ނިމިދިޔަ އެމްޑީޕީ ވެރިކަމުގެ ފަސް އަހަރުދުވަހުގެ ތެރޭގައި ފާސްކުރި ޖުމުލަ ބަޖެޓުގެ އަދަދަށްވުރެ 108 ބިލިއަން ރުފިޔާ އިތުރަށް މި ސަރުކާރުގެ ފުރަތަމަ ތިން އަހަރު ބަޖެޓުގެ ގޮތުގައި ފާސްކުރި ނަމަވެސް، ރައްޔިތަކަށްވީ އެއްވެސް ފައިދާއެއް ނެތް ކަމަށް ހަނިމާދޫ ދާއިރާގެ މަޖިލިސް މެންބަރު، އަބްދުލްޣަފޫރު މޫސާ ވިދާޅުވެއްޖެ އެވެ.
އަންނަ އަހަރަށް ލަފާކުރާ ބަޖެޓަށް މަޖިލީހުގައި މިއަދު ބަހުސްކުރައްވަމުން ޣަފޫރު ވިދާޅުވީ އެމްޑީޕީ ވެރިކަމުގެ ފަސް އަހަރު ނިމިގެންދިޔައިރު މަޖިލީހުން ފާސްކޮށްދީފައި ވަނީ ޖުމުލަ 182 ބިލިއަން ރުފިޔާ ކަމަށް ޣަފޫރު ވިދާޅުވި އެވެ. ނަމަވެސް، މި ވެރިކަމުގެ ފުރަތަމަ ތިން އަހަރުދުވަހުގެ ބަޖެޓުގެ ގޮތުގައި 290 ބިލިއަން ރުފިޔާ ހޭދަކޮށްފައިވާ ކަމަށް އޭނާ ވިދާޅުވި އެވެ.
"ރައްޔިތުން ސަރުކާރުތައް ބަދަލުކުރަނީ ރައްޔިތުންގެ އުއްމީދާއި ކުރިމަގަށްޓަކައި އެ މީހުން ބޭނުންވާ ކަންކަން ހާސިލު ކުރުމަށްޓަކައި އެ ކަންކަން ހާސިލުވެގެންދާ މަންޒަރު ރައްޔިތުންނަށް ފެންނަންޖެހޭނެ އިއްޒަތްތެރި ރައީސް، އެކަމެއް ނުހިނގާ އެއްވެސް ރަށެއްގައެއް، އެކަށީގެންވާ ޕްރޮޖެކްޓެއް ރާއްޖޭގެ އެއްވެސް ރަށެއްގައެއް ހިނގަމަކުން ނުދޭ،" ޣަފޫރު ވިދާޅުވި އެވެ.
ޣަފޫރު ވިދާޅުވީ މި އަހަރަށް ކަނޑައެޅި 64 ބިލިއަން ރުފިޔާގެ ބަޖެޓު ހުސްވެގެންދާއިރު ރައްޔިތަކަށް އެއްވެސް ކަމެއް ނުވާ ކަމަށެވެ. އޭގެ ސަބަބަކީ ސަރުކާރުގެ ތެރޭގައި އިންތިހާއަށް ކޮރަޕްޝަން ހިންގަމުން ގެންދިޔުން ކަމަށާއި ދައުލަތުގެ ބަޖެޓުގެ 30 ޕަސެންޓު ހުސްވެގެން ދަނީ ވައްކަމުގެ ތެރެއިން ކަމަށް އޭނާ ތުހުމަތުކުރެއްވި އެވެ.
އަންނަ އަހަރުގެ ނިޔަލަށް ރާއްޖޭގެ ހުރިހާ ރަށެއްގައި ފެނާއި ނަރުދަމާ ގާއިމުކުރަންޖެހޭ ކަމަށް ގާނޫނުގައި އޮތް ނަމަވެސް، އެކަން ހާސިލުކުރެވޭ ތަން ނުފެންނަ ކަމަށް ޣަފޫރު ވިދާޅުވި އެވެ.
"އަޅުގަނޑަކަށް ނުފެނޭ އެކަން ކުރެވިގެންދާ ތަނެއް، އަޅުގަނޑަށް ފެންނަނީ އަނެއްކާ ވެސް މި އަންނަ އަހަރު ރައްޔިތުންގެ މަޖިލީހަށް ހުށަހަޅައިގެން އެ ގާނޫނު އަނެއްކާ ވެސް ބަދަލުކޮށްގެން އެހެން އަހަރަކަށް އެކަން ކުރަން ދާތަން، މި ގައުމުގެ ރައްޔިތުންނަށް ސާފު ބޯފެން ލިބެންޖެހޭނެ، މި ގައުމުގެ ރައްޔިތުންނަށް ފާހާނައިގެ ނިޒާމު ރަނގަޅަށް ލިބެންޖެހޭނެ އިއްޒަތްތެރި ރައީސް،" ޣަފޫރު ވިދާޅުވި އެވެ.
ދިވެހި ރައްޔިތުން ތިބީ ވަރަށް ނިކަމެތި ހާލުގައި ކަމަށާއި ރައްޔިތުންގެ އެ ހާލަތު ބަދަލުކުރަން އެންމެން ވެސް މަސައްކަތް ކުރަން ޖެހިފައިވާ ކަމަށް އޭނާ ވިދާޅުވި އެވެ.
ރާއްޖެއިން ބޭސް ނުލިބޭކަމާއި ސަރުކާރުގެ މުވައްޒަފުންނަށް ހަމަ މުސާރަ ނުލިބޭ މައްސަލަ އާއި ސަރުކާރަށް ތާއީދުނުކުރާ މީހުން ވަޒީފާއިން ކަނޑަމުންދާކަމުގެ ކަންބޮޑުވުން ޣަފޫޜު ފާހަގަކުރެއްވި އެވެ. އަދި، ޑޮލަރު އަގު ބޮޑުވުމުގެ ނަތީޖާއެއްގެ ގޮތުން ތަކެތީގެ އަގު އުފުލެމުންދާ ދިޔުމުގެ ކަންބޮޑުވުން ވެސް އޭނާ ފާހަގަކުރެއްވި އެވެ.
