ޓެކްސް ދެއްކުމުގައި ލުއި ގޮތެއް ހަމަޖެއްސުމާއި ބޭރުން ގެންނަ މުދަލަށް ޑިއުޓީ ކެނޑުން ފަދަ ލުއިތަކެއް ކުދި ވިޔަފާރިތަކަށް ހާއްސަކޮށް ތައާރަފްކުރައްވާނެ ކަމަށް ރައީސް މުހައްމަދު މުއިއްޒު މިރޭ ވިދާޅުވެއްޖެ އެވެ.
ޓެކްސްއަށް ގެނައި ބަދަލަކީ، ސަރުކާރުން ވިޔަފާރިތަކަށް ދޭން އޮންނަ އެއްޗެއް ކެނޑުމަށްފަހު ޓެކްސް ދައްކަންޖެހޭ ގޮތް ހެދުމެވެ. ކުދި ވިޔަފާރިތަކުން އެތެރެ ކުރާ، ޑިއުޓީ ކަނޑާލެވޭނެ ތަކެތީގެ ލިސްޓެއް ވެސް އާންމު ކުރައްވާނެ ކަމަށް މުއިއްޒު ވިދާޅުވި އެވެ.
އޭގެ އިތުރުން، ޖީއެސްޓީއަށް ރަޖިސްޓްރީ ކުރަންޖެހޭނީ 1.5 މިލިއަން ރުފިޔާގެ ވިޔަފާރި ކުރާ ތަންތަނުން ކަމަށް ކަނޑައަޅުއްވާނެ ކަމަށް ވެސް ރައީސް ހާމަކުރެއްވި އެވެ.
އުފެއްދުންތެރިކަމުގެ މައުރަޒު ފެށުމުގެ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ، އެމަނިކުފާނުގެ ސަރުކާރުން ކުދި ވިޔަފާރިތަކަށް ފައިސާ ނުދައްކާތީ ވަރަށް ގިނަ ދަތިތަކާ ވިޔަފާރިތަކުން ކުރިމަތިލާންޖެހޭ ކަމަށެވެ.
"ސަރުކާރުން އެކި ކަހަލަ މަސައްކަތް ނަގައިގެން ކުރާ ފަރާތްތަކަށް ސަރުކާރުން ދޭން ހުންނަ ފައިސާ ނުދެވި ލަސްވުމުގެ ސަބަބުން ވަރަށް ދަތިތައް ދިމާވޭ. މިއީ ދެކޮޅު ނުޖެހޭ ކަމަކަށްވާތީ ހަމަޖައްސަންޖެހޭ ކަމެއް ކަމުގައި އަޅުގަނޑުމެން ދެކެން. އެސްއެމްއީ ސެކްޓާގެ ވަރަށް ގިނަ ފަރާތްތަކަކުން މިކަމުގެ ދަތިކަން އަޅުގަނޑުމެންނާ ހަމައަށް ގެނޭ،" ރައީސް ވިދާޅުވި އެވެ.
ޓެކްސްއަށް ލުއިތަކެއް ދޭން ނިންމީ އެ މައްސަލަ ހައްލު ކުރަން ކަމަށް މުއިއްޒު ވިދާޅުވި އެވެ.
"މިގޮތުން އަޅުގަނޑުމެން މަޝްވަރާކޮށްފައި ނިންމާފައި މި ވަނީ އެމްއެސްއެމްއީ ދާއިރާގައި އެކި ކަހަލަ ވިޔަފާރި ކުރާ ފަރާތްތަކުން ދައްކަން ހުންނަ ޓެކްސް ދެއްކުމުގައި އޮފްސެޓް ކުރާ ގޮތަށް. މާނައަކީ އެ ފަރާތްތަކަށް ސަރުކާރުން ދޭން އޮންނަ ފައިސާ އާއި ސަރުކާރަށް އެފަރާތްތަކުން ޓެކްސް ދެއްކުމަށް އޮންނަ އަދަދާ މި ދެ އަދަދު އަޅާކަނޑާފައި އޮފްސެޓުކޮށްފައި ފައިސާ ދައްކާ ގޮތަށް ހަމަޖެއްސުން،" އެމަނިކުފާނު ވިދާޅުވި އެވެ.
ރައީސް ވިދާޅުވީ، ކުދި ވިޔަފާރިތަކުން އިމްޕޯޓް ކުރާ ތަކެއްޗަށް ޑިއުޓީ ކަނޑަން ފަށާނީ އަންނަ އަހަރުން ފެށިގެން ކަމަށެވެ.
"އެމްއެސްއެމްއީ ސެކްޓާގައި މަސައްކަތް ކުރާ ވިޔަފާރިތަކުން ރާއްޖެއަށް އިމްޕޯޓް ކުރާ ރޯމެޓީރިއަލްސްތަކަށް އައިޓަމްތަކަށް ލުއިދިނުމުގެ ގޮތުން، އައިޓަމްތަކުގެ ފުރިހަމަ ލިސްޓެއް ހަދާ، އެލިސްޓުގައިވާ ބާވަތްތަކަށް ސުމެއް އިންސައްތަ ރޭޓުގައި އިމްޕޯޓް ޑިއުޓީ ނަގާ ގޮތަށް އެކެއް ޖަނަވަރީ 2027 އިން ފެށިގެން ފަސް އަހަރު ދުވަހަށް ކަނޑައަޅާ ގޮތަށް ސަރުކާރުން މިވަނީ ނިންމާފައި،" މުއިއްޒު ވިދާޅުވި އެވެ.
