހުސް އެވެ.
