ޓެކްނޯ ސާފް ޗެމްޕިއަންޝިޕް 2026 ގައި މިރޭ ކުޅުނު މެޗުގައި ބަންގްލަދޭޝްގެ ތަރިން ކާމިޔާބުކުރި ލަނޑުތަކާ އެކު، 4-0 އިން ސްރީ ލަންކާ ބަލިކޮށް ގްރޫޕްގެ އެއް ވަނަ ދިޔައިރު، މި ގްރޫޕްގެ ދެ ވަަނައިގެ ގޮތުގައި ބޫޓާނުން ސެމީ ފައިނަަލަށް ދަތުުރުކޮށްފި އެވެ.
މިއީ، ބޫޓާނުން ސާފް ޗެމްޕިއަންޝިޕްގެ ސެމީގައި ކުޅޭ ދެ ވަނަ ފަަަހަރެވެ. އެ ޓީމުން މީގެ ކުރިން ސާފް ޗެމްޕިއަންޝިޕެއްގެ ސެމީގައި ކުޅުނު ހަމައެކަނި ފަހަރަކީ 2008 ވަަނަ އަހަރު އެވެ. އެ ފަހަރު ސެމީގައި ބޫޓާން ބަލިވީ އިތުރު ވަގުތުގެ ދެ ހާފު ކުޅެގެން އިންޑިއާ އަތުން 2-1 އިންނެވެ. މި ފަހަރުގެ ސެމީގައި ވެސް ބޫޓާނާ ޖެހޭނީ އިންޑިއާއާ އެވެ.
އަނެއްކޮޅުން، ބަންގްލަދޭޝް އިން ސެމީގައި ކުޅޭނީ އަށް އަހަރަށް ފަހު، ސެމީ އަށް ދަތުުރުކުރި ޕާކިސްތާންއާ އެވެ.
ގްރޫޕް އޭގެ އެއް ވަނަ ހޯދި ބަންގްލަދޭޝް އަށް ހަ ޕޮއިންޓް ލިބުނުއިރު، ދެ ވަނަ އަށް ދިޔަ ބޫޓާން އާއި ތިން ވަނަ އަށް ދިޔަ ސްރީ ލަންކާ އަށް އެއް ޕޮއިންޓް ލިބުނެވެ. ލަންކާ ކެޓީ ލަނޑުގެ ތަފާތުންނެވެ.
ޑާކާގެ ނެޝަނަލް ސްޓޭޑިއަމްގައި ކުޅުނު މެޗުގައި ބަންގްލަދޭޝް އިން ފުރަަތަމަ ހާފުގައި ވެސް ދެ ގޯލުގެ ލީޑެއް ނެގި އެވެ. އެ ގޮތުން، މެޗުގެ ނުވަ ވަނަ މިނިޓްގައި، ބަންގްލަދޭޝްގެ ފުރަތަމަ ލަނޑު ޖެހީ ކެނަޑާ ގައުމީ ޓީމަށް ކުރިން ކުޅުނު ޝަމިތު ޝޯމޭ އެވެ. ލަންކާ އޭރިއާތެރެއިން ޝޯމޭ އަށް ދެ ފަހަރުން ފޮނުވާލަން ލިބުނު ފުރުސަތުގައި އޭނާ ވަނީ ގޯލުގެ ކަނަަށް ބޯޅަ އަމާޒުކޮށްލައިފަ އެވެ.
ބަންގްލަދޭޝަށް މި މެޗަށް ނުކުތްއިރު އެންމެ ބޮޑު ހިތްހަމަޖެހުމަކީ ފީފާ ބްރޭކް ފެށުމުން، ކްލަބްތަކުން ކުޅުންތެރިން ރިލީސްކޮށްދޭން ފެށުމާ އެކު، ޝެފީލްޑް ޔުނައިޓެޑްގެ ތަރި ހަމްޒާ ޗޯދުރީ އަށް ޓީމާ ގުޅެވުމެވެ.
ސާފް ޗެމްޕިއަންޝިޕް މެޗެއްގައި ފުރަތަމަ ފަހަރަށް ކުޅުނު ހަމްޒާ އަކީ މި މެޗުގައި ބަންގްލަދޭޝްގެ ކެޕްޓަން އެވެ. ބަންގްލަދޭޝްގެ ދެ ވަނަ ލަނޑު ޖެހީ ހަމްޒާ އެވެ.
މެޗުގެ 44 ވަނަ މިނިޓްގައއި ލަންކާ ޑިފެންސް ފަހަތުން ބޯޅައެއް ހޯދައި، އޭރިއާތެރެއަށް ވަދެ ހަމްޒާ ވަނީ ހަމަޖެހިލައިފައި ގޯލަށް ބޯޅަ ފޮނުވާލައިފަ އެވެ. އޭގެ ކުރިން، ހަމްޒާ އަށް ލަނޑު ޖަހަން ލިބުނު ފުރުސަތެއްގައި ސްރީ ލަންކާގެ ކީޕަރު ސުޖަން ޕެރޭރާ ކައިރިން ނައްޓާފައި ބެކްހީލަކުން ފޮނުވާލި ބޯޅަ ގޯލާ ސީދާނުވި އެވެ.
ސްރީ ލަންކާގެ ޑިލޯން ޑި ސިލްވާ އަށް ލިބޭ ފުރުސަތުތަކުގައި ބަންގްލަދޭޝްގެ ފަހަަތަށް ބާރު ބޮޑުކުރި ނަމަވެސް ލަނޑު ޖަހަން ލިބުނު ފުރުސަތުތަކުގައި ލަންކާ އަށް ބޭނުމެއް ނުހިފުނެވެ.
ދެ ވަނަ ހާފުގެ ކުޅުން ފެށިގެން ހަތް ވަނަ މިނިޓްގައި ބަންގްލަދޭޝްގެ ތިން ވަނަ ލަނޑު ޖެހީ ފަރްހާން އަލީ ވާހިދު އެވެ. ފުލަމް އެކަޑަމީން ތަމްރީންވި ފަރުހާން ސާފް ޗެމްޕިއަންޝިޕެއްގައި ފުރަތަމަ ފަހަރަށް ކުޅުނުއިރު، މިއީ ބަންގްލަދޭޝްގެ ފަސްގަނޑުގައި ވެސް އޭނާގެ ފުރަަތަމަ މެޗެވެ. މެޗުގެ 52 ވަނަ މިނިޓްގައި، ސްރީ ލަންކާ އޭރިއާތެރެއިން ތިން ކުޅުންތެރިން ކައިރިން ދެމިގަތުމަށް ފަހު، ފަރްހާން ޖެހި ބޯޅަ ގޯލަށް ވަނީ ކުޅުންތެރިއަކު ގައިގައި ޖެހިފަ އެވެ.
ބަދަލަކަށް ކުޅެން އަރައި، ބަންގްލަދޭޝް ޓީމުގެ ޖަޕާން ދަރިކޮޅަށް ނިސްބަތްވާ ޝޫކީ އިޓޯފޫސާ ފޮނުވާލި ދެ ހަމަލާއެއް ސްރީ ލަންކާގެ ކީޕަރު ސުޖަން ޕެރޭރާ ވަނީ މަތަކޮށްފަ އެވެ.
ބަންގްލަދޭޝް އިން ހަތަރު ވަނަ ލަނޑު ޖެހީ މެޗުގެ 87 ވަނަ މިނިޓްގަ އެވެ. މިއީ، ހުސްކޮށް ބޯޅަ ހިފައިގެން ވަދެ، ހަމަޖެހިލައިފައި ގޯލަށް ބޯޅަ ފޮނުވާލައިގެން ރަކީބް ހުސެެއިން ޖެހި ގޯލެކެވެ.
ބަންގްލަދޭޝް އިން 23 އަހަރަށް ފަހު ސާފް ޗެމްޕިއަންޝިޕް ހޯދަން މަސައްކަތްކުރާއިރު، މިރޭ ސްރީ ލަންކާއާ ދެކޮޅަށް ޖުމްލަކޮށް ރަނގަޅު ކުޅުމެއް ދެއްކި އެވެ. ބަންގްލަދޭޝް އިން ސާފް ޗެމްޕިއަންޝިޕްގެ ސެމީ ފައިނަލުގައި މި ކުޅެނީ ޖެހިޖެހިގެން ދެ ވަނަ ފަަހަރު އެވެ. ބަންގްލަދޭޝް އިން ސާފް ޗެމްޕިއަންޝިޕްގެ ތަށި ހޯދީ 2003 ވަނަ އަހަރު އެ ގައުމުގައި ފުރަތަމަ ފަހަރަށް އެ މުބާެރާތް ހޯސްޓްކުރިއިރު އެވެ.
ސާފް ޗެމްޕިއަންޝިޕްގެ ސެމީ ފައިނަލް މެޗުތައް އޮތީ އަންނަ ހޮނިހިރު ދުވަހު އެވެ. ފައިނަލް މެޗު އޮތީ މި މަހު 17 ވަނަ ދުވަހު އެވެ.
