ސަރުކާރު ހިންގުމަށް ދައުލަތުގެ ބަޖެޓުން ކުރާ ހަރަދު އަންނަ އަހަރު ވެސް ހުންނާނީ މި އަހަރާ އެއް މިންވަރެއްގައި ކަމަށް ސަރުކާރުން އަންދާޒާކޮށްފި އެވެ.
އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅައިފައި ވަނީ 59.7 ބިލިއަން ރުފިޔާގެ ބަޖެޓެކެވެ. އެ ބަޖެޓު މަޖިލީހަށް ހުށަހަޅުއްވަމުން ފިނޭންސް މިނިސްޓަރު، ހަސަން ޒަރީރު ވިދާޅުވީ އަންނަ އަހަރު ސަރުކާރު ހިންގުމުގެ ޖުމުލަ ހަރަދުގެ ގޮތުގައި 52.6 ބިލިއަން ރުފިޔާ ހަރަދުވާނެ ކަމަށެވެ.
"އެއީ ހިންގުމުގެ ހަރަދު ނުވަތަ ރިކަރަންޓް ހަރަދުގެ ގޮތުގައި 42.7 ބިލިއަން ރުފިޔާ. އަދި ތަރައްގީގެ މަޝްރޫއުތަކާއި އިންވެސްޓްމަންޓްތައް ހިމެނޭ ކެޕިޓަލް ހަރަދުގެ ގޮތުގައި 9.9 ބިލިއަން ރުފިޔާ. މީގެ ތެރޭގައި ތަރައްޤީގެ މަޝްރޫއުތައް ކުރިއަށް ގެންދިއުމަށްޓަކައި ޕަބްލިކް ސެކްޓާ އިންވެސްޓްމަންޓް ޕްރޮގްރާމަށް ކަނޑައަޅާފައިވާ 8.2 ބިލިއަން ރުފިޔާ ހިމެނޭ،" ޒަރީރު ވިދާޅުވި އެވެ.
މި އަހަރުގެ މިހައިތަނަށް ދައުަލަތުގެ ބަޖެޓުން ސަރުކާރުގެ ރިކަރެންޓު ހަރަދުތަކަށް 42.5 ބިލިއަން ރުފިޔާ ވަނީ ހަރަދުކޮށްފަ އެވެ. އޭގެ ކުރީ އަހަރު ރިކަރެންޓު ހަރަދުތަކަށް ހޭދަކޮށްފައި ވަނީ 37.4 ބިލިއަން ރުފިޔާ އެވެ.
މިއަދު މަޖިލީހަށް ހުށަހެޅި ބަޖެޓުގައި އަންނަ އަހަރު ހިލޭ އެހީ އާއި އާމްދަނީގެ ގޮތުގައި ދައުލަތަށް ލިބޭނެ ކަމަށް އަންދާޒާކޮށްފައި ވަނީ 43.2 ބިލިއަން ރުފިޔާ އެވެ. މިއީ މި އަހަރު ލިބޭނެ ކަމަށް އަންދާޒާކޮށްފައިވާ އަދަދަށްވުރެ 1.4 ބިލިއަން ރުފިޔާ އިތުރު އަދަދެކެވެ.
ޒަރީރު ވިދާޅުވީ އަންނަ އަހަރުގެ އާމްދަނީ އިތުރުކުރުގެ ގޮތުން ދައުލަތަށް ނަގާ އެއްވެސް ޓެކުހެއް މަތި ކުރުމަށް ބަޖެޓުގައި ހިމަނައިފައި ނުވާނެ ކަމަށެވެ. އޭގެ ބަދަލުގައި އަންނަ އަހަރު މަސައްކަތް ކުރާނީ ދައުލަތުގެ ޓެކުހުގެ ނިޒާމު ހަރުދަނާކޮށް މިހާރު ހުރި ބާގަނޑުތައް ބައްދައި ޓެހުކުގެ ގާނޫނުތަކާއި ގަވާއިދުތަކަށް އަމަލުކުރާ މިންވަރު އިތުރު ކުރުމަށް މަސައްކަތް ކަމަށް އޭނާ ވިދާޅުވި އެވެ.
އެގޮތުން، މި އަހަރު އަލަށް ތައާރަފުކުރި މޯލްޑިވްސް ގެސްޓް އިންފޮމޭޝަން ސިސްޓަމުގެ ބޭނުން އިތުރަށް ފުޅާކޮށް ޓެކުހުގެ ނިޒާމު ހަރުދަނާ ކުރުމަށްޓަކައި އިލެކްޓްރޯނިކް އިންވޮއިސިން ނިޒާމެއް ތައާރަފުކުރުމަށް ނިންމާފައިވާ ކަމަށް ޒަރީރު ވިދާޅުވި އެވެ.
އޭގެ އިތުރުން، ކަސްޓަމްސްގެ ފިސްކަލް މެންޑޭޓު ފިނޭންސް މިނިސްޓްރީން ބެލެހެއްޓުމަށް ބަދަލުކުރުމަށާއި ޓެކުހުގެ ގާނޫނުތަކަށް އިސްލާހުތައް ގެނައުމަށް އަންނަ އަހަރަށް ލަފާކުރާ ބަޖެޓުގައި ހިމަނައިފައިވާނެ ކަމަށް އޭނާ ވިދާޅުވި އެވެ.
