ދިވެހި ރައްޔިތުންނަށް ބޭނުންވާ ހިދުމަތްތައް ފުރިހަމައަށް ދެމުން، ރާއްޖޭގެ ރަށްރަށުގައި އެކަށީގެންވާ މިންވަރަށް މި އަހަރު މަޝްރޫއުތައް ކުރިއަށް ގެންދެވުނު ކަމަށް ފުނަދޫ ދާއިރާގެ މެންބަރު، މުހައްމަދު މަމްދޫހު ވިދާޅުވެއްޖެ އެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅައިފައިވާ ބަޖެޓަށް ބަހުސްކުރައްވަމުން މަމްދޫހު ވިދާޅުވީ މި އަހަރަކީ ބޯހިޔާވަހިކަމުގެ މައްސަލައަށް ހައްލު ހޯދުމަށްޓަކައި ރާއްޖޭގެ ތާރީހުގައި ވެސް އެންމެ ގިނަ މަސައްކަތްތައް ފެށިގެންދިޔަ އަހަރު ކަމަށެވެ.
"ދަރަނި ބަރާބަރަށް އަދާކުރަމުން، ރައްޔިތުންނަށް ދޭންޖެހޭ ހިދުމަތްތައް ފުރިހަމައަށް ދެމުން، ސަރުކާރުގެ ޕްރޮޖެކްޓުތައް އެކަށީގެންވާ މިންވަރަކަށް ރާއްޖޭގެ ރަށްރަށުގައި ހިންގަމުން، އަދި އިއްޒަތްތެރި ރައީސް އަޅުގަނޑު ފާހަގަކޮށްލަން،" މަމްދޫހު ވިދާޅުވި އެވެ.
"މި އަހަރަކީ އަޅުގަނޑުމެންނަށް މި ދެންނެވި ދަރަނީގެ އުނދަގޫ އެންމެ ބޮޑު އަހަރަށްވީ ނަމަވެސް ދިވެހިރާއްޖޭގެ، މުޅި ދިވެހިރާއްޖެއަށް އަޅުގަނޑުމެން ބަލައިލީމާ އެންމެ ބޮޑެތި މައްސަލަތަކަށް ހައްލު ހޯދުމަށް، ހާއްސަކޮށް ބޯހިޔާވަހިކަމުގެ މައްސަލައަށް ހައްލު ހޯދުމަށް އެންމެ ކާމިޔާބު އެންމެ ގިނަ މަސައްކަތްތައް ފެށިގެންދިޔަ އަހަރަކީ މި އަހަރު."
މަމްދޫހު ވިދާޅުވީ އެ ކަންކަން އެގޮތަށް ކުރެވުނީ ރާއްޖޭގެ މާލީ ހާލަތު ރަނގަޅު ކުރުމަށް މި ސަރުކާރުން ކުރި މަސައްކަތުން ކަމަށެވެ. އެގޮތުން، މި އަހަރު އެކަނި ވެސް ދަރަނީގެ ގޮތުގައި ދެއްކި މިންވަރަކީ ރާއްޖޭގެ ތާރީހުގައި ވެސް ދެއްކި އެންމެ ބޮޑު އަދަދުކަން އޭނާ ފާހަގަކުރެއްވި އެވެ.
މަމްދޫހު ވިދާޅުވީ އަންނަ އަހަރަށް ލަފާކޮށް މަޖިލީހަށް ހުށަހަޅައިފައިވާ ބަޖެޓަކީ ވަރަށް އުއްމީދީ ބަޖެޓެއް ކަމަށާއި، ރާއްޖޭގެ އެކި ކަންކޮޅުތަކުގައި މިހާރު ފަށާފައި ހުރި މަޝްރޫއުތަކުގެ ބޮޑު ބައެއް އެ ބަޖެޓުގެ ތެރެއިން ނިންމައިލެވޭނެކަމުގެ ޔަގީންކަން އެބަ އޮތްކަމަށް އޭނާ ވިދާޅުވި އެވެ.
އަންނަ އަހަރަށް ލަފާކޮށް ފިނޭންސް މިނިސްޓަރު ހަސަން ޒަރީރު މަޖިލީހަށް ހުށަހެޅުއްވީ 59.7 ބިލިއަން ރުފިޔާގެ ބަޖެޓެކެވެ. މިއީ މި އަހަރަށް ފާސްކުރި 64.2 ބިލިއަން ރުފިޔާގެ ބަޖެޓާ އަޅައިބަލާއިރު ގާތްގަނޑަކަށް 4.5 ބިލިއަން ރުފިޔާ ކުޑަ އަދަދެކެވެ.
ޖުމްލަ ބަޖެޓު ކުޑަވި ނަމަވެސް، އަންނަ އަހަރު ދައުލަތުގެ ހަރަދުތައް 52.6 ބިލިއަން ރުފިޔާއަށް އަރައި، މި އަހަރަށް ވުރެ 3.3 ބިލިއަން ރުފިޔާ އިތުރުވާނެ އެވެ. މީގެ ތެރެއިން ސަރުކާރު ހިންގުމުގެ ރިކަރަންޓު ހަރަދު 42.7 ބިލިއަން ރުފިޔާގައި ހިފެހެއްޓުމަށް ބަޖެޓުކޮށްފައިވާއިރު، ތަރައްގީގެ މަޝްރޫއުތަކުގެ ހަރަދު ވަނީ 9.9 ބިލިއަން ރުފިޔާއަށް އިތުރުވެފަ އެވެ.
ހަރަދުތައް ބޮޑުވުމުގެ ސަބަބުން އަންނަ އަހަރުގެ ބަޖެޓު ޑެފިސިޓު 9.4 ބިލިއަން ރުފިޔާއަށް އަރާނެ ކަމަށް ވަނީ އަންދާޒާކޮށްފަ އެވެ. މިއީ މި އަހަރު ނިމޭއިރު ޑެފިސިޓު ހުންނާނެ ކަމަށް ލަފާކުރާ އަދަދަށް ވުރެ 25 އިންސައްތައިގެ އިތުރުވުމެކެވެ.
ޖުމްލަ ބަޖެޓު ދަށްވީ އަންނަ އަހަރު އަނބުރާ ދައްކަން ޖެހޭ ދަރަނީގެ އަދަދު 4.5 ބިލިއަން ރުފިޔާއަށް މަދުވުމުންނެވެ.
