ރަސްމާލެ މަޝްރޫއުއާ މެދު އިދިކޮޅު އެމްޑީޕީން އަމަލުކުރާނެ ގޮތެއް ކަނޑައެޅުމަށް އެ ޕާޓީގެ ގައުމީ މަޖިލީހުގެ ބައްދަލުވުމެއް ބާއްވައިދޭން ލީޑަޝިޕުގައި އެދުމަށް ފެންނަ ކަމަށް އެ މަޖިލީހުގައި ހިމެނޭ 63 މެންބަރުން ތާއީދުކޮށްފި އެވެ.
ރަސްމާލޭގެ ބިމުން 500 ހެކްޓަރުގެ ބިން ޔޫއޭއީގެ އީގަލް ހިލްސް ކުންފުންޏަށް ދިނުމާ ގުޅޭގޮތުން އެމްޑީޕީން އަމަލުކުރާނެ ގޮތެއް ކަނޑައެޅުމަށް ގައުމީ މަޖިލީހުގެ ޖަލްސާއެއް ބާއްވައިދިނުމަށް ލީޑަޝިޕުގައި އެދުމަށް ނިންމީ އެކަމާ ބެހޭ ގައުމީ މަޖިލީހުގެ މެންބަރުންގެ މެދުގައި ބޭއްވި ނުރަސްމީ ބައްދަލުވުމެއްގަ އެވެ.
އެ ބައްދަލުވުމުގައި 18 މެންބަރުން ބައިވެރިވި އެވެ. އެ ބައްދަލުވުމުގައި ބައިވެރިވި މެންބަރުންގެ އިއްތިފާގުން ނިންމާފައި ވަނީ ގައުމީ މަޖިލީހުގެ ރަސްމީ ބައްދަލުވުމެއް ބާއްވައިދިނުމަށް ލީޑަޝިޕުގައި އެދުމަށް ގައުމީ މަޖިލީހުގެ ހުރިހާ މެންބަރުން ދެކޭގޮތް ބެލުމަށްޓަކައި ގައުމީ މަޖިލީހުގެ ވަޓްސްއެޕް ގްރޫޕްގައި ޕޯލްއަކަށް އެހުމަށެވެ.
އަދަދު އަށް އެނގިފައިވާ ގޮތުގައި އެ ޕޯލްއަށް މިހައިތަނަށް ވޯޓު ދެއްވާފައިވަނީ 63 މެންބަރުންނެވެ. އެ ހުރިހާ މެންބަރުން ވެސް އެދިފައި ވަނީ އެ ޖަލްސާ ބާއްވަން ފެންނަ ކަމަށެވެ. އަދި، އެ ޖަލްސާ ލައިވް ކުރުމަށް ވެސް އެ މެންބަރުން އެދިފައިވެ އެވެ.
އީގަލް ހިލްސް މަޝްރޫއުއާ ގުޅިގެން އެމްޑީޕީގެ ގައުމީ މަޖިލީހުގެ ޖަލްސާއެއް ބާއްވަން ނުފެންނަ ކަމަށް ވަކާލާތުކުރައްވާ ހަމައެކަނި ބޭފުޅަކީ އެ ޕާޓީގެ ޗެއާޕާސަން އަދި ކުރީގެ ރައީސް، މުހައްމަދު ނަޝީދު އެވެ. އެމަނިކުފާނު ވިދާޅުވަމުން ގެންދަވަނީ އަލައްބާރުއާ ދެކޮޅަށް އެއްޗެހި ކިޔުމަކީ އޭގެ ސަބަބުން ރާއްޖެއަށް ގެއްލުންވާނެ ކަމެއް ކަމަށާއި ޔޫއޭއީއަކީ އެމްޑީޕީއާ ވެސް ވަރަށް ގާތް ގައުމެއް ކަމަށެވެ.
"ތަކުރާރުކޮށް ދަންނަވާނަން، މި އެމްޑީޕީއަށް ވަރަށް ގެއްލުންހުރި ކަމެއް. ޔޫއޭއީއަކީ އެމްޑީޕީގެ ގާތް ގައުމެއް. އަޅުގަނޑުމެން މި ހަދާ ގޮތުން ޔޫއޭއީ ޕީއެންސީއަށް ދެވުނީ،" އެމްޑީޕީ ގައުމީ މަޖިލިސް ގްރޫޕަށް ފޮނުއްވި މެސެޖެއްގައި ނަޝީދު ވިދާޅުވި އެވެ.
ނަމަވެސް، އެކަމާ ގުޅޭގޮތުން އެމްޑީޕީގެ ކުރީގެ ރައީސް، އަބްދުﷲ ޝާހިދު އާއި ކުރީގެ ޗެއާޕާސަން، ފައްޔާޒް އިސްމާއިލް ވިދާޅުވެފައި ވަނީ ބައްދަލުވުމެއް ބާއްވައި އެ މައުޟޫގައި މަޝްވަރާކުރަން ފެނިވަޑައިގަންނަވާ ކަމަށެވެ.
