މަސްދުވަސް ނުވަނީސް ސަރުކާރުގެ ނިންމުން ބަދަލުކޮށް، ބޭރުގެ ޓުއާ އޮޕަރޭޓަރުންގެ އަތުން ޓެކްސް ނަގަން ގާނޫނަށް ގެނައި ބަދަލު އުވައިލަން ހުށަހެޅި ބިލު ރައްޔިތުންގެ މަޖިލީހަށް މިއަދު ބަލައިގެންފި އެވެ.
ބޮޑެތި ފާޑުކިޔުންތަކެއް ކުރިމަތިވަމުންދަނިކޮށް ބޭރުގެ ޓުއާ އޮޕަރޭޓަރުން އަތުން ޓެކްސް ނަގަން ފެށީ އޮކްޓޯބަރު 1، ގަ އެވެ. ނަމަވެސް އެ ޓެކްސް ނެގުން ހުއްޓާލަން ރައީސް މުހައްމަދު މުއިއްޒު ނިންމަވާފައިވާ ކަމަށް ސަރުކާރުން ވަނީ، ޓެކްސް ނަގަން ފެށިތާ ތިން ވަނައަށް ވީ ދުވަހު އިއުލާނުކޮށްފަ އެވެ.
ބޭރުގެ ޓުއާ އޮޕަރޭޓަރުން އަތުން ޓެކްސް ނެގުން ހުއްޓާލުމުގެ ބިލު ސަރުކާރުގެ ފަރާތުން މަޖިލީހަށް ހުށަހެޅީ ކޮލަމާފުށީ ދާއިރާގެ މެންބަރު އިބްރާހިމް ދީދީ އެވެ. އޭނާ ހުށަހެޅުއްވީ ބިލުގައި ހިމަނާފައި ވަނީ ބޭރު ޓުއާ އޮޕަރޭޓަރުން އަތުން ޓެކްސް ނަގަން ހިމަނާފައިވާ ހުރިހާ މާއްދާއެއް އުނިކުރުމަށެވެ.
އެ ބިލު މަޖިލީހަށް ބަލައިގަތީ 43 މެންބަރުންގެ ވޯޓާއެކު އެވެ. އެ ބިލު މަޖިލީހަށް ބަލައިގަތުމާ ދެކޮޅަށް އެއްވެސް މެންބަރަކު ވޯޓެއް ނުދެއްވަ އެވެ.
ބޭރުގެ ޓުއާ އޮޕަރޭޓަރުންގެ އަތުން ޓެކްސް ނެގުމުގެ ގާނޫނު ބަދަލު ކުރަން ރައީސް މުހައްމަދު މުއިއްޒު ނިންމަވާފައިވާކަން އިއުލާނު ކުރެއްވީ ފަތުރުވެރިކަމުގެ ދުވަސް ފާހަގަ ކުރަން ބާއްވާ ރަސްމީ ޖަލްސާގައި ވާހަކަ ދައްކަވަމުން މިނިސްޓަރު މުހައްމަދު އަމީން އެވެ.
"މިކަމާ ގުޅިގެން އިންޑަސްޓްރީގެ އިސް ބައެއް ފަރާތްތަކުންނާ އަދި ޓްރެވަލް އެޖެންޓުންގެ ވަރަށް ގިނަ ފަރާތްތަކުން ރައީސުލްޖުމްހޫރިއްޔާގެ އަރިހަށް ވަނީ ގިނަ ރިކުއެސްޓުތަކެއް ފޮނުވާފައި. މިވަގުތު ރައީސް ނިންމަވާފައި ވަނީ ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ގާނޫނަށް ވަރަށް އަވަހަށް ބަދަލުތަކެއް ގެނައުމަށް،" އަމީން ވިދާޅުވި އެވެ.
ބޭރުގެ ޓުއާ އޮޕަރޭޓަރުން އަތުން ޓެކްސް ނަގަން ފާސް ކުރުމުން އިންޑަސްޓްރީގެ ވަރަށް ބޮޑެތި ކަންބޮޑުވުންތައް ރައީސް މުއިއްޒާ ހިއްސާކޮށްފައިވާ ކަމަށް ވެސް އެ ޖަލްސާގައި ވާހަކަ ދައްކަވަމުން އަމީން ވިދާޅުވި އެވެ.
"އަޅުގަނޑުމެން ގާނޫނަށް ބަދަލުތަކެއް ގެނައިމު، އެއީ ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ދެއްކުމުގެ އިތުރު ބައިތަކެއް ހިމަނައިގެން ގާނޫނަށް ގެނައި ބަދަލުތަކެއް. މިއާއެކީގައި އިންޑަސްޓްރީގެ ވަރަށް ބޮޑެތި ކަންބޮޑުވުންތަކެއް ހުރި ކަމަށް އަޅުގަނޑުމެންނަށް ފާހަގަ ކުރެވުނު. އަދި ޓްރެވަލް އެޖެންޓުންގެ ކަންބޮޑުވުންތަކެއް ވެސް ހުރިކަން ފާހަގަ ކުރެވުނު،" މިނިސްޓަރު ވިދާޅުވި އެވެ.
ބޭރުގެ ޓުއާ އޮޕަރޭޓަރުންގެ އަތުން ޓެކްސް ނަގާ ގާނޫނު ފާސް ކުރުމުގެ ކުރިން ވެސް ވަރަށް ގިނަ ބަޔަކު ކަންބޮޑުވުން ފާޅު ކުރި އެވެ. އެގޮތުން ރަޝިޔާގެ އެންމެ ބޮޑު ޓުއާ އޮޕަރޭޓަރު ވަނީ އެކަމާ ކަންބޮޑުވުން ފާޅުކޮށް ދިވެހި ސަރުކާރަށް ސިޓީއެއް ފޮނުވާފަ އެވެ. އަދި އިންޑިއާގެ ޓުއާ އޮޕަރޭޓަރުން ވެސް އެކަމާ ކަންބޮޑުވުން ފާޅު ކުރި އެވެ.
އެހެންނަމަވެސް، ބޭރުގެ ޓުއާ އޮޕަރޭޓަރުންގެ އަތުން ޓެކްސް ނަގަން ޕީއެންސީގެ މެޖޯރިޓީ އޮތް މަޖިލީހުން ނިންމީ އެ ކަންބޮޑުވުންތަކަށް ރިއާޔަތްކުރުމެއް ނެތި އެވެ. އަދި، އެ ބިލު ތަސްދީގުކުރެއްވުމަށް ފަހު، ރައީސް މުއިއްޒު ވެސް ވަނީ އެއީ ވަރަށް ފުޅާ ދާއިރާއެއްގައި މަޝްވަރާކުރެވި ދިރާސާކުރައްވާފައި ފާސްކުރި ގެނައި ބަދަލެއް ކަމަށް ވިދާޅުވެފަ އެވެ.
މަޖިލީހަށް މިއަދު ބަލައިގަތް އިސްލާހުގައި ވަނީ ބޭރުގެ ޓުއާ އޮޕަރޭޓަރުންގެ އަތުން ޓެކްސް ނެގުން ހުއްޓުމަކަށް ގެނައުމުގެ އިތުރުން، ޖީއެސްޓީ ދެއްކުމުން އެއްކިބާވުމުގެ މުއާމަލާތްތައް ބަލައިނުގަތުމާއި އެފަދަ ފަރާތްތަކާމެދު މީރާއަށް އެޅޭނެ ފިޔަވަޅުތައް ހިމަނައިފަ އެވެ.
