ޓެކްނޯ ސާފް ޗެމްޕިއަންޝިޕް 2026 ހޯސްޓްކުރަމުން އަންނަ ބަންގްލަދޭޝް އާއި މުބާރާތުގެ އެންމެ ކާމިޔާބު ޓީމު އިންޑިއާ ފައިނަލަށް ގެންދިއުމަށް ފަހު، ބާކީ ޓީމުތައް ގައުމަށް ފޮނުވާލާން ޖެހޭ ކަމަށް ބުނެ، ސްރީ ލަންކާ ފުޓްބޯޅަ ޓީމު ކުވެއިތުގެ އަބްދުﷲ އަލް މުތައިރީ ފާޑުކިޔައިފި އެވެ.
އޭނާ މިހެން ބުނެފައިވަނީ، ރޭ ސްރީ ލަންކާ އިން މި ފަހަރުގެ މުބާރާތުގައި ކުޅުނު ފުރަތަމަ މެޗުގައި ބޫޓާނާ 2-2 އިން އެއްވަރުވި މެޗަށް ފަހު އޮތް ނޫސްވެރިންގެ ބައްދަލުވުމެއްގަ އެވެ. މީގެ ކުރިން، 2021 ވަނަ އަހަރު މާލޭގައި ބޭއްވި ސާފް ޗެމްޕިއަންޝިޕްގައި ނޭޕާލާ އެކު މުބާރާތުގެ ފައިނަލުގައި އިންޑިއާ އަތުން ބަލިވި މުތައިރީ ވަނީ ރޭ ސައުތު އޭޝިއަން ފުޓްބޯލް ފެޑެރޭޝަން (ސާފް)އާ ބެހޭގޮތުން ވެސް ތުހުމަތުތަކެއް ކޮށްފަ އެވެ.
މުތައިރީ ބުނީ، ލަންކާ އިން މެޗު ކޮންޓްރޯލް ކޮށްގެން ކުޅެ ނަތީޖާ ނެރެން ވަރަށް މަސައްކަތް ކުރި ކަމަށާއި ގްރޫޕް ސްޓޭޖުގައި ވީޑިއޯ އެސިސްޓަންޓް ރެފްރީ (ވީއޭއާރް) ބޭނުންކުރާނަމަ، ބޫޓާނުން ޖެހި ދެ ވަނަ ގޯލު ވާނީ އޮފްސައިޑް ގޯލަށް ކަމަށެވެ. އަދި، ރޭ އިންސާފުވެރިކޮށް ކަންކަން ދިޔަނަމަ ލަންކާ އަށް މަދުވެގެން އެއް ޕެނަލްޓީ ލިބޭނެ ކަމަށް މުތައިރީ ވަނީ ތަކުރާރުކޮށް ބުނެފަ އެވެ.
"މި ކަހަލަ ރެފްރީންގެ މިސްޓޭކްތައް ބޫޓާނާ އެކު ކުޅޭއިރު ކުރިމަތިވަންޏާ ކިހިނެއް އަހަރެމެން ބަންގްލަދޭޝްއާ އެކު ކުޅޭނީ؟. މިއީ ސާފް އަށް ދޭ މެސެޖެއް. ވީއޭއާރް ތައާރަފްކޮށް ރެފްރީންގެ ކަންކަމަށް ހައްލެއް ހޯދައިދީ،" ބޫޓާނަށް ފައިދާވާގޮތަށް ރެފްރީންގެ ނިންމުންތައް ހުރިކަން ފާހަގަކޮށް މުތައިރީ ބުންޏެވެ.
އޭނާ ބުނީ ސާފްގެ މުބާރާތްތަކުގައި ކަންކަން ދިމާވާގޮތް ވަރަށް ރަނގަޅަށް ތަޖުރިބާކޮށްފައިވާ ކަމަށެވެ. އަދި، ސާފް އިން އިސްތިހާރުކުރުމާއި އެ ފަދަ ބޭނުންތަކަށްޓަކައި އަބަދުވެސް މުބާރާތް ބާއްވާ ގައުމާއި އިންޑިއާގެ ކުރިމަތިލުމެއް ފައިނަލުގައި އޮންނަން ބޭނުންވާ ކަމަށެވެ.
"އިސްތިހާރަށް ފައިދާވަނީ އިންޑިއާ އާއި ބަންގްލަދޭޝް ފައިނަލުގައި ކުޅޭގޮތަށް ކަމަންވަންޏާ އެ މީހުން ފައިނަލަށް ގެންގޮސްދީފައި. ބާކީ ގައުމުތައް ފޮނުވާލާ، އަހަރެމެންގެ ވަގުތު ބޭކާރު ނުކުރޭ، އެހެން ފަހަރަކުން އަހަރެމެން ކުޅެފާނަން،" މުތައިރީ ބުންޏެވެ.
މުތައިރީ ބުނީ، އިންޑިއާ އަށް ސާފްގައި ނުކުޅެވޭނަަމަ، އެކި ގޮތްގޮތް ހޯދައިގެން ވެސް އެ ޓީމަށް ކުޅެވޭނެ ގޮތެއް ސާފް އިން ބަލާ ކަމަށެވެ. އެކަމަކު، އެހެން ގައުމަކަށް ނުކުޅެވުނަސް މުބާރާތް ކުރިއަށް ގެންދަން ނިންމާފައި އޮތް ގޮތަށް އެ ގައުމެއް ނުލައި ވެސް ކުރިއަށްގެންދާނެ ކަމަށެވެ.
ބޫޓާނާއި ސްރީ ލަންކާ މެޗު އެއްވަރުވުމާ އެކު، ބަންގްލަދޭޝް ވަނީ ސެމީ އަށް ދަތުރުކޮށްފަ އެވެ. އެއީ، ފުރަަތަމަ މެޗުން 1-0 އިން ބޫޓާން ބަލިކޮށްފައިވާތީ އެވެ. ބުދަ ދުވަހު، ބަންގްލަދޭޝް އަތުން ސްރީ ލަންކާ ދެ ގޯލުގެ ފަރަގަކުން ބަލިވެއްޖެނަމަ، ބޫޓާނަށް ސެމީގެ އަނެއް ޖާގަ ލިބޭނެ އެވެ. އެ ނޫން ގޮތަކަށް، ބަންގްލަދޭޝް އާއި ސްރީ ލަންކާ މެޗު ނިމިއްޖެނަމަ، ސެމީގެ އަނެއް ޖާގަ ލިބޭނީ ސްރީ ލަންކާ އަށެވެ.
މުތައިރީ ބުނީ، ބަންގްލަދޭޝް އާއި ސްރީ ލަންކާ ކުޅޭ މެޗު ވެގެންދާނީ ސާފްގެ ތާރީހުގައި ވެސް ހާއްސަ މެޗަކަށް ކަމަށެވެ.
ސްރީ ލަންކާ އިން 1995 ވަނަ އަހަރު ސާފް ކާމިޔާބުކުރިއިރު، ބަންގްލަދޭޝް އިން 2003 ވަނަ އަހަރު އަމިއްލަ ގައުމުގައި މުބާރާތް ހޯސްޓްކޮށް ޗެމްޕިއަންކަން ހޯދި އެވެ.
