ރައްޔިތުންގެ މަޖިލީހުގެ ރައީސް އާއި އުއްތަމަ ފަނޑިޔާރު، އަދި، ސަރުކާރު މިނިސްޓަރުންގެ މުސާރަތައް މި ދަނޑިވަޅުގައި ބޮޑުކުރަނީ ރަސްމާލެ މަޝްރޫއުއާ ދެކޮޅަށް އެ ބޭފުޅުން ވާހަކަދައްކަވައި މަސައްކަތް ކުރައްވަފާނެތީ ކަމަށް ގަލޮޅު ދެކުނު ދާއިރާގެ މެންބަރު، މީކާއިލް އަހުމަދު ނަސީމް ވިދާޅުވެއްޖެ އެވެ.
ރައްޔިތުންގެ މަޖިލީހުގައި މިއަދު ވާހަކަދައްކަވަމުން މީކާއިލް ވިދާޅުވީ ބޭރުގެ މަހުޖަނެއްގެ ނުފޫޒުން، މުޅި ދިވެހި ދައުލަތް އޭނާގެ ޖީބަށް ކަހައި އެ ލަނީ ރައްޔިތުންގެ މަޖިލިސް ބޭނުންކޮށްގެން ކަމަށެވެ.
"އިއްޒަތްތެރި ރައީސް، ރަސްމާލެ މަޝްރޫއުގެ ވާހަކަ މި ތިން ބާރުގެ ވެރިން ދައްކަފާނެތީވެ، ތިން ބާރުން މިކަމާ ދެކޮޅަށް މަސައްކަތެއް ކުރައްވަފާނެތީވެ އިއްޒަތްތެރި ރައީސް މި ފޯރުވަނީ ނުފޫޒު، މި ފޯރުވަނީ ނުފޫޒު،" މީކާއިލް ވިދާޅުވި އެވެ.
"އީގަލް ހިލްސް އައުޓް ކިޔާފާނެތީ ތިން ބާރުގެ ވެރިން ގަނެލަނީ އިއްޒަތްތެރި ރައީސް، ތިން ބާރުގެ ވެރިން ގަނެލަނީ، ޖީބުގެ ތެރެއަށް، ޖީބުގެ އެންމެ އަޑިއަށް ރައްޔިތުންގެ މަޖިލީހުގެ ވެރިޔާ، އުއްތަމަ ފަނޑިޔާރު އިއްޒަތްތެރި ރައީސް ތިން ބާރު އެކީ އެކައްޗަކަށް މިއޮއްގެން ކަހައިލަނީ."
ޑިމޮކްރެސީގެ ހަތަރުވަނަ ބާރުކަމަށް ބުނާ ނޫސްވެރިންގެ ތެރެއިން ދެބައިކުޅަ އެއްބައި ނޫސްވެރިން މި ވަގުތު ތިބީ ޑުބާއީގެ ފަސް ތަރީގެ ހޮޓާތަކުގައި ބައިތިއްބާފައި ކަމަށާއި އެ ނޫސްވެރިންނަށް އަންގައިފައި އޮތީ އީގަލް ހިލްސްގެ ރަނގަޅު ވާހަކަ ނޫން އެހެން އެއްވެސް ވާހަކައެއް ނުދެއްކުމަށް ކަމަށް މީކާއިލް ވިދާޅުވި އެވެ.
"މުޅި ދިވެހި ދައުލަތް ގަނެލަނީ، މުޅި ދިވެހި ދައުލަތް ގަނެލަނީ އިއްޒަތްތެރި ރައީސް، ރައްޔިތުންގެ މަޖިލިސް ބޭނުންކޮށްގެން، މި ރައްޔިތުންގެ މަޖިލީހުގައި ތިބި ރައްޔިތުންގެ މަންދޫބުން ބޭނުންކުރައްވައިގެން ދިވެހި ދައުލަތް ބޭރުގެ މަހުޖަނެއްގެ މުށުތެރެއަށް މިއޮއް ކަހައިލަނީ،" މީކާއިލް ވިދާޅުވި އެވެ.
އެ ކަން އެގޮތަށް ކުރަމުންދާއިރު، މަޖިލީހުގެ މެންބަރުން ތިއްބެވީ އާނ ބަސް ވިދާޅުވާން ކަމަށާއި މިއަދު ހިންގަމުންދާ ކަންކަމާ ދެކޮޅަށް ބަސް ނުބުނާ އެއްވެސް މީހަކު ދެން ރައްޔިތުންގެ ގާތަށް ވޯޓު ހޯދަން ދެން ގޮސްގެން ނުވާނެކަމަށް އޭނާ ވިދާޅުވި އެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމާފައި ވަނީ ރައްޔިތުންގެ މަޖިލީހުގެ ރައީސްގެ މުސާރަ 73،000ރ. އިން 95،000ރ. އަށް ބޮޑުކުރުމަށާއި ވަޒީރުންނަށް އެލަވެންސްގެ ގޮތުގައި ލިބޭ ފައިސާއަށް 10،000ރ. އިތުރުކުރުމަށެވެ.
އޭގެ އިތުރުން، މާލިއްޔަތު ކޮމިޓީން ވަނީ އުއްތަމަ ފަނޑިޔާރަށް ލިބޭ މުސާރަ 91،000ރ. އިން 95،125ރ. އަށް ބޮޑުކުރުމަށެވެ.
މި ބަދަލުތައް ގެންނަން ފާސްކޮށްފައި މި ވަނީ ރަސްމާލޭގެ ދެބައިކުޅަ އެއްބައި އީގަލް ހިލްސް ކުންފުންޏަށް ދޭން ސަރުކާރުން ކުރަމުންދާ މަސައްކަތާ ދެކޮޅަށް އާންމު ރައްޔިތުން ވަރަށް ބޮޑަށް ނުރުހުން ފާޅުކުރަމުންދާ ދަނޑިވަޅެއްގަ އެވެ.
