ހޮރްމޫޒް ކަނޑުއޮޅި ހަތް ދުވަހުގެ ތެރޭގައި އަލުން ހުޅުވާލުމަށް އެމެރިކާއަށް ހުށަހަޅާފައިވާ ހުށަހެޅުން އަދިވެސް އޮތީ އެގޮތުގައި ކަމަށް އީރާނުގެ ފޮރިން މިނިސްޓަރު އައްބާސް އަރާގްޗީ އާދީއްތަ ދުވަހު އެ ގައުމުގެ މީޑިއާތަކަށް ވިދާޅުވެއްޖެ އެވެ.
އީރާނުން މި ހުށަހެޅުން އެމެރިކާއަށް ހުށަހެޅީ ވަގުތީ ގޮތުން ހަމަލާ ބަދަލުކުރުން ހުއްޓާލުމަށް ވެފައިވާ އެއްބަސްވުން ސެޕްޓެމްބަރު މަހުގެ މެދުތެރޭގައި އުވާލުމާ ގުޅިގެންނެވެ. އެމެރިކާގެ ފަރާތުން އެ ހުށަހެޅުމަށް ޖަވާބެއް ލިބިފައިވާ ކަމަށް ފަހުން އީރާނުން ވަނީ އެއްބަސްވެފަ އެވެ.
ނަމަވެސް، ހޮރްމޫޒް ކަނޑުއޮޅި ހުޅުވާލުމަށް އީރާނުން ހުށަހެޅި ހަތް ޝަރުތަށް ވޮޝިންޓަނުން ފުރިހަމައަށް އިޖާބަދީފައި ނުވާތީ، މަޝްވަރާތައް ހުއްޓިފައިވާ ކަމަށް އީރާނުގެ ސަލާމަތީ ކަންކަމާ ބެހޭ އިސްވެރިޔާ މިދިޔަ ހަފުތާގައި ވަނީ ވިދާޅުވެފަ އެވެ.
އޯއައިސީގެ ބައްދަލުވުމަކަށް ބަގުދާދަށް ކުރެއްވި ދަތުރުގައި އަރާގްޗީ ވިދާޅުވީ، އީރާނުގެ މަގާމު ވަރަށް ސާފު ކަމަށާއި އެއީ އެމެރިކާއަށް ހުށަހަޅާފައިވާ ހަތް ދުވަހުގެ ތެރޭގައި ކަނޑުއޮޅި ހުޅުވާލުމުގެ ހުށަހެޅުން ކަމަށެވެ. އަދި އެމެރިކާގެ ފަރާތުން ލިބުނު ޚިޔާލުތައް އީރާނުން ދިރާސާކުރަމުންދާ ކަމަށާއި، ނަމަވެސް އީރާނުގެ ހުށަހެޅުން އަދިވެސް އޮތީ މޭޒުމަތީގައި ކަމަށް އޭނާ ވިދާޅުވި އެވެ.
މީގެ އިތުރުން، އެމެރިކާގެ ކިބައިގައި އިޚުލާސްތެރިކަމެއް ހުރި ނަމަ ހޮރްމޫޒް ކަނޑުއޮޅި ހުޅުވާލާނެ މަގު އޮތީ ވަރަށް ސާފުކޮށް ފެންނަން ކަމަށާއި، އެކަމަކު އެމެރިކާގެ ކިބައިގައި އެފަދަ އިޚުލާސްތެރިކަމެއް ނެތް ކަމަށް ވެސް އޭނާ ވިދާޅުވި އެވެ.
އީރާނުން ހުށަހަޅާފައިވާ ޝަރުތުތަކުގެ ތެރޭގައި، އެ ގައުމުގެ ބަނދަރުތަކަށް އެމެރިކާއިން ކުރިމަތިކޮށްފައިވާ ހުރަސްތައް ނައްތާލުމާއި، އީރާނުގެ ތެޔޮ އެކްސްޕޯޓް ކުރުމަށް އަޅާފައިވާ ދަތިކުރުމުގެ ފިޔަވަޅުތައް އުވާލުމުގެ އިތުރުން، ސަރަހައްދީ ހުރިހާ ފްރަންޓްތަކެއްގައި ކުރިއަށްދާ ހަނގުރާމަވެރި އަމަލުތައް ހުއްޓާލުން ހިމެނެ އެވެ.
ވޮޝިންޓަނުން ތެހެރާނުގެ މި ޝަރުތުތައް ގަބޫލުކޮށްފި ނަމަ، ހަ ދުވަހުގެ ތެރޭގައި ކަނޑުއޮޅި ހުޅުވާލެވިދާނެ ކަމަށާއި، އޭގެ އަނެއް ދުވަހު މަޝްވަރާތައް އަލުން ފެށޭނެ ކަމަށް އަރާގްޗީ ވިދާޅުވި އެވެ.
ދެ ގައުމުގެ މެދުގައި އެންމެ ބޮޑު ޚިޔާލުތަފާތުވުމެއް އުފެދިފައިވަނީ، މަޝްވަރާތައް ފަށާއިރު އެންމެ ފުރަތަމަ ވެސް އީރާނުގެ ނިއުކްލިއާ ޕްރޮގްރާމާ ބެހޭ ގޮތުން ވާހަކަދެއްކުމަށް ވޮޝިންޓަނުން ބާރުއަޅަމުންދާ މައްސަލައިގަ އެވެ.
އެމެރިކާގެ ނައިބު ރައީސް ޖޭޑީ ވެންސް މި މަހުގެ ކުރީކޮޅު ވިދާޅުވެފައިވަނީ، އެމެރިކާގެ ޝަރުތުތައް ފުރިހަމަކުރުމަށާއި އަށް މަސް ދުވަހަށް ދެމިގެން ގޮސްފައިވާ ހަނގުރާމަ ނިމުމަކަށް ގެނައުމަށްޓަކައި، އީރާނުން ޔުރޭނިއަމް މުއްސަނދިކުރާ މިންވަރު "ފާހަގަކުރެވޭ" މިންވަރަކަށް ދަށްކުރަން ޖެހޭނެ ކަމަށެވެ.
ނަމަވެސް ތެހެރާނުން ބުނަމުންދަނީ މަޝްވަރާތައް އެންމެ ފުރަތަމަ އަމާޒުކުރަންވާނީ ހޮރްމޫޒް ކަނޑުއޮޅި އަލުން ހުޅުވާލުމަށާއި އެ ސަރަހައްދުގެ ސަލާމަތީ ކަންކަން ކަށަވަރުކުރުމަށް ކަމަށެވެ.
