ރަސްމާލޭގައި އިޒްރޭލު މީހުންގެ ނަމުގައި ތަންތަން ރަޖިސްޓްރީ ނުކުރާނެ ކަމަށް ސަރުކާރުން ބުނާ ބުނުމަކުން އެކަނި ނުފުދޭ ކަމަށާއި، ސަރުކާރުގެ ކިބައިގައި ތެދުވެރިކަމެއް ހުރިނަމަ ރަސްމާލޭގެ މައިގަނޑު އެއްބަސްވުން ރައްޔިތުންނަށް ހާމަކުރަންޖެހޭނެ ކަމަށް އެމްޑަބްލިޔުއެސްސީގެ ކުރީގެ މެނޭޖިން ޑިރެކްޓަރު އަބްދުލް މަތީން ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި މަތީނު ވިދާޅުވީ، ރަސްމާލެ މަޝްރޫއު ހަވާލުކޮށްފައިވާ އީގަލް ހިލްސް ކުންފުނީގެ ހިއްސާދާރުންނަކީ ކޮބައިކަމާއި، އެތަނުން އިންވެސްޓް ކުރަމުން އެދަނީ ކޮންބައެއްގެ ފައިސާއެއްކަން ސަރުކާރުން ބަޔާންކޮށްދޭން ޖެހޭނެ ކަމަށެވެ. އަދި މިއީ ކުދި ބޮޑު ހުރިހާ އިންވެސްޓްމަންޓްތަކާބެހޭ ގޮތުން ވެސް ހާމަވާންޖެހޭ އަސާސީ މައުލޫމާތުކަން އޭނާ ފާހަގަކުރެއްވި އެވެ.
"އިޒްރޭލު މީހުންގެ ނަމުގައި ރަސްމާލޭގައި ތަންތަން ރެޖިސްޓްރީ ނުކުރާނެ ކަމަށްބުނުމަކުން ނުފުދޭ. ތިޔަހަވާލާދެއްވާ ގާނޫނުތައް ހުރީ މަތާރަންފިލާމަތީގައި ހިރަފުސް އަރަން ދޫކޮށްލެވިފައި. އަމަލެއް ނުކުރެވޭ. އަމަލު ކުރެވޭނަމަ ލައްކައެއްހާ ބިދޭސީ މަސައްކަތު މީހުން ރާއްޖޭގެ މަގުތަކަކު ނޫޅޭނެ،" މަތީން ވިދާޅުވި އެވެ.
މިއަދު ކުރެއްވި އިތުރުޕޯސްޓުގައި މަތީން ވިދާޅުވެފައި ވަނީ ނ. އަތޮޅު އައިލާ މަޝްރޫއު އިޒްރޭލުގައި ވެސް އިސްތިހާރު ކުރަމުންދާ ކަމަށާއި، އެތަނުން އިޒްރޭލުގެ ގިނަ ބަޔަކު ގެދޮރު ގަތުމުގެ އުންމީދު އެބަ އޮތް ކަމަށް އެ މަޝްރޫއަށް ދިވެހި ސަރުކާރުން ކަނޑައަޅާފައިވާ ކުންފުނީގެ ޗެއަރމަން 2025 ވަނަ އަހަރުގެ ޑިސެމްބަރު މަހު ބުނެފައިވާ ކަމަށެވެ.
މީގެ އިތުރުން މާލޭގެ އަމީނީ މަގުގައި ހުރި ޕިއްޒާހަޓާއި ކޭއެފްސީ ދިވެހި ޒުވާނުން ބަންދުކުރުވީ އެތަނުގެ ވިޔަފާރި އިޒްރޭލު މީހެއްގެ ނަމުގައި އޮވެގެނެއް ނޫން ކަމަށާއި, އެ ވިޔަފާރި ޗޭނުން އިޒްރޭލުގެ އަނިޔާވެރިކަމަށް އެކި ގޮތްގޮތުން މާލީ އެހީތެރިކަން ފޯރުކޮށްދޭކަން ލިޔެކިޔުންތަކުން ފެންނަން އޮތުމުން ކަމަށް މަތީނު ވިދާޅުވި އެވެ.
މެދުއިރުމަތީގައި ކޭއެފްސީއާއި ޕިއްޒާހަޓްގެ ހިދުމަތްދޭ އެމެރިކާނާ ރެސްޓޯރަންޓުތަކުގެ އެންމެ ބޮޑު އެއް ހިއްސާދާރަކީ ރަސްމާލެ ގަނެފައިވާ އީގަލް ހިލްސްގެ މުހައްމަދު އަލައްބާރުކަން އޭނާ ފާހަގަކުރެއްވި އެވެ.
"ކައްޗަށްއެޅި ބިންގާ ކެއްޗާއި ހަމަޔަށް ދިޔަސް ދާނީ ކައްޗަށް،" ކަންކަން ދެ ފުށް ފެންނަ ނިޒާމަކުން ކުރިއަށް ނުގެންދާނަމަ ނިކުންނާނެ ނަތީޖާއަކާ މެދު އިންޒާރު ދެއްވަމުން މަތީނު އިތުރަށް ވިދާޅުވެފައިވެ އެވެ.
