ދިވެހި ރައްޔިތުންނަށް ބޯހިޔާވަހިކަން ފޯރުކޮށްދޭން ކަމަށް ބުނެ މި ސަރުކާރުން ހިއްކަން ފެށި ރަސްމާލެއިން އެއްބައި އިޒްރޭލަށް ވާގިވެރިވާ ޔޫއޭއީގެ އީގަލް ހިލްސްއަށް ދޫކޮށްލުމާ ގުޅިގެން ރައްޔިތުންގެ ފެންނަ ނުފެންނަ ވޯޓަކަށް (ރިފަރެންޑަމަކަށް) ދާން ޖެހޭ ކަމަށް ގަބޫލު ނުކުރައްވާ ކަމަށް ސަރުކާރު ހިންގާ ޕީއެންސީގެ ޕީޖީ ލީޑަރު އިބްރާހިމް ފަލާހް މިއަދު ވިދާޅުވެއްޖެ އެވެ.
ރަސްމާލެ ޑީލާ ގުޅޭގޮތުން އަދަދު ނޫހުން ސުވާލުކުރުމުން ފަލާހު ވިދާޅުވީ ރަސްމާލެ ޑީލާ ގުޅިގެން މަޖިލީހުގައި ހިމެނޭ މެންބަރުންގެ ހިޔާލަކީ އާންމު ރައްޔިތުންގެ ހިޔާލު ކަމަށެވެ. އެގޮތުން ރަސްމާލެ ޑީލާމެދު ރައްޔިތުންގެ ތާއީދު އެބައޮތް ކަމަށް އޭނާ ވިދާޅުވި އެވެ.
"ރަސްމާލެ މައްސަލައިގައި އާންމު ރައްޔިތުންގެ ހިޔާލެއް ނޫންތޯ، އާންމު ރައްޔިތުން، އަޅުގަނޑަކީ އިނގުރައިދޫ ދާއިރާ 5،000 ރައްޔިތުން ތަމްސީލްކުރާ މެންބަރު. މި ހުންނެވީ އައްޑޫގައި އެ ދާއިރާގެ މަޖިލިސް މެންބަރު،" ފަލާހު ވިދާޅުވި އެވެ.
"އާންމު ރައްޔިތުންގެ ވޯޓަކަށް ދާންޖެހިއްޖެއްޔާ އަޅުގަނޑުމެން ދާނަން އެނގޭތޯ. އެކަމަކު ރައްޔިތުންގެ ތާއީދު ރަސްމާލެ މަޝްރޫއު ހިންގުމަށް އޮތްކަން ތިބޭފުޅުންނަށް އެނގޭނެ."
ރައީސް މުހައްމަދު މުއިއްޒުގެ ރަސްމީ ގެކޮޅު މުލީއާގޭގައި ކެބިނެޓު މިނިސްޓަރުންނާއި ޕީއެންސީގެ މަޖިލިސް މެންބަރުން މިވަގުތު ދަނީ އެމަނިކުފާނާ ބައްދަލުކުރައްވަމުންނެވެ. އެ ބައްދަލުކުރެއްވުމަކީ ރަސްމާލެ ޑީލާ ގުޅޭ ބައްދަލުވުމެއް ކަމަށް މައުލޫމާތު ލިބެ އެވެ.
ރަސްމާލެ ވިއްކާލުމާ ގުޅޭ ގޮތުން އަދަދު އިން ސުވާލު ކުރުމުން، މުލީއާގެއަށް ވަޑައިގެންނެވި ގިނަ މެންބަރުންނާއި ކެބިނެޓު މިނިސްޓަރުން އެއްވެސް ޖަވާބެއް ނުދެއްވަ އެވެ.
ރަސްމާލެ ޕްރޮޖެކްޓު ކުރިއަށްގެންދަން ދިވެހިރާއްޖޭގެ ގާނޫނުތަކުން ހުއްދައެއް ނުދެ އެވެ. އެހެންވެ އެކަމަށް މަގުފަހިކުރަން އާ ގާނޫނުތަކެއް ހަދަން ނިންމާފައިވާކަން ބަންޑާރަނައިބު އަހުމަދު އުޝާމް ވަނީ ވިދާޅުވެފަ އެވެ. ނަމަވެސް މިހާތަނަށް އަލަށް ހަދާ ގާނޫނުތަކާ ގުޅޭ އެއްވެސް ތަފްސީލެއް ހާމަކުރައްވާފައި ނުވަތަ މަޖިލީހަށް ހުށަހަޅުއްވާފައެއް ނުވެ އެވެ.
ސަރުކާރުން ބުނަނީ ރަސްމާލެ ދޫކޮށްލަނީ 99 އަހަރަށް ކަމަށެވެ. އެކަމަކު އަލައްބާރުގެ އީގަލް ހިލްސް ކުންފުނިން ބުނީ ރަސްމާލެއިން ފުރަތަމަ ލިބޭ 99 އަހަރުގެ ކުލީގެ މުއްދަތު ހަމަވުމުގެ ކުރިން އެތަން ވިއްކާލައިފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރަން މަސައްކަތް ކުރަނީ ނޮވެމްބަރު 11، ގަ އެވެ. އެއީ ރާއްޖޭގެ ޖުމްހޫރީ ދުވަހެވެ.
