އީގަލްސް ހިލްސް މަޝްރޫޢަށް ރަސްމާލެއިން 500 ހެކްޓަރުގެ ބިން 99 އަހަރަށް ދޫކޮށްލުމަކީ ހަމައެކަނި އިންވެސްޓްމަންޓާ ގުޅުންހުރި މުއާމަލާތެއް ނޫން ކަމަށާއި، އެއީ ގައުމަށް ވަރަށް ނުރައްކާތެރި ސިޔާސަތެއް ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ ކުރީގެ މެންބަރު މުޙައްމަދު އަމީތު ވިދާޅުވެއްޖެއެވެ.
އެ މަޝްރޫއުއާ ގުޅިގެން އަމީތު އެކްސްގައި ކުރެއްވި ޕޯސްޓެއްގައި ވިދާޅުވީ, ދިވެހިރާއްޖެއަކީ ދުނިޔޭގެ އެހެން ގައުމުތަކަށް ލިބިފައި ނުވާ ފަދަ "ޔުނިކް" ސިފަތަކެއް ހުރި، އަދި ގާނޫނު އަސާސީން އެކަންކަމަށް ހިމާޔަތްތެރިކަން ފޯރުކޮށްދީފައިވާ ގައުމެއް ކަމަށެވެ.
"މުސްލިމަކަށް މެނުވީ ދިވެހި ރައްޔިތަކަށް ނުވެވޭނެކަމަށް ސީދާ ޤާނޫނު އަސާސީގައި ލިޔެ ބަޔާންކޮށްފައި ވޭ. މިރާއްޖޭގެ ފައްޅި އަޅާ އެހެން ދީންތަކަށް އަޅުކަން ނުކުރެވޭނެކަމަށް ގާނޫނު އަސާސީއާއި ގާނޫނުތަކުގައި ލިޔެވި ބަޔާން ކޮށްފައި އެބަހުރި،" އަމީތު ވިދާޅުވިއެވެ.
އަމީތު ވިދާޅުވި ގޮތުގައި, ރާއްޖެއަކީ ފަސް ވަގުތު ބަންގީގެ އަޑު ޖައްވުގައި ގުގުމަމުން ދާތާ 900 އަހަރު ފާއިތު ކޮށްފައިވާ، އެއް ބަހަކުން ވާހަކަ ދައްކާ އެއް ނަސްލެއްގެ ގައުމެކެވެ. މީގެ އިތުރުން ދުނިޔޭގެ އެހެން އެއްވެސް ގައުމަކަށް ލިބިގެން ގޮސްފައިވާ ނިއުމަތްތަކެއް ނޫން ކަމަށް ވެސް އެ ޕޯސްޓުގައި އޭނާ ފާހަގަކުރެއްވި އެވެ.
"މިފަދަ ހާއްސަ ސިފަތަކަށް ރިއާޔަތް ކުރުމެއް ނެތް ގޮތަށް، ހަމައެކަނި އިންވެސްޓްމަންޓް ރިޓާންސްއަށް އެކަނި ބަރޯސާވެގެން 99 އަހަރަށް ރާއްޖޭގެ ބިންތައް ދޫކޮށްލުމަކީ ވަރަށް ނުރައްކާތެރި ސިޔާސަތެއް،" އަމީތު ވިދާޅުވިއެވެ.
މިކަމުގެ ނަތީޖާއެއްގެ ގޮތުން ރާއްޖޭގައި އޮތް ހަމަޖެހުމާއި އެއްބައިވަންތަކަން ގެއްލި، ޒަމާންތަކަށް ދިގުދެމިގެން ހިނގައިދާނެ ފިތުނައެއް ގައުމުގައި އުފެދުމަކީ ވަރަށް އެކަށީގެންވާ ކަމެއް ކަމަށް ވެސް އަމީތު ފާހަގަކުރެއްވި އެވެ.
އެ ޕޯސްޓުގައި އަމީތު އިތުރަށް ވިދާޅުވީ، ރައްޔިތުންގެ އިހުސާސްތަކާ ދިމާ އިދިކޮޅަށް ގައުމެއް ތަރައްގީ ނުކުރެވޭނެ ކަމަށެވެ.
