ރާއްޖޭގެ ރިސޯޓެއްގައި އެއް ޖިންސުން ކައިވެނި ކޮށްދޭ މަންޒަރު ފެންނަ ވީޑިއޯއެއް ސޯޝަލް މީޑިއާގައި އާންމުވި މައްސަލައިގައި އެ ކަން ހިންގި ރިސޯޓާއި ބައިވެރިވި މީހުންނާ ދެކޮޅަށް ހަރުކަށި ފިޔަވަޅު އެޅުމަށް އަދާލާތު ޕާޓީން ގޮވާލައިފި އެވެ.
ސޯޝަލް މީޑިއާގައި ދައުރުވަމުންދާ ވީޑިއޯގެ ސްނެޕްޝޮޓްތަކުން ފެންނަ ގޮތުގައި، ރާއްޖޭގެ ރިސޯޓެއްގެ ގޮނޑުދޮށުގައި ދެ ފިރިހެނުން އަތުގުޅައިގެން ތިބެ އެވެ. އެ މީހުން ލައިގެން ތިބި ހެދުމާއި ފެންނަ މަންޒަރުތަކަށް ބަލާއިރު އެއީ ރަމްޒީ ކައިވެނީގެ ހަފުލާއެއް ކަމަށް ބެލެވެ އެވެ.
އެ މައްސަލަ ބަލަން ފުލުހުން ވަނީ ފަށާފަ އެވެ. މިއަދު ނެރުނު ބަޔާނެއްގައި އަދާލާތު ޕާޓީން ވަނީ އެ މައްސަލަ ހަރުކަށި އިބާރާތުން ކުށްވެރިކޮށްފަ އެވެ. އެއީ އިސްލާމީ އަގީދާ އާއި ރާެއްޖޭގެ ސަގާފަތާއި އާދަކާދައާ ދެކޮޅަށް ދިން ހަމަލާއެއްގެ ގޮތުގައި އެ ޕާޓީން ވަނީ ސިފަކޮށްފަ އެވެ.
"ރިސޯޓުތަކަކީ ރާއްޖޭގެ އިހުތިސާސް ހިނގާ ބިންތަކަށް ވީހިނދު، އެ ތަންތަނުގައި އިސްލާމް ދީނުގެ ހުރުމަތް ކަނޑައި، ރާއްޖޭގެ ގާނުނުތަކާ ހިލާފަށް ބޮޑެތި ޖަރީމާތަކާއި ކުށްތަކަށް މަގުފަހިވެގެންދާނެ ފަދަ އެއްވެސް ހަރަކާތެއް ހިންގުމުގެ ފުރުސަތު އެއްވެސް ފަރާތަކަށް ދެވިގެން ނުވާނެ،" އަދާލަތުގެ ބަޔާނުގައި ބުނެފައިވެ އެވެ.
އެ ވީޑިއޯ ނެގުމަށް ފުރުސަތު ދިން ރިސޯޓާއި އެކަމުގައި ބައިވެރިވި އެންމެންގެ މައްސަލަ ބަލައި ގާނޫނުގައި ދެވެން އޮތް އެންމެ ހަރުކަށި އަދަބު ދިނުމަށް އަދާލަތު ޕާޓީން ވަނީ ގޮވާލާފަ އެވެ.
މި މައްސަލަ ބަލަން ފަށާފައިވާކަން ހާމަކޮށް ފުލުހުންގެ ހިދުމަތުން ނެރުނު ބަޔާނެއްގައި ބުނީ، އެއީ ގާނޫނީ ގޮތުން ހުއްދަ ނޫން އަމަލަކަށް ވާތީ އެ މައްސަލަ މިހާރު ތަހުގީގު ކުރަމުން އަންނަ ކަމަށެވެ.
ފުލުހުން ބުނީ ރާއްޖޭގެ ދައުލަތުގެ ދީނަކީ އިސްލާމްދީން ކަމަށް ވެފައި، ދީނީ އަދި ޝަރުއީ އުސޫލުތަކާއި، ގާނޫނުތަކާއި، އާންމު އިޖުތިމާއީ އަދި އަހުލާގީ މިންގަނޑުތަކާ ހިލާފު އެފަދަ އަމަލުތައް އެއްވެސް ފަރާތަކުން ނުހިންގުމަށް އިލްތިމާސްކުރާ ކަމަށެވެ. އަދި ރިސޯޓްތަކާއި ގެސްޓްހައުސްތަކުގައި މަސައްކަތްކުރާ ބިދޭސީ މުވައްޒަފުން ވެސް އެފަދަ ކަންކަން ހިންގިޔަ ނުދިނުމަށް ފުލުހުން ވަނީ އަންގާފަ އެވެ.
މި ވީޑިއޯ އާންމުވުމާ ގުޅިގެން ގިނަ ބަޔަކު ވަނީ އެކަމަށް ވަރަށް ބޮޑަށް ފާޑުކިޔައި، ރާއްޖޭގެ ފަސްގަނޑުގައި އެފަދަ ކަންކަން ހިންގުމުގެ ފުރުސަތު ދީގެން ނުވާނެ ކަމަށް ބުނެ ނުރުހުން ފާޅުކޮށްފަ އެވެ.
