އަށް މަސް ފަހުން ސާފް ޗެމްޕިއަންޝިޕްގެ އާ މުބާރާތެއް އޮންނާނެ ކަމަށާއި އެ މުބާރާތް ހޯސްޓް ކުރުމުގެ ފުރުސަތު ހޯދުމަށްޓަކައި ކުރަން ޖެހޭ މަސައްކަތް ފަށާފައިވާ ކަމަށް ސްރީ ލަންކާ ފުޓްބޯޅަ ފެޑެރޭޝަންގެ ރައީސް ޖަސްވާރު އުމަރު ވިދާޅުވެއްޖެ އެވެ.
މި ފަހަރުގެ ސާފް ޗެމްޕިއަންޝިޕްގެ ގްރޫޕް ސްޓޭޖުން ސްރީ ލަންކާ ކެޓުމުން އެ ކަމަށްޓަކައި ސްރީ ލަންކާގެ ފުޓްބޯޅަ ސަޕޯޓަރުން ކިބައިން މައާފަށް އެދުމަށްޓަކައި ނެރުނު ބަޔާނެއްގައި ޖަސްވާރު ބުނެފައިވަނީ އެނބުރި އަންނާނީ ވަރުގަދަކޮށެވެ.
ސައުތު އޭޝިއަން ފުޓްބޯލް ފެޑެރޭޝަން (ސާފް)ގެ ނައިބު ރައީސްގެ މަގާމު ވެސް ފުރުއްވަމުން އަންނަ ޖަސްވާރު ވިދާޅުވީ، އަށް މަސް ދުވަސް ފަހުން ސާފް ޗެމްޕިއަންޝިޕްގެ އާ މުބާރާތެއް އޮންނާނެ ކަމަށެވެ. އަދި، އެ މުބާރާތް ސްރީ ލަންކާގައި ހޯސްޓްކުރަން މަސައްކަތް ފަށާފައިވާ ކަމަށް ޖަސްވާރު ވިދާޅުވެފައިވެ އެވެ.
ސްރީ ލަންކާ އިން މި ފަހަރުގެ ސާފް ޗެމްޕިއަންޝިޕަށް ކަނޑައެޅި ޓާގެޓަކީ ޗެމްޕިއަންކަން ހޯދުމެވެ. އެކަމަކު، އެ ޓީމަށް ގްރޫޕް ސްޓޭޖު ފަހަނައަޅައި ވެސް ނުދެވުނެވެ. ސްރީ ލަންކާ އަށް އެންމެ ފަހުން ސެމީ ފައިނަލަށް ދެވުނީ 2015 ވަނަ އަހަރު އިންޑިއާގައި ބޭއްވި މުބާރާތުގަ އެވެ. އެ ފަަަހަރު ސެމީ ފައިނަލުގަައި އެ ޓީމު ވަނީ އަފްގާނިސްތާން އަތުން ބަލިވެފަ އެވެ.
މި ފަހަރުގެ ސާފް ޗެމްޕިއަންޝިޕް އެންމެ ފުރަތަމަ ބާއްވަން އޮތީ މިދިޔަ އަހަރު އެވެ. އެ މުބާރާތް ހޯސްޓްކުރަން ވެސް ސްރީ ލަންކާ އިން މަސައްކަތްކުރި އެވެ. އެކަމަކު، އެކި ސަބަބުތަކާ ހުރެ މުބާރާތް މި އަހަރަށް ފަސްކޮށް، އެންމެ ފަހުން ބަންގްލަދޭޝްގައި ހޯސްޓްކުރަން ނިންމީ އެވެ.
ފަނަރަ އަހަރު ވަންދެން ދުނިޔޭގެ ފުޓްބޯޅަ ރޭންކިންގެ 200 އަށް ވުރެން ދަށްކޮށް އޮތުމަށް ފަހު، ސްރީ ލަންކާ މިހާރު އޮތީ ރޭންކިންގެ 184 ވަނައިގަ އެވެ. މިދިޔަ ދެ އަހަރު ތެރޭ ބައިނަލްއަގުވާމީ 12 މެޗުން މޮޅުވެފައި މިހާރު އެ ގައުމުގެ ފުޓްބޯޅައިގެ މިސްރާބު އޮތީ ރަނގަޅަށް ކަމަށް ޖަސްވާރު ވަނީ ވިދާޅުވެފަ އެެވެ.
ދެން އޮތް މަރުހަލާ އަށް ކުރިއަށްދިއުމަށްޓަކައި، ސާފް ޗެމްޕިއަންޝިޕެއް ސްރީ ލަންކާގައި ހޯސްޓްކުރުމަކީ މުހިންމު ކަމެއް ކަމަށް ޖަސްވާރު ވަނީ ވިދާޅުވެފަ އެވެ.
ސްރީ ލަންކާ އިން އެންމެ ފުރަތަމަ ސާފް ޗެމްޕިއަންޝިޕް ހޯސްޓްކުރީ 1995 ވަަނަ އަހަރު އެވެ. އެ ފަހަރު އެ ޓީމުން ސާފްގެ ޗެމްޕިއަންކަން ހޯދި އެވެ. އޭގެ ފަހުން، ސްރީ ލަންކާ އަށް ސާފް ޗެމްޕިއަންޝިޕެއް ހޯސްޓްކުރުމުގެ ފުރުސަތު ލިބިފައިވަނީ، ރާއްޖެއާ ގުޅިގެން ކޯ-ހޯސްޓެއްގެ ގޮތުގަ އެވެ. އެ ފަހަރުގެ މުބާރާތުގެ ފައިނަލް ކުޅުނީ ސްރީ ލަންކާގަ އެވެ.
މި ފަހަރުގެ ސާފް ޗެމްޕިއަންޝިޕުން ސްރީ ލަންކާ ކެޓީ ދެ މެޗުން ޕޮއިންޓެއް ލިބިގެންނެވެ. ފުރަތަމަ މެޗުން 2-2 އިން ބޫޓާނާ އެއްވަރުވިއިރު، ދެ ވަނަ މެޗުން 4-0 އިން ބަންގްލަދޭޝް އަތުން ބަލިވި އެވެ.
