ރާއްޖޭގެ އެކި ސަރަހައްދުގައި އަންނަ އަހަރު ކުރިއަށް ގެންދަން ނިންމާފައިވާ ބޯހިޔާވަހިކަމުގެ މަޝްރޫއުތަކަށް ހަރަދު ކުރުމަށް އަންނަ އަހަރަށް ލަފާކުރާ ބަޖެޓުގައި ތިން ބިލިއަން ރުފިޔާ އަދި، ސިއްހީ ދާއިރާއަށް 10.2 ބިލިއަން ރުފިޔާ ހިމަނައިފައިވާ ކަމަށް ފިނޭންސް މިނިސްޓަރު، ހަސަން ޒަރީރު ވިދާޅުވެއްޖެ އެވެ.
އަންނަ އަހަރަށް ލަފާކުރާ ބަޖެޓު ރައްޔިތުންގެ މަޖިލީހަށް ހުށަހަޅުއްވަމުން ޒަރީރު ވިދާޅުވީ އަންނަ އަހަރު ރާއްޖޭގެ އެކި ކަންކޮޅުގައި ބޯހިޔާވަހިކަމުގެ މަޝްރޫއުތައް ހިންގުމަށް ސަރުކާރުން ނިންމާފައިވާ ކަމަށެވެ.
"ރާއްޖޭގެ އެކި ސަރަހައްދުތަކުގައި ރައްޔިތުންނަށް ބޯހިޔާވަހިކަން އިތުރުކުރުމުގެ މަޝްރޫއުތައް ބާރަށް ކުރިއަށްދާނެ. މި ކަމަށް ހާއްސަކޮށް ތިން ބިލިއަން ރުފިޔާ 2027 ވަނަ އަހަރުގެ ބަޖެޓުގައި ހިމަނާފައިވާނެ. މި މަޝްރޫއިން މާލެ ސަރަހައްދުގެ ތޮއްޖެހުމަށް ވަށާޖެހޭ ހައްލެއް ގެނެސްދޭނެ،" ޒަރީރު ވިދާޅުވި އެވެ.
އޭގެ ތެރޭގައި، އަލަށް ގެދޮރު ގަންނަ މީހުންނާއި އަލަށް ގެދޮރު އިމާރާތްކުރަން ބޭނުންވާ މީހުންނަށް ހާއްސަ ލޯން ސްކީމުގެ އިކުއިޓީގެ ގޮތުގައި ދައްކަންޖެހޭ ފައިސާ، ހިލޭ އެހީގެ ގޮތުގައި ދިނުމަށް 750 މިލިއަން ރުފިޔާ ހިމަނައިފައިވާނެ ކަމަށް އޭނާ ވިދާޅުވި އެވެ.
އޭގެ އިތުރުން، ރަށްރަށުގައިވާ ހުސްބިންތަކުގައި ފެނާއި ނަރުދަމާގެ އަސާސީ ހިދުމަތްތައް ގާއިމުކޮށް ދިރިއުޅުމަށް ފަހި ވެށްޓަކަށް ހެދުމުގެ މަސައްކަތް ހަލުވިކަމާއެކު ހިންގުމަށް ވެސް އަންނަ އަހަރުގެ ބަޖެޓުގައި ހިމަނައިފައިވާނެ ކަމަށް ޒަރީރު ވިދާޅުވި އެވެ.
އޭނާ ވިދާޅުވީ ރާއްޖޭގެ ހުރިހާ ސަރަހައްދެއްގައި ވެސް ފެންވަރު ރަނގަޅު ސިއްހީ ހިދުމަތް ފޯރުކޮށްދެވޭނެ ނިޒާމެއް ގާއިމުކުރުމަށް އަންނަ އަހަރަށް ލަފާކުރާ ބަޖެޓުގައި ވަރަށް ބޮޑު އިސްކަމެއް ދީފައިވާނެ ކަމަށެވެ.
"ރައްޔިތުންގެ ދުޅަހެޔޮކަމާއި ޤައުމުގެ މުސްތަޤުބަލަށްޓަކައި ފެންވަރު ރަނގަޅު ޞިއްޙީ ޚިދުމަތްތައް ކަށަވަރުކުރުމަކީ ކޮންމެހެން ބޭނުންތެރި ކަމެއް. މިގޮތުން 2027 ވަނަ އަހަރުގެ ބަޖެޓުގައި ސިއްހީ ދާއިރާއަށް 10.2 ބިލިއަން ރުފިޔާ ހިމަނާފައިވާނެ،" ޒަރީރު ވިދާޅުވި އެވެ.
ހޮސްޕިޓަލްތަކުގެ ހިދުމަތް ދިނުމަށް ބޭނުންވާ ސާމާނުތައް މަރުކަޒީ ނިޒާމެއްގެ ތެރެއިން ހޯދޭނެ އިންތިޒާމު ގާއިމު ކުރުމަށް ވެސް ބަޖެޓުގައި އިސްކަން ދީފައިވާނެކަން ފާހަގަކުރައްވައި ޒަރީރު ވިދާޅުވީ ސްޓޭޓް ފާމާ މެދުވެރިކޮށް ބޭސް ހޯދުމުގެ ނިޒާމު ހަރުދަނާ ކުރުމަކީ ސަރުކާރުގެ އަމާޒެއް ކަމަށެވެ.
އޭގެ އިތުރުން، ރާއްޖޭގެ އެކި ސަރަހައްދުތަކުގައި ޑީކޯ ޗެމްބަރުތަކާއި ސީޓީ ސްކޭން އަދި، އެމްއާރުއައި ފަދަ ހިދުމަތްތައް ތަރައްގީ ކުރުމަށް ވެސް ބަޖެޓުގައި އިސްކަން ދީފައިވާނެ ކަމަށް އޭނާ ވިދާޅުވި އެވެ.
