އިޒްރޭލު އަދި ޒަޔަނިސްޓުންނަށް ވާގިވެރިޔާ ޔޫއޭއީގެ މުހައްމަދު އަލައްބާރަށް ރަސްމާލެ ވިއްކުން ހުއްޓުވަން ސުޕްރީމް ކޯޓަށް މައްސަލައެއް ހުށަހަޅާފައި އޮއްވައި އުއްތަމަ ފަނޑިޔާރު އަބްދުލްޣަނީ މުހައްމަދުގެ މުސާރަ މަޖިލީހުން ބޮޑުކޮށްފި އެވެ.
ވެރިކަން ކުރާ ޕީއެންސީ އިން ކޮންޓްރޯލް ކުރާ މަޖިލީހުން އުއްތަމަ ފަނޑިޔާރުގެ މުސާރަ ބޮޑުކުރީ، ރައްޔިތުންގެ މަޖިލީހުގެ ރައީސްއަށްވުރެ އުއްތަމަ ފަނޑިޔާރުގެ މުސާރަ ކުޑަވާތީ ކަމަށް ބުނެ އެވެ.
ރަސްމާލެ ވިއްކުން ހުއްޓުވަން ގާނޫނީ ވަކީލު އަލީ ހުސެއިންގެ ފަރާތުން ހުށަހެޅި މައްސަލަ ސުޕްރީމް ކޯޓުގެ ރަޖިސްޓްރާ ރައުފާ ހައިދަރު ވަނީ ބަލައިނުގަންނަން ނިންމަވައިފަ އެވެ. އެ މައްސަލަ މިހާރު އޮތީ ފަނޑިޔާރުންގެ މަޖިލީހުގައި ރިވިއު ކުރަން ހުށަހަޅައިފަ އެވެ.
މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގައި އުއްތަމަ ފަނޑިޔާރުގެ މުސާރަ ބޮޑުކރުަން ހުށަހެޅުއްވީ ފުނަދޫ ދާއިރާގެ މެންބަރު މުހައްމަދު މަމްދޫހެވެ. މަމްދޫހު ވިދާޅުވީ އުއްތަމަ ފަނޑިޔާރުގެ މުސާރަ މުރާޖާކޮށްދިނުމަށް ހުށަހެޅުއްވީ، ދައުލަތުގެ މުސާރަތަކަށް ގެނެވުނު ބަދަލުތަކާ އެކު އުއްތަމަ ފަނޑިޔާރަށް މިހާރު ލިބޭ މުސާރަ މަޖިލީހުގެ ރައީސްގެ މުސާރައަށް ވުރެއް ކުޑަވާތީ ކަމަށެވެ.
އޭނާ ހުށަހަޅުއްވީ، މިހާރު އުއްތަމަ ފަނޑިޔާރަށް ލިބޭ އިނާޔަތްތައް މުރާޖާކޮށް، ހާއްސަ އެލަވެންސެއްގެ ގޮތުގައި 4،125 ރުފިޔާ އިތުރުކުރުމަށެވެ.
ކޮމިޓީގެ ހުރިހާ މެންބަރުންގެ އިއްތިފާގުން ފާސްކުރި މި ބަދަލާއެކު، އުއްތަމަ ފަނޑިޔާރުގެ ޖުމުލަ މުސާރަ މިހާރު ލިބިވަޑައިގަންނަވާ 91،000 ރުފިޔާގެ ބަދަލުގައި 95،125 ރުފިޔާއަށް އިތުރުވާނެ އެވެ.
ރައްޔިތުންގެ މަޖިލީހުގެ ރައީސަށް މީގެކުރިން ލިބެމުން ދިޔައީ 73،000 ރުފިޔާ އެވެ. ނަމަވެސް އެއީ މަޖިލީހުގެ ނައިބު ރައީސާއި މެންބަރުންނަށް ލިބޭ މުސާރަ އާއި އިނާޔަތްތަކަށް ވުރެ ކުޑަ އަދަދަކަށް ވާތީ މަޖިލީހުގެ ރައީސްގެ ޖުމްލަ މުސާރަ އާއި އިނާޔަތްތައް 95،000 ރުފިޔާއަށް ބޮޑުކުރަން މާލިއްޔަތު ކޮމެޓީން މިދިޔަ ހަފުތާގައި ވަނީ ނިންމާފަ އެވެ.
ސަރުކާރުން ބުނަނީ ރަސްމާލެ ދޫކޮށްލަނީ 99 އަހަރަށް ކަމަށެވެ. އެކަމަކު އަލައްބާރުގެ އީގަލް ހިލްސް ކުންފުނިން ބުނީ ރަސްމާލެއިން ފުރަތަމަ ލިބޭ 99 އަހަރުގެ ކުލީގެ މުއްދަތު ހަމަވުމުގެ ކުރިން އެތަން ވިއްކާލައިފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރަން މަސައްކަތް ކުރަނީ ނޮވެމްބަރު 11، ގަ އެވެ. އެއީ ރާއްޖޭގެ ޖުމްހޫރީ ދުވަހެވެ.
ރަސްމާލެ ވިއްކާލަން ސަރުކާރުން ޑީލެއް ހެދީ، އެތަނުގެ ވެލިފުކެއް އެންމެ ދުވަހަކަށް ނަމަވެސް ބޭރުގެ ބަޔަކަށް ކުއްޔަށް ނުވަތަ ހިލޭ ވެސް ނުދޭން ރައީސް މުހައްމަދު މުއިއްޒު ވައުދުވެވަޑައިގެންނެވުމަށްފަހު އެވެ.
"އެތަނުން [ރަސްމާލެއިން] ހިއްކާ ކޮންމެ ބިމެއްގެ، ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް. އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭ ވެސް ލިބޭނެ ބިމެއްނޫން، ދެން އެތަނުން ހިކިގެން ދާނީކީއެއް،" މުއިއްޒު ވިދާޅުވެފައިވެ އެވެ.
