ރާއްޖޭގެ އިގުތިސާދީ ހާލަތު ގޯސްވެ، ޑޮލަރުގެ އަގު މިއަދު ހުރީ 23ރ. އަށް ކަމަށް ހަނިމާދޫ ދާއިރާގެ މަޖިލިސް މެންބަރު، އަބްދުލްޣަފޫރު މޫސާ (ގަޕޯ) ވިދާޅުވެއްޖެ އެވެ.
އަންނަ އަހަރަށް ލަފާކުރާ ބަޖެޓަށް ބަހުސްކުރައްވަމުން ޣަފޫރު ވިދާޅުވީ ސަރުކާރުން ބޭނުންވާ ކަންކަން ކުރަންވީމާ ޑޮލަރު ހުންނަ ކަމަށެވެ. ނަމަވެސް، އާންމު ރައްޔިތުންނަށް ބޭނުންވާ ތަކެތި ހޯދަންވީމާ ސަރުކާރުގައި ޑޮލަރު ނުހުންނަ ކަމަށް އޭނާ ވިދާޅުވި އެވެ.
"23ރ. އަށް މިއަދު ޑޮލަރުގެ އަގު ހުރީ އިއްޒަތްތެރި ރައީސް، ކިހިނެއްތޯ މި ގައުމުގެ ރައްޔިތުން ކައިބޮއި އުޅޭނީ އިއްޒަތްތެރި ރައީސް، 23ރ. އަށް މި ގައުމުގައި މިއަދު ވެސް ޑޮލަރުގެ އަގު ހުރީ،" ޣަފޫރު ވިދާޅުވި އެވެ.
ކުރީ ސަރުކާރުން ނަގާފައި ހުރި ދަރަނި މި ސަރުކާރުން ދެއްކި ކަމަށް ވެރިކަންކުރާ ޕީއެންސީގެ ބޭފުޅުން ވިދާޅުވާއިރު، ރައީސް މުއިއްޒު ވެރިކަމާ ހަވާލުވެވަޑައިގެންނެވިއިރު، ރާއްޖޭގެ ދަރަނި ހުރި މިންވަރަށް ވުރެ 30 ބިލިއަން ރުފިޔާ އިތުރުވެފައިވާ ކަމަށް ޣަފޫރު ވިދާޅުވި އެވެ.
އެ އަދަދުތައް ބަޖެޓު ފޮތުން ފެންނަން އެބަހުރި ކަމަށް ޣަފޫރު ވިދާޅުވި އެވެ. އަދި، ދަރަނި އިތުރުވީ، ދަރަނި ދެއްކުމަށްޓަކައި ސަރުކާރުން ދަރަނި ނެގުމުން ކަމަށް އޭނާ ވިދާޅުވި އެވެ.
ޑޮލަރުގެ އަގު އުފުލިފައިވާކަމަށް ޣަފޫރު ވިދާޅުވިއިރު، އެ ކަމާ ގުޅޭގޮތުން މި ނޫހަށް މައުލޫމާތު ދިން ބައެއް އެހެން މީހުން ވެސް ވަނީ އެކަން ކަށަވަރުކޮށްދީފަ އެވެ.
ކަޅު ބާޒާރުގައި މީގެ ކުރިން އިންތިހާއަށް ޑޮލަރުގެ އަގު އުފުލެމުން ދިޔައީ ނޫސްތަކުގައި ހަބަރު ޖަހަމުން ދާތީކަމަށް ބުނެ މަޖިލީހުން ވަނީ ކަޅު ބާޒާރުގައި ޑޮލަރުގެ އަގު ހުންނަ މިންވަރު ރިޕޯޓުކުރުން ގާނޫނީ ގޮތުން މަނާކޮށްފަ އެވެ.
ގާނޫނަށް އެ ބަދަލުގެނައި ނަމަވެސް، ކަޅު ބާޒާރުގައި ޑޮލަރު ވިއްކުމާއި ޑޮލަރުގެ އަގަށް ބަދަލު ނާންނަކަމަށް ސޯޝަލްމީޑިއާ އާއި އެ ނޫން ވެސް އެހެން މަންސަތަކުގައި މީހުން ދަނީ ބުނަމުންނެވެ.
