މިހާރު އޮތް ގޮތަށް ކުރިއަށް ނުގެންގޮސް ރަސްމާލޭގައި ބިދޭސީން ވަޒަންވެރި ކުރުވުމުގެ ޕްރޮޖެކްޓު ހުއްޓާލަން ގޮވާލައި އިލްމުވެރިންގެ ގުޅުން ޖަމިއްޔާއިން ނެރުނު ރައުޔު ފައިނަލްކޮށް، ރައީސް މުހައްމަދު މުއިއްޒަށް އަދި ރައްޔިތުންގެ މަޖިލީހަށް ފޮނުވައިފި އެވެ.
އިޒްރޭލު އަދި ޒަޔަނިސްޓުންނާ ގާތް ގުޅުމެއް އޮންނަ ޔޫއޭއީގެ މުހައްމަދު އަލައްބާރަށް ރަސްމާލެ ވިއްކާލާ ޕްރޮޖެކްޓު މިހާރު ރާވާފައި އޮތް ގޮތަށް ކުރިއަށް ނުގެންގޮސް ހުއްޓާލުމަކީ ސަރުކާރުގެ ދީނީ ވާޖިބެއް ކަމަށް ބުނެ ތަހުގީގީ ދިރާސާއެއްގެ ޑްރާފްޓެއް އިލްމުވެރިންގެ ގުޅުމުން މެންބަރުންނަށް ފޮނުވީ އޮކްޓޯބަރު 17، ގަ އެވެ.
އެ ދިރާސާ މެންބަރުންނަށް ފޮނުވައި، ކޮމެންޓު ކުރަން ފުރުސަތު ދިނުމަށްފަހު މިހާރު ފައިނަލްކޮށްފައިވާކަން އަދަދު އަށް އެނގިފައިވެ އެވެ. އަދި އެ ދިރާސާ ފައިނަލް ކުރިއިރު، އެއްވެސް ބަޔަކަށް ބަދަލެއް ގެނެސްފައިނުވާކަން ވެސް އެނގިފައިވެ އެވެ.
އިލްމުވެރިންގެ ގުޅުމުގެ ދިރާސާ މި ހަފުތާގެ ތެރޭގައި ވަނީ ރައީސް މުއިއްޒާއި ރައްޔިތުންގެ މަޖިލީހަށް އަދި ސަރުކާރުގެ ބައެއް އެހެން ވުޒާރާތަކަށް ފޮނުވައިފަ އެވެ.
އެ ޖަމިއްޔާގެ ދިރާސާގައި ބުނެފައި ވަނީ، ކާފަރުންނާއެކު ވިޔަފާރިކޮށް ގުޅުން ބަދަހި ކުރެވޭނެ ކަމަށާއި ނަމަވެސް އެކަން ކުރަންޖެހޭނީ އިސްލާމީ ހަމަތަކާ އެއްގޮތަށް ކަމަށެވެ. ރަސްމާލެ ޕްރޮޖެކްޓުގައި މިވަގުތު އެ ޝަރުތުތައް ހަމަނުވާ ކަމަށް ފާހަގަކޮށް އެ ދިރާސާގައި ބުނެފައި ވަނީ ރަސްމާލެ ޕްރޮޖެކްޓު ހުއްޓުވުމަކީ ސަރުކާރުގެ މައްޗަށް އޮތް ދީނީ ވާޖިބެއް ކަމަށެވެ.
"ގާނޫނީ ގޮތުން މި ޕްރޮޖެކްޓު މަޑުޖައްސާލުމުގެ ބާރު ސަރުކާރަށް އަދިވެސް އެބަ އޮތް. އަދި މި ޕްރޮޖެކްޓު މަޑުޖައްސާލުމަކީ ސަރުކާރަށް ގާނޫނީ ގޮތުން ލާޒިމް ކަމެއް. ޕްރޮޖެކްޓު އިތުރަށް ކުރިއަށްގެންދަންޖެހޭނީ އަލުން ނެގޯޝިއޭޓްކޮށްގެން،" އެ ދިރާސާގައި ބުނެފައިވެ އެވެ.
ރަސްމާލެ ޕްރޮޖެކްޓު ހުއްޓާލަންޖެހޭ ކަމަށް އިލްމުވެރިންގެ ގުޅުމުން ބުނެފައިވާއިރު، ވަކި ޝަރުތުތަކެއް ކަނޑައެޅުމަށްފަހު ރާއްޖޭގައި އަދި ރަސްމާލޭގައި ކާފަރުން ވަޒަންވެރި ކުރުވުމަކީ މައްސަލައެއް ނޫން ކަމަށް ޖަމިއްޔަތުއްސަލަފުން މިއަދު އާންމު ކުރި ބަޔާނެއްގައި ވަނީ ބުނެފަ އެވެ.
"މިފަދަ ހާއްސަ ސަރަހައްދުތަކުގެ ސަބަބުން މުސްތަގްބަލުގައި ދީނީ މިނިވަންކަމަށް ވަކާލާތު ކުރުމުގެ ފުރުސަތު ފަހިވެ، ދިވެހި މުޖްތަމައުގެ އިސްލާމީ ޝަހުސިއްޔަތަށާއި ގައުމުގެ ސިޔާދަތާއި މިނިވަންކަމަށާއި ޒަމާނުއްސުރެ ދަމަހައްޓަމުން އައި އިސްލާމީ ގައުމީ އުސޫލުތަކަށާއި ގާނޫނުއަސާސީން ކަށަވަރުކޮށްދީފައިވާ ސައްތައިން ސައްތަ އިސްލާމީ ދައުލަތެއްގެ ގޮތުގައި ދެމިއޮތުމުގެ ދުސްތޫރީ ނިޒާމަށް އެއްވެސް ނޭދެވޭ އަސަރެއް ނުފޯރާނެ ފަދަ ހަރުދަނާ އުސޫލެއްގެ މަތިން އެއްބަސްވުންތަކާއި ގާނޫނީ އޮނިގަނޑު އެކުލަވައިލުމަށް އަދުގެ ސަރުކާރަށާއި މުސްތަގްބަލުގައި އަންނަން އޮތް ސަރުކާރުތަކަށް އިހުލާސްތެރިކަމާއެކު އަޅުގަނޑުމެން އިލްތިމާސް ކުރަން،" އެ ބަޔާނުގައިވެ އެވެ.
ސަރުކާރުން ބުނަނީ ރަސްމާލެ ދޫކޮށްލަނީ 99 އަހަރަށް ކަމަށެވެ. އެކަމަކު އަލައްބާރުގެ އީގަލް ހިލްސް ކުންފުނިން ބުނީ ރަސްމާލެއިން ފުރަތަމަ ލިބޭ 99 އަހަރުގެ ކުލީގެ މުއްދަތު ހަމަވުމުގެ ކުރިން އެތަން ވިއްކާލައިފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ. އެހެންކަމުން ދިވެހިންގެ އަތުން ރަސްމާލެ ތާއަބަދަށް ގެއްލޭނެ އެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރަން މަސައްކަތް ކުރަނީ ނޮވެމްބަރު 11، ގަ އެވެ. އެއީ ރާއްޖޭގެ ޖުމްހޫރީ ދުވަހެވެ.
ރަސްމާލެ ވިއްކާލަން ސަރުކާރުން ޑީލެއް ހެދީ، އެތަނުގެ ވެލިފުކެއް އެންމެ ދުވަހަކަށް ނަމަވެސް ބޭރުގެ ބަޔަކަށް ކުއްޔަށް ނުވަތަ ހިލޭ ވެސް ނުދޭން ރައީސް މުހައްމަދު މުއިއްޒު ވައުދުވެވަޑައިގެންނެވުމަށްފަހު އެވެ.
"އެތަނުން [ރަސްމާލެއިން] ހިއްކާ ކޮންމެ ބިމެއްގެ، ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް. އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭ ވެސް ލިބޭނެ ބިމެއްނޫން، ދެން އެތަނުން ހިކިގެން ދާނީކީއެއް،" މުއިއްޒު ވިދާޅުވެފައިވެ އެވެ.
