ރާއްޖޭގެ ރައްޔިތުންނަށް ބޯހިޔާވަހިކަން ކަށަވަރުކޮށްދިނުމަށް ފުށިދިއްގަރު ފަޅު ހިއްކައިގެން ތަރައްގީކުރަމުންދާ ރަސްމާލެއިން އެއްބައި އިޒްރޭލަށް ވާގިވެރިވާ ޔޫއޭއީގެ އީގަލް ހިސްލްއަށް ދޫކޮށްލަން އުޅޭ އެއްބަސްވުމުން ރާއްޖެއަށް ލިބޭ އެއްޗެއް ނޭނގޭތީ މާވަށު ދާއިރާގެ މެންބަރު އަހްމަދު ޝާކިރު ކަންބޮޑުވުން މިއަދު ފާޅުކުރައްވައިފި އެވެ.
މަޖިލީހުގެ ޖަލްސާގައި ވާހަކަދައްކަވަމުން ޝާކިރު ވިދާޅުވީ ގައުމު މިހާރު އޮތް ދަތި ހާލަތުގައި ރަސްމާލެއިން އެއްބައި ދޭން ނިންމިއިރު، އެކަމާ ގުޅޭ މައުލޫމާތުތައް ހާމަކުރަން ޖެހޭ ކަމަށެވެ. އެގޮތުން އޭނާ ވިދާޅުވީ އެ ޑީލުން ދައުލަތާއި ގައުމަށްވާ ފައިދާއެއްވެސް ސަރުކާރުން ރައްޔިތުންނަށް ސާފުކޮށްދޭންޖެހޭ ކަމަށެވެ.
"އަޅުގަނޑު މި ބުނަނީ މީގެ [ރަސްމާލެ ޑީލުގެ] ޕާފޯމަންސް ގެރެންޓީ. ޕާފޯމަންސް ގެރެންޓީއެއް ބެހެއްޓިތޯ. މީގައި އެ ހާމަކުރަންޖެހޭ މައުލޫމާތު ހާމަނުކުރާ އެ މައްސަލަ މި ބުނަނީ. އެ ކިހިނެއް ވެގެންތޯ މި ހާމަނުކުރެވިގެން މިއުޅެނީ. މިވަރު ދަތި ހާލުގައި ގައުމު އޮއްވާ މިކުރާ ނެގޯސިއޭޝަނަކުން ކޮން ކަމެއްތޯއޭ ދައުލަތަށް، ދިވެހިރާއްޖެއަށް ލިބެނީ،" ޝާކިރު ވިދާޅުވި އެވެ.
"އެ ސުވާލު މި އުފައްދަނީ. އެހެންވީމަ އެއީ އަޅުގަނޑު ވަރަށް ކަންބޮޑުވާ ކަންތައްތަކެއް ހުރީމަ އެވާހަކަ ހިއްސާކޮށްލަން ބޭނުންވީ."
އީގަލް ހިލްސްއާއެކު ސަރުކާރުން ވެފައިވާ ކޮމާޝަލް ޓާމްސް އެގްރީމެންޓުގެ ހުރިހާ ތަފުސީލުތަކެއް ހާމަކުރުމަށް ގޮވާލައި ގަލޮޅު ދެކުނު ދާއިރާގެ މަޖިލިސް މެންބަރު، މީކާއިލް އަހުމަދު ނަސީމް މަޖިލީހަށް މިއަދު ގަރާރެއް ހުށަހެޅުމުން ޕީއެންސީގެ ސުޕަ މެޖޯރިޓީ ބޭނުންކޮށްގެން އެ ގަރާރު ވަނީ ބޭރުކޮށްލާފަ އެވެ.
ރަސްމާލެ ދޫކޮށްލަނީ 99 އަހަރަށް ކަމަށް ސަރުކާރުން ބުނެ އެވެ. އެއީ ގާނޫނުތައް ހުއްދަ ކުރާ ކަމަކަށް ނުވާތީ ސަރުކާރުން އުޅެނީ އެ ޕްރޮޖެކްޓަށް ފަހިކުރަން ގާނޫނުތަކެއް ހަދާށެވެ. އަދި ނޮވެމްބަރު 11، ގައި އެގްރިމެންޓުގައި ދާއިމީ އެގްރިމެންޓުގައި ސޮއި ކުރެވޭތޯ މިހާރު ދަނީ މަސައްކަތް ކުރަމުންނެވެ.
ސަރުކާރުން ބުނަނީ ރަސްމާލެއަށް އީގަލް ހިލްސް އިން 20 ބިލިއަން ޑޮލަރު އިންވެސްޓު ކުރާނެ ކަމަށެވެ. އެކަމަކު އީގަލް ހިލްސް އިން ބުނަނީ އެ ކުންފުނިން އިންވެސްޓު ކުރާނީ 12 ބިލިއަން ޑޮލަރު ކަމަށެވެ. އަލައްބާރު ފަހުން ވިދާޅުވީ 20 ބިލިއަން ޑޮލަރަކީ އެތަނުގެ މަސައްކަތް ނިމުމުން ތަނުގެ އަގު ހުންނާނެ މިންވަރު ކަމަށެވެ.
