ފީފާ އިންޓަނޭޝަނަލް ބްރޭކް މިއަދު ފެށުމާ އެކު، އިނގިރޭސި ކްލަބް، ޝެފީލްޑް ޔުނައިޓެޑަށް ކުޅެމުން އަންނަ ބަންގްލަދޭޝްގެ މިޑްފީލްޑަރު، ހަމްޒާ ޗޯދުރީ، ޓެކްނޯ ސާފް ޗެމްޕިއަންޝިޕް 2026 ގައި ކުޅުމަށް ބަންގްލަދޭޝަށް ގޮސްފި އެވެ.
ފީފާ ބްރޭކް އޮތީ މިއަދުން ފެށިގެން މި މަހުގެ 17 ވަނަ ދުވަހުގެ ނިޔަލަށް ކަމަށްވާތީވެ، މިހާތަނަށް މުބާރާތުގައި ކުުޅުނު ގިނަ މެޗުތަކަށް ޕްރޮފެޝަނަލް ކްލަބްތަކުން ކުޅުންތެރިން ރިލީސްކޮށްފައިނުވެ އެވެ. އެއީ، އެ ކްލަބްތަކުގެ މެޗުތައް ކުޅެން ޖެހޭތީ އެވެ. އެ ގޮތުން، ލެސްޓާ ސިޓީގެ ކުރީގެ މިޑްފީލްޑަރު، ހަމްޒާ މިއަދު ޑާކާ އަށް އައިއިރު، އިނގިރޭސި ފަސް ވަނަ ޑިވިޝަނުގައި ކުޅޭ ފަރްހާން އަލީ ވާހިދު ވެސް މިއަދު ބަންގްލަދޭޝް ޓީމާ ގުޅޭނެ އެވެ.
ހަމްޒާ އާއި ފަރްހާން ނުލައި، ބަންގްލަދޭޝް އިން ވަނީ މިދިޔަ ބުރާސްފަތި ދުވަހު، މި ފަހަރުގެ ސާފް ޗެމްޕިއަންޝިޕްގައި ކުޅުނު ފުރަތަމަ މެޗުން ބޫޓާން އަތުން 1-0 އިން މޮޅުވެފަ އެވެ. ހަމްޒާ އާއި ފަރުހާން ހިމަނައިގެން ބަންގްލަދޭޝް އިން ކުޅޭ ފުރަތަމަ މެޗުގައި އަންނަ ބުދަ ދުވަހު ކުޅޭނީ ސްރީ ލަންކާއާ އެވެ. ބަންގްލަދޭޝަށް މިހާރު ވެސް ވަނީ ސެމީ ފައިނަލުން ޖާގަ ލިބިފަ އެވެ.
އިނގިރޭސި 21 އަހަރުން ދަށުގެ ޓީމަށް ހަތް މެޗު ކުޅެފައިވާ، ހަމްޒާ ބަންގްލަދޭޝަށް ސީނިއާ ލެވަލްގައި ކުޅެން ނިންމީ މީގެ އަހަރެއް ކުރިންނެވެ. ބަންގްލަދޭޝް ގައުމީ ޓީމަށް މިހާތަނަށް ކުޅެދިން 13 މެޗުން ހަތަރު ލަނޑު ޖަހާފައިވާ ހަމްޒާ އެންމެ ފުރަތަމަ ބަންގްލަދޭޝަށް ކުޅެދިން މެޗަކީ މިދިޔަ އަހަރުގެ މާޗް މަހު އިންޑިއާއާ 0-0 އިން އެއްވަރުވި މެޗުގަ އެވެ.
މި ފަހަރުގެ ސާފް ޗެމްޕިއަންޝިޕަކީ، ސަރަހައްދުގެ މި މުބާރާތުގައި ހަމްޒާ ކުޅޭ ފުރަތަމަ ފަހަރެވެ. ބަންގްލަދޭޝް އިން ހަަތަރު ވަނަ ފަަހަރަށް ސާފް ޗެމްޕިއަންޝިޕް ހޯސްޓްކުރާއިރު، އެ ޓީމުން ތަށި ހޯދީ އެންމެ ފުރަތަމަ މުބާރާތް ބޭއްވި އަހަރު ކަމަށްވާ 2003 ގަ އެވެ. އެއީ، ފައިނަލުގައި ޕެނަލްޓީ ޖަހައިގެން ރާއްޖެ ބަލިކޮށްފަ އެވެ.
ފީފާ ބްރޭކު ފެށުމާ އެކު، ސެމީ ފައިނަލަށް ދަތުރުކޮށްފައިވާ ޕާކިސްތާނަށް ވެސް ޔޫރަޕް ކުޅޭ ކުޅުންތެރިން ޓީމަށް ގެނެވޭނެ އެވެ. ޕާކިސްތާނުން ގްރޫޕްގެ ދެ މެޗު ކުޅުނީ ވެސް އެ ކުޅުންތެރިން ނުލަ އެވެ. އެ ގޮތުން، ފުރަތަމަ މެޗުން އިންޑިއާ އަތުން 3-2 އިން ބަލިވި، ޕާކިސްތާން ވަނީ ދެ ވަނަ މެޗުގައި 3-0 އިން ރާއްޖެ ބަލިކޮށްފަ އެވެ.
