ގުޅީފަޅުގެ އަސާސީ ހިދުމަތްތައް ގާއިމުކުރުމުގެ މަސައްކަތް އަވަސްކުރުމަށްޓަކައި ޕަބްލިކް ވޯކްސް ސާވިސް އާއި އެމްޓީސީސީ ގުޅިގެން ފެނާއި ނަރުދަމާ ވިއުގަ އެޅުމުގެ މަސައްކަތް ފަށަން ނިންމާފައިވާ އިންފްރާސްޓްރަކްޗާ މިނިސްޓަރު އަބްދުﷲ މުއްތަލިބު ވިދާޅުވެއްޖެ އެވެ.
މި އަހަރުގެ ކުރީކޮޅު ވެސް މުއްތަލިބު ވަނީ ހަމަ މި ބީދައިން، ގުޅީފަޅުގެ މަސައްކަތްތައް އަވަސްކުރުމަށްޓަކައި ބައެއް ބައިތައް ހަވާލުކުރާ ވާހަކަ ވިދާޅުވެފަ އެވެ. އެ ފަހަރު ވިދާޅުވީ އެ މަސައްކަތްތައް ހަވާލުކުރަނީ އެމްޓީސީސީ އާއި މިހާރު އެ ކުންފުނީގެ ދަށަށް ބަދަލުކުރަން ނިންމާފައިވާ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ ކަމަށެވެ.
ގުޅީފަޅުގެ އަސާސީ ހިދުމަތްތައް ގާއިމުކުރުމާ ގުޅޭ ގޮތުން "އަހާ" ފޯރަމްގައި މުއްތަލިބު ވިދާޅުވީ، ހިއްކާފައި ހުރި ތަންތަނުގައި ފެނާއި ނަރުދަމާ އަދި ކަރަންޓު ގާއިމުކުރުމަކީ ބިން ހިއްކަން ދިޔަ ހަރަދަށް ވުރެ ވެސް ބޮޑު ހަރަދެއް ހިނގާ ކަމެއް ކަމަށެވެ. އެ ފައިސާ ދައުލަތުގެ ބަޖެޓުން އެއްފަހަރާ ހަރަދުކުރުމަކީ ދަތި ކަމެއް ކަމަށް ވެސް އޭނާ ވިދާޅުވި އެވެ.
"މިސާލަކަށް ދަންނަވާ ކަމަށް ވަންޏާ، ގުޅީފަޅުގައި މި ދެންނެވި ހުރިހާ ހިދުމަތްތަކެއް ގާއިމުކޮށް، މަގުހެދުމަށް ޓަކައި 400 މިލިއަން ޑޮލަރަށް ވުރެ ބޮޑު އަދަދެއް ދާކަމަށް ބެލެވިފައި ވަނީ" މުއްތަލިބި ވިދާޅުވި އެވެ.
ސަރުކާރަށް މި މަޝްރޫއު ނުހިންގިގެން އުޅޭއިރު، ގުޅީފަޅުގައި ފެނާއި ނަރުދަމާ އަދި ކަރަންޓު ވިއުގަ އަޅައި، މަގުތައް ޒަމާނީ ފެންވަރަށް ތަރައްގީކުރުމަށް ޖެނުއަރީ 12، 2024 ގައި ޗައިނާ މެޝީނަރީ އިންޖިނިއަރިން ކޯޕަރޭޝަން (ސީއެމްއީސީ) އާއެކީ އެއްއޯޔޫއެއްގައި ސޮއިކުރި އެވެ. އަދި، މިދިޔަ އަހަރުގެ ޖެނުއަރީ 6، ގައި މި ކުންފުންޏާ އެކީ އެއްބަސްވުމެއްގައި ސޮއިކުރި އެވެ.
ނަމަވެސް އެ މަސައްކަތް އަމަލީ ގޮތުން ނުފެށެ އެވެ. އޭގެ އަހަރެއް ފަހުން، މި އަހަރު ކުރީކޮޅު މުއްތަލިބު ވިދާޅުވީ ސަރުކާރަށް އެހެން ގޮތެއް ހޯދަން ޖެހުނީ، އެ ކުންފުންޏަށް އެ މަޝްރޫއަށް ބޭނުންވާ ލޯނު ހަމަނުޖެހިގެން ކަމަށެވެ.
ބިންވެރިޔާ ސްކީމުގެ ދަށުން ގޯތި ދޫކުރާށާއި، އޭރު ޕޯޓު ވެސް ތަރައްގީކުރާ ގޮތަށް، ގުޅީފަޅުން 192 ހެކްޓަރަށް ވުރެ ބޮޑު ސަރަހައްދެއް ވަނީ ހިއްކާފަ އެވެ. މި ތަނުން 3،500 އަށް ވުރެ ގިނަ މީހުންނަށް ވަނީ ގޯތި ދޫކޮށްފަ އެވެ. އެއް އިރެއްގައި އެ ފަޅުގެ ފުން ސަރަހައްދު ހިމެނޭހެން 85 ހެކްޓަރު އިތުރުކުރަން ވެސް މި ސަރުކާރުން އުޅުނެވެ.
ސަރުކާރުން ވަނީ މި ތަނުން ގޯތި ލިބުނު މީހުންނާ ގޯތިތައް ހަވާލުކޮށްފަ އެވެ. އަދި އެ ތަނުން ބިން ލިބުނު ފަރާތްތަކަށް ވަށާފާރު ރޭނުމުގެ ހުއްދަ ދޭން އެޗްޑީސީން އިންތިޒާމު ހަމަޖައްސަމުން އަންނަ ކަމަށް ބުނެފަ އެވެ. ނަމަވެސް އަސާސީ ހިދުމަތްތައް ނިމި، އެ ތަނުގައި ރައްޔިތުންނަށް އާބާދުވެވޭނެ ސީދާ ތާރީހެއް އަދިވެސް ނޭނގެ އެވެ.
