ރަސްމާލޭގެ ބިމުން 500 ހެކްޓަރުގެ ބިން އެއްވެސް ކުއްޔަކާ ނުލައި އީގަލް ހިލްސް ކުންފުންޏަށް ދޭން ފެނޭތޯ ބެލުމަށްޓަކައި ރައްޔިތުންގެ ފެންނަ ނުފެންނަ ވޯޓަކަށް ދާންޖެހޭ ކަމަށް އިދިކޮޅު އެމްޑީޕީގެ މެންބަރުން، ރައްޔިތުންގެ މަޖިލީހުގައި މިއަދު ގޮވައިލައްވައިފި އެވެ.
އީގަލް ހިލްސްއާއެކު ދިވެހި ސަރުކާރުން ސޮއިކޮށްފައިވާ އެއްބަސްވުން ހާމަކުރަން ގޮވާލައި މަޖިލީހަށް ހުށަހެޅި ގަރާރަށް ބަހުކުރައްވަމުން އެމްޑީޕީގެ މެންބަރުން ވިދާޅުވީ ރާއްޖޭގެ ބިމުން ބައެއް ބޭރުގެ ބަޔަކަށް ދިރިއުޅެވޭ ގޮތަށް 99 އަހަރަށް ދިނުމުގެ ކުރިން ރައްޔިތުންގެ ހިޔާލު އެކަމުގައި ހޯދަން ޖެހޭނެ ކަމަށެވެ.
"އަޅުގަނޑު ގޮވައިލަން މި ސަރުކާރަށް އަދި، މި ރައްޔިތުންގެ މަޖިލީހަށް ވެސް ވީހައިވެސް އަވަހަކަށް ރައްޔިތުންގެ ފެންނެނުފެންނަ ވޯޓަކަށް މި މައުޟޫގައި، އިއްޒަތްތެރި ރައީސް އެއީ އަޅުގަނޑުމެން މިއަދު ކޮންމެހެން ކުރަންޖެހޭ ކަމެއް، ރިފަރެންޑަމަކަށް ނުގޮސް މި މަޝްރޫއުއައިގެން ކުރިއަށް ދިޔުމަކީ ދިވެހި ރައްޔިތުންގެ ވިންދާ ދެކޮޅަށް އަޅުގަނޑުމެން ކުރާ ކަމަކަށް ނޫނީ ނުވާނެ،" ހުޅުމާލެ ދެކުނު ދާއިރާގެ މެންބަރު، އަހުމަދު ޝަމްހީދު ވިދާޅުވި އެވެ.
އޭނާ ވިދާޅުވީ ދިވެހި ބިމާއި ގާނޫނުތަކާއި ގާނޫނުއަސާސީއަކީ ދިވެހިރައްޔިތުންގެ މިލްކެއް ކަމަށެވެ. އެހެންކަމުން، ރަސްމާލެ މަޝްރޫއު ފަދަ ބޮޑެތި ކަންކަމުގައި ފަސް އަހަރަށް އިންތިހާބުކުރާ ވެރިން ބަސް ކިޔުމުގެ ބަދަލުގައި ބަސްކިޔަން ޖެހޭނީ ދިވެހި ރައްޔިތުން ކަމަށް އޭނާ ވިދާޅުވި އެވެ.
އެ ގަރާރަށް ބަހުސްކުރައްވަމުން ވައިކަރަދޫ ދާއިރާގެ މަޖިލިސް މެންބަރު، ހުސެއިން ޒިޔާދު ވިދާޅުވީ ރަސްމާލެ މަޝްރޫއުއަކީ ފެށުމަށްފަހު ހުއްޓޭނެ މަޝްރޫއުއެއް ނޫން ކަމަށެވެ. އަދި، އެ މަޝްރޫއު ކުރިއަށް ގެންދިޔުމަށްޓަކައި ސޮއިކުރާ އެއްބަސްވުން، ޕީއެންސީގެ މަޖިލިސް މެންބަރުން ގާނޫނުތަކަށް އިސްލާހު ގެންނަ ގޮތަށް، ފަހުން ރަނގަޅު ނުކުރެވޭނެކަމަށް އޭނާ ވިދާޅުވި އެވެ.
"އަޅުގަނޑަށް ފެނޭ މި ކަމުގައި ރައްޔިތުން ކައިރީގައި އަހާލަން، އެއީ އެ ޖާގަ ގާނޫނުން އަޅުގަނޑުމެންނަށް އޮތީމާ. ރައްޔިތެއް ކައިރީގައި އަހާލައިގެން އަޅުގަނޑުމެންގެ އަތުން ގެއްލޭނެ އެއްޗެއް މީގައި ނެތް، އެހެންވީމާ އަޅުގަނޑު މި ދަންނަވަނީ އަދިވެސް އެއް ފަހަރު މިއީ ރައްޔިތުންގެ ކައިރީގައި އަހައި ރައްޔިތުންނާ މަޝްވަރާކޮށްގެން ނޫނިއްޔާ މިކަން ނިންމައިފި ނަމަ، ވާނީ މިއަދު ޓެކްސް ބިލަށް ވީގޮތް،" ފިއްޓޭ ވިދާޅުވި އެވެ.
އެ ގަރާރަށް ބަހުސްކުރައްވަމުން މީކާއިލް ވިދާޅުވީ ރަސްމާލޭގެ ދެބައިކުޅަ އެއްބައި އީގަލް ހިލްސްއަށް ދޭން ފެނޭތޯ ބެލުމަށް ރައްޔިތުންގެ ފެންނަނުފެންނަ ވޯޓެއް ނަގައިފި ނަމަ، އެކަމާ އެއްކޮޅަށް ފަސް ޕަސެންޓު ރައްޔިތުން ވެސް ތާއީދުނުކުރާނެ ކަމަށެވެ.
"ދެ އިންތިހާބު އެއްކުރާ ވާހަކައާ ގުޅިގެން ސަރުކާރުން ވަރަށް ފަސޭހައި މިތަނަށް ގާނޫނަށް ބަދަލުގެނެސް، ގާނޫނުއަސާސީއަށް ބަދަލުގެނެސް އިއްޒަތްތެރި ރައީސް ރިފަރެންޑަމަކަށްދިޔަ، މިއަށްވުރެ ބޮޑު ކަންބޮޑުވުމެއް މި ފަސް އަހަރު ތެރެއަކު ނާންނާނެ އިއްޒަތްތެރި ރައީސް،" މީކާއިލް ވިދާޅުވި އެވެ.
"...މިއީ ރައްޔިތުންގެ ކައިރީގައި އަހަންޖެހޭ ވަގުތު، މިއީ ރައްޔިތުންގެ އާނ ބަސް ހޯދަންޖެހޭ ވަގުތު އިއްޒަތްތެރި ރައީސް، ކެރިވަޑައިގަންނަވަންޏާ ރިފަރެންޑަމަކަށް ވަޑައިގަންނަވަންވީ."
އެކަމުގައި އާންމުންގެ ހިޔާލު ހޯދަން، ފެންނަނުފެންނަ ވޯޓަކަށް ދާންޖެހޭ ކަމަށް އެމްޑީޕީން ގޮވައިލިއިރު، ވެރިކަންކުރާ ޕީއެންސީ މެންބަރުން ވިދާޅުވީ އެކަމާ ގުޅޭގޮތުން ފެންނަނުފެންނަ ވޯޓަކަށް ދާން ނުޖެހޭ ކަމަށެވެ.
އީގަލް ހިލްސް އާއި ދިވެހިރާއްޖެއާ ދެމެދު ވެފައިވާ އެއްބަސްވުމުގެ ތަފުސީލުތައް ހާމަކުރުމަށް ގޮވާލައި މަޖިލީހަށް ހުށަހެޅި ގަރާރު ޕީއެންސީގެ މެންބަރުން ވަނީ ބޭރުކޮށްލައިފަ އެވެ.
