ޓެކްނޯ ސާފް ޗެމްޕިއަންޝިޕް 2026 ގެ ގްރޫޕް ސްޓޭޖުގައި ކުޅޭ ފަަހު މެޗަކަށް ވެގެންދާނީ މިރޭ ގްރޫޕް އޭގައި ބަންގްލަދޭޝް އާއި ސްރީ ލަންކާ ވާދަކުރާ މެޗެވެ. ބަންގްލަދޭޝް އިން 23 އަހަރަށް ފަހު ސަރަހައްދުގެ ތަށި ހޯދަން ހާއްސަ އަމާޒެއް ކަނޑައަޅާފައިވާއިރު، ސްރީ ލަންކާ އިން މަސައްކަތްކުރަމުން އަންނަނީ 31 އަހަރަށް ފަހު ސަރަހައްދުގެ ތަށި އުފުލާލުމަށެވެ.
ސްރީ ލަންކާ އިން މިހާތަނަށް ސާފްގެ ތަށި ހޯދި ހަމައެކަނި ފަހަރަކީ 1995 ވަނަ އަހަރު އެ ގައުމުގައި ހޯސްޓްކުރި ފަހަރު އެވެ. މި ފަހަރުގެ ސާފް ޗެމްޕިއަންޝިޕް މިދިޔަ އަހަރު ލަންކާގައި ހޯސްޓްކުރެވޭތޯ މަސައްކަތް ކުރި ނަމަވެސް މުބާރާތް ފަސްވެގެން މި އަހަރަށް ބަދަލުކުރިއިރު، މުބާރާތް ހޯސްޓް މި ކުރަނީ ބަންގްލަދޭޝްގަ އެވެ. ބަންގްލަދޭޝް އިން ސާފް ތަށި އުފުލާލި ހަމައެކަނި ފަހަރަކީ، އެ ގައުމުގައި އެންމެ ފުރަތަމަ ސާފް ޗެމްޕިއަންޝިޕް ހޯސްޓްކުރި ފަހަރެވެ. އެއީ، 2003 ވަނަ އަހަރު އެވެ.
ސަރަހައްދުގެ ފުޓްބޯޅައިގައި މިހާރު ބަންގްލަދޭޝް އާއި ސްރީ ލަންކާ އަށް ކާމިޔާބު ނުލިބި އެތައް އަހަރެއް ގުނަން ޖެހިފައިވާއިރު، މިދިޔަ ދެތިން އަހަރު ތެރޭ މި ދެ ގައުމުގެ ފުޓްބޯޅަ އަށް ގިނަ ބަދަލުތަކެއް ވަނީ ގެނެސްފަ އެވެ. އާ ސަގާފަތެއް ދިރުވައިފަ އެވެ.
ރަށްވެހިކަން ދީގެން އާ ކުޅުންތެރިން ގައުމީ ޓީމަށް ކުޅުވުން
މީގެ 20 ވަރަކަށް އަަހަރު ކުރިން ބަންގްލަދޭޝް އިން އެ ގައުމު ތަމްސީލް ކުރެވޭނެ ކުޅުންތެރިން ދުނިޔޭގެ އެކި ކަންކޮޅުތަކުން ހޯދުމުގެ މަސައްކަތް ފަށައިގަތެވެ. އެ ގޮތުން، ބަންގްލަދޭޝްގެ ކެޕްޓަން ބޭންޑް އަޅައިގެން މިހާރު ކުޅެމުން އަންނަ ޖަމާލް ބުޔާން އެވެ. ޑެންމާކަށް އުފަން ނަމަވެސް ބަންގްލަދޭޝްގެ އާއިލާ އަކަށް ނިސްބަތްވާ ކުޅުންތެރިއަކަށް ވާތީވެ، 2008 ވަނަ އަހަރު ޖަމާލް ބުޔާން އަށް ބަންގްލަދޭޝް އަށް ކުޅެން ދައުވަތު ފޮނުވި އެވެ. އޭނާ އޮފާ ގަބޫލުކޮށް ބަންގްލަދޭޝްގެ 23 އަހަރުން ދަށުގެ ޓީމުން ކެރިއަރު ފަށައި، 2013 ވަނަ އަަހަރުގެ ސާފް ޗެމްޕިއަންޝިޕުން ފެށިގެން އަންނަނީ ގައުމީ ޓީމަށް ކުޅެމުންނެވެ.
ބަންގްލަދޭޝްގައި ނެޗުރަލައިޒްކޮށްގެން ކުޅުންތެރިން ކުޅުވުން ބޮޑަށް ވައިގައި ހިފަން ފެށީ 2018 ވަނަ އަހަރުގެ ސާފް ޗެމްޕިއަންޝިޕަށް ފަހުގަ އެވެ. ފިންލެންޑް ގައުމީ ޓީމަށް ކުރިން ކުޅުނު ޑިފެންޑަރު ތާރިކް ގާޒީ އާއި އިނގިރޭސި ޔޫތު ޓީމުތަކަށް ކުޅުނު ހަމްޒާ ޗޯދުރީ އާއި ޗެލްސީ އާއި ފުލަމް އެކަޑަމީން ޑިވެލޮޕްވި ފަރުހާން ވާހިދު އާއި އިޓަލީގައި ކުޅެމުން އަންނަ ފަހެމުދުލް އިސްލާމް އަދި ކެނަޑާގެ އުމުރުފުރާ ޓީމުތަކާއި ސީނިއާ ޓީމަށް ކުޅެފައިވާ ޝަމިތު ޝޯމޭ މިހާރު ކުޅެމުން އެ އަންނަނީ ބަންގްލަދޭޝް ގައުމީ ޓީމަށެވެ.
މީގެ އިތުރުން ވެސް އިނގިރޭސި ވިލާތުގައި ބޮޑުވި ޒިދާން ޔޫސުފް އާއި ޖަޕާން ދަރިކޮޅަށް ނިސްބަތްވާ ޝޫކީ އިޓޯފޫސާ އަކީ ވެސް ބަންގްލަދޭޝް އިން ބަދަލުކުރި ވިސްނުމުގެ ތެރެއިން ގައުމީ ޓީމަށް ގެނައި ކުޅުންތެރިންނެވެ.
ސްރީ ލަންކާގެ "މެޖޯރިޓީ" އަކީ ނެޗުރަލައިޒް ކުޅުންތެރިން
ދެކުނު އޭޝިއާގެ ގައުމުތަކުގެ ތެރެއިން ރާއްޖެ އާއި ބޫޓާން ފިޔަވައި ބާކީ އޮތް ފަސް ގައުމުގައި ވެސް ނެޗުރަލައިޒް ކުޅުންތެރިން ހިމެނެ އެވެ. އެ ގޮތުން، މި ފަހަރުގެ ސާފް ޗެމްޕިއަންޝިޕަށް ނެގި ސްކޮޑަށް ބަލާއިރު އެންމެ ގިނައިން ނެޗުރަލައިޒް ކުޅުންތެރިން ޓީމުގައި ހިމަނާފައިވަނީ ސްރީ ލަންކާ އިންނެވެ. އެ ގޮތުން، ލަންކާ ޓީމުގައި ރަޖިސްޓްރީކޮށްފައިވާ 28 ކުޅުންތެރިންގެ ސްކޮޑުގެ ތެރެއިން 16 ކުޅުންތެރިންނަކީ ނެޗުރަލައިޒް ކުޅުންތެރިންނެވެ.
ލަންކާ އިން މި ވިސްނުމަށް ބަދަލުކޮށް، އެ ގައުމަށް ނިސްބަތްވާ އެކި ކުޅުންތެރިން ހޯދުމުގެ މަސައްކަތް ރަނގަޅަށް ފެށީ މީގެ ފަސް އަހަރު ކުރިންނެވެ. އަދި، އަހަރަކަށް ފަހު އަހަރެއް އޭގެ ކުޅުންތެރިންގެ ނިސްބަތް ގިނަވެ، މިހާރު ލަންކާ ޓީމުގެ ކޮންޓްރޯލް އޮތީ އެ ގައުމަށް ނިސްބަތްވާ އެކި ދަރިފަސްކޮޅުން އައިސްފައިވާ ކުޅުންތެރިންގެ މައްޗަށެވެ.
ލަންކާގެ ކޯޗަކަށް ހުރި ކުވެއިތުގެ އަލް މުތައިރީ ބުނެފައިވަނީ، ލަންކާ އަށް ނިސްބަތްވާ "ލޭ" ހުރި ކޮންމެ ކުޅުންތެރިއަކަށް، އެ އޮންނަ އުސޫލުގެ ތެރެއިން އެ ގައުމަށް ކުޅުމުގެ ފުރުސަތު ހޯދުމުގައި ހުރަހެއް ނެތް ކަމަށެވެ.
ސާފް ޗެމްޕިއަންޝިޕްގައި މިރޭ ލަންކާ އާއި ބަންގްލަދޭޝް ކުޅޭ މެޗަކީ، ސާފްގެ ތާރީހުގައި ވެސް އެންމެ ފޯރިގަދަ މެޗަށް ވާނެ ކަމަށް މުތައިރީ ވަނީ ބުނެފަ އެވެ. ބަންގްލަދޭޝް ވަނީ ސެމީ ފައިނަލް ޔަގީންކޮށްފަ އެވެ. ބަންގްލަދޭޝް އަތުން ބަލިނުވެ ފަރުޖައްސާލައިގެން ލަންކާ އަށް ސެމީ އަށް ދެވޭނެ އެވެ. އެކަމަކު، މުތައިރީ ވިސްނުން ހުރީ ބަންގްލަދޭޝް ކައިރީގައި "ނަތީޖާއެއް ނެރެގެން" ސެމީ ފައިނަލަށް ދިއުމަށެވެ.
