ބޭރުގެ ޓުއާ އޮޕަރޭޓަރުންގެ އަތުން ޓެކްސް ނަގަން މިދިޔަ އޯގަސްޓު މަހު ގާނޫނަށް ގެނައި ބަދަލުތައް އުވައިލަން މިއަދު މަޖިލީހަށް ހުށަހެޅުމަކީ ދެބަންދިހާރު ބަޔަކު ވެރިކަން ކުރަން ތިބުމުގެ ނަތީޖާ ކަމަށް ހަނިމާދޫ ދާއިރާގެ މަޖިލިސް މެންބަރު، އަބްދުލްޣަފޫރު މޫސާ ވިދާޅުވެއްޖެ އެވެ.
ރައްޔިތުންގެ މަޖިލީހުގައި މިއަދު ވާހަކަދައްކަވަމުން ޣަފޫރު ވިދާޅުވީ މީގެ ދުވަސްކޮޅެއް ކުރިން އާމްދަނީން ޓެކްސް ނެގުމުގެ ގާނޫނަށް ޕީއެންސީން ގެނައި ބަދަލު އުވައިލަން މިއަދު މަޖިލީހަށް ހުށަހެޅުމަކީ ލަދުވެތިކަމެއް ކަމަށެވެ.
"މި ކަހަލަ ދެއުޅި އެއްނުވާ ދެބަންދިހާރު ބަޔަކަށް ގައުމު ހިންގަން ލިބުނީމާ ދެން ވާނެހައި އެތި މި ގައުމަށް ވަމުން މިދަނީ އިއްޒަތްތެރި ރައީސް، ހަމައެއް އިންސާފެއް ލަމައެއް ނެތި ހިތަށް އެރި އެއްޗެއް ހިތަށް އެރި ވަގުތެއްގައި ކުރަމުން މިދަނީ އިއްޒަތްތެރި ރައީސް. މިއީ ވެސް ދިދައެއް ނަގައިގެން ރައްޔިތުން ދިރިއުޅޭ ގައުމެކޭ އިއްޒަތްތެރި ރައީސް،" ޣަފޫރު ވިދާޅުވި އެވެ.
އޭނާ ވިދާޅުވީ މި ސަރުކާރުން އަމަލުކުރަމުންދާ ގޮތުގެ ސަބަބުން ބޭރު މީހުންގެ ކުރިމަތީގައި ދިވެހީންގެ އެއްވެސް އަގެއް މިހާރު ނެތް ކަމަށެވެ. ބޭރު މީހުންގެ ކުރިމަތީގައި ވެސް މި ސަރުކާރުން ދަނީ މި ގައުމުގެ ހުރިހާ ކަމެއް ވެއްޔާ މޮޑެމުން ކަމަށް ޣަފޫރު ވިދާޅުވި އެވެ.
ދިވެހިރައްޔިތުން އުޅެމުން ދަނީ ވަރަށް އުނދަގުލާއި ދުއްތުރާގައި ކަމަށާއި ދިވެހި ރައްޔިތުން ބޭނުންވާ އެއްވެސް ކަމެއް ސަރުކާރަށް ފުއްދައިނުދެވޭ ކަމަށް ޣަފޫރު ވިދާޅުވި އެވެ. މީގެ ކުރިން ދުވަހަކު ވެސް ނުދާ މިންވަރަށް ތަކެތީގެ އަގު އުފުލިފައިވާ ކަމަށް ވެސް އޭނާ ވިދާޅުވި އެވެ.
ސަރުކާރުން ބޭނުންވިވަރުގެ ބަޖެޓެއް މަޖިލީހުން ފާސްކޮށްދިނީމާ ވެސް ރައްޔިތަކަށްވީ އެއްވެސް ކަމެއް ނެތް ކަމަށާއި ރަށެއްގައި ހިނގާ ޕްރޮޖެކްޓެއް ވެސް ނެތް ކަމަށް އޭނާ ވިދާޅުވި އެވެ.
"ވައްކަން ކުރުން ނޫންކަމެއް މި މީހުންނެއް ނުކުރޭ އިއްޒަތްތެރި ރައީސް، މަރުވާނެކަމުގެ ކަންފުޅެއް ވެސް ނެތް ނުލަފާ ބޮޑު ބައިގަނޑެއް ރައްޔިތުން އަތުން މުދަލާއި ފައިސާ ފޭރެމުން މިދަނީ އިއްޒަތްތެރި ރައީސް، މިހެނެއް ނުކުރެވޭނެ މިކަމެއް އިއްޒަތްތެރި ރައީސް، އިންސާފު އަރާ ހަމަކުރާނެ، ރައްޔިތުން ރައްޔިތުންގެ ބަސް ބުނާނެ އިއްޒަތްތެރި ރައީސް، މި ވެރިކަން ނިމުމަކަށް ގެންނާނެ ދިވެހި ރައްޔިތުން ނިކުމެ، އެކަން ކުރަން އެބަ ޖެހޭ،" ޣަފޫރު ވިދާޅުވި އެވެ.
މަޖިލީހުގެ ރައީސް އާއި ވަޒީރުންގެ އިތުރުން ކައުންސިލްތަކުގެ މެންބަރުންގެ މުސާރަ ބޮޑުކުރަން މާލިއްޔަތު ކޮމިޓީން ނިންމި ނިންމުމަށް ވެސް އޭނާ ވަނީ ފާޑުވިދާޅުވެފަ އެވެ.
